تغدي ولا تعشي !!! [الأرشيف]

أبو رداد

13/04/2007, 09:59 AM

السلام عليكم ورحمة الله وبركاته

تغدي ولا تعشي ... او تعطي علف الصباح ولا المساء

اغلب الصقاقير ما يقول تفطر رغم ان الوجبه تعطى في الصباح الباكر

وكذلك الوجبه الثانيه تعطى مابعد الظهر ... ويقول عنها الصقاقير عشا

هذا الي متعودين عليه ...

ولاعرف مدى انتشار هذه النعوت بين الصقاقير في الاقطار العربيه

المهم في موضوعنا هذا هو

اي الوجبتين افضل للطير في المقيض بنظرك ؟؟

ولا تعطي الطير الوجبتين معا بكميه قليله ؟؟؟

ولماذا ؟؟؟؟

(دعوه للنقاش)

ذيب البر

13/04/2007, 10:42 AM

هلا ابو رداد يشرفني اني اكون اول واحد يرد ويمكن يسبقني احد وانا قاعد اكتب ههههههههه

بالنسبة للمسميات في منطقتنا فطور اذا الوجبة صباح غدا اذا كانت الظهر عشاء بالليل وكلامك صحيح قابلت صقاقير يقولون
عشاء الطير مهما كان الوقت عموماً المسميات تختلف .
أنا ما سبق اني قيضت عندي بس بقول شي يمكن يفيد العام الشباب اخويانا قيضوا عندنا بالاستراحة الا انا وديت طيوري فرخ وقرناس لمربط بالرياض صفت الحمد الله بدري وكل من شاف قرناسها تعجب خاصة الفرخ شي ماتخيله والشباب تأخروا شوي واثنين
منهم بقى مع طيورهم من الريش (النجير ) بالمناكب ..... طبعاً راعي المربط ماراح يقولي يغدي والا يعشي يمكن هذا سر المهنة
بس سألت الهندي العامل الي بالمربط قال غدا عسا يقصد عشاء هههههههه
وسلامتكم

المري

13/04/2007, 11:12 AM

تسلم اخوي ابو رداد وحياك الله يالغالي..

بخصوص اذا الجو بارد يفضل انك تعشيها بس اذا جاء الوقت حر ورطوبة يفضل انك تغديها بدري علشان تصرف قبل الظهر وهذا الوقت (( من الفجر الى الظهر )) هو ابرد شي في الرطوبة لان الرطوبة عادة بالليل ....

وانا افضل الغداء على العشاء لانك في الليل تضطر تطفي الليت على الطيور وتخلي الناموسية شغاله فدائما الطيور اللي في الظلما ادراجها

ضعيف جدا جدا ..

اما في النهار فالطير ادراجه للعلف زين ..

وكل له نظرية..

بخصوص كلام اخوي ذيب البر عن النجير اطيوره فدائما الطيور اللي مهدوده طلق سبحان الله نجيرها تحصله قليل جدا جدا

ايضا اذا صار الطير مبروك يعنى ماهوب وحش اكثر من اللزوم تراه يقرنس بدري..

هذا مالدي وتسلمون كلكم

اخوكم - ابو معيض

عاشق السيل

13/04/2007, 11:17 AM

أخوي أبو رداد ولا يهون ذيب البر ،،،

أنا أشوف ( برأيي القاصر ) إن قولة نفطر الطير أو نغدي الطير كبيرة شوي بحق الطير !!
لأن الطير ماعنده إلا وجبة وحدة باليوم وهذي تكفيه إلى بكرا علشان كذا قالوا عنها عشاء ..
طبعا أتكلم عن حياة الطير الطبيعية في البراري بدون صقار ....

هذا رأيي :D والرأي الصح عندكم طبعا بس حبيت أشارك !!!!

حطاااااب

13/04/2007, 12:57 PM

وعليكم السلام ورحمة الله وبركاته

مساء الخير 00000 للجميع
حي الله ابورداد
اما للمسميات فكلامك الاقرب للغالبيه بالسعوديه وقت الصباح الى دخول الظهر وقت غداء وما بعد عشاء
وبالنسبه للمقيض على حسب الجو الخارجي للمقيض ربط او طلق بمنطقه حاره من شرق المملكه والخليج
ويسهل الامر لك طبعا اذا كان مقيضك بتكيف ماتهمك الاجواء الخارجيه
اما اذا سوالك لمقيضك لان مقيضك طلق وعلى الاجواء الخارجيه مثل حر الشرقيه يعتمد الغداء والعشاء
على الجو اذا الجو سموم وانت اعرف بالليل من المغرب علما دايم عشاء الليل يختلف مرش الطير مايكون متماسك
وهذا من تجربه ولا فيها ضرر واما اذا كان الوقت رطب يكون غداء من بعد صلاه الفجر ياخذ وقت الطير يصرف غداه
وهذا افضل وقت لطيور وكل واحد حسب تجربته وان شاء الله الاعضاء يفيدونا
ملاحظه000 الطير المربوط بالارض اغلب وزنيه العلف سمان يكفيه تقريبا بس الطلق ينزل وزنه لان الحركه بالطلق
ياخذ من مجهود لا تعتمد على سمان واحد في اليوم او صوص زد في العلف لانك بتلاحظ عند تصفيه الريش يطلب جسم الطير فتمينات وغذاء ويمكن يخلف الطير في القرنسه
تحياتي لك

عـــرادي

13/04/2007, 02:16 PM

هلااااااااااااااا والله وغلااااااااااااااا بالجميع
حي الله أبو رداد
بخصوص التسمية الغداء من الصبح إلى الظهر
وما بعد الظهر فهو عشاء
وبخصوص وقت العلف ( أقتناع شخصي )
وهو بعد الفجر إلى الساعة 8ص حتى يكون
الطير مرتاح طول النهار ولا يفكر بالعلف أو غيره
وإذا كان الطير في بداية الربطه (قبل يصطنع )
يكون العلف غداء وعشاء حتى يصطنع
وتقبلوا تحيات أخوكم
عـــــرادي

وشــــام

13/04/2007, 03:40 PM

السلام عليك

انا اعلف الطير الساعه وحدة بالليل و المقصد من هذا يكون الطير مبسوط ببراد الليل وياكل ونفسه منفتحه للعلف واذا اشتد الحر اعلف بعد الفجر ...
وجربت التعليف المغرب و اخر الليل يفرق الطير بالاكل بالليل ياكل ضعف اكله المغرب !!!!

تجربتي قد تكون صائبه وقد تكون خاطئه

الفيتو

13/04/2007, 03:53 PM

بسم الله الرحمن الرحيم
السلام عليكم ورحمة الله وبركاته
مساء الخير ياخوي/ابو رداد
مساء الخير ياجماعه
حياكم الله. بالنسبه لي اغدي طيوري الساعه( 7)الصبح لين تترك
واعشي الساعه (5)العصرلين تترك. وهذي طريقتي من يوم
قرنست الطيور .وماأذكرإني سويت طرق جديده
والسلام
الفيتو
الحجاز
26/3/1428هـ

ابو عايد

13/04/2007, 03:54 PM

السلام عليكم ورحمه الله وبركاته

تسلم على فتح هذا الموضوع يأبو رداد المهم في هاذي الأيام

كل واحد وتجربته في المقيض ....!

أنا شخصياً أفطر وعشي مدة معينه لمدة شهر ونص ثم عشاء وجبة واحده طبعاً الفطور بعد صلاة الفجر مع طلوع الضوء والعشاء من خمسة ونص إلى ست حتى الطير يعرف وقت عشاه

طبعاً الفطور يختلف عن العشاء هذا رأي الشخصي

والسنه هاذي يأبو رداد هد الطيور في المقيض وسلامتك يا طويل العمر

راجع بريدك الشخصي

المري

13/04/2007, 05:06 PM

مرحبا اخوي خشم الهامل

بخصوص عشاك نص الليل ترى وقت ارقاد الطير .. يعنى باقي النهار صاحي ..

وتالي الليل راقد..

صقار أبوظبي

13/04/2007, 05:18 PM

في البدايه غدا وعشا ولين يعتد عشا بس
0000
خشم الهامل عندك بوم لو طير الله يهديك

*سرحان*

14/04/2007, 01:06 AM

مساء الخير
الطير له غدا وعشا مثل ماقلت يابو رداد
واقول الجو ونوع المقيض له دور
بالمختصر يابو رداد كل راعي طير له نظره . لكن البراد بعد العلف اهم شي

سلطان العوني

14/04/2007, 08:04 AM

شيخ الخوالد

14/04/2007, 05:12 PM

كل راعي طير وله نضره

قلب ذيب

14/04/2007, 05:46 PM

اي الوجبتين افضل للطير في المقيض بنظرك ؟؟
ولا تعطي الطير الوجبتين معا بكميه قليله ؟؟؟
ولماذا ؟؟؟؟
ارحب يابورداد 0
اشكر الاخوه على مداخلاتهم واثرائهم الموضوع 0
انا طيوري في المربط , وعندما كنت أقيض طيوري في السنوات الخوالي كنت أعشيها فقط , ازيد العشى واخفه حسب عدة الطير , طبعا مقيض طيوري غرف مكيفه , مع وجود النوافذ والمراوح اللازمه 0
من الافضل أعطاء الطير العلف في الايام الحاره وقت البراد , اذا كان مقيضه غير مكيف , اي نستبدل العشا بالغدا الصباحي , بعد صلاة الفجر 0
الشاهين الفرخ المنقول حديثا يعطى نسير بعد ظهور الشمس , حتى يتعود على رمي الروباجه باكرا كل يوم 0

صياد ليبيا

14/04/2007, 06:52 PM

بالنسبة عندنا فى ليبيا وخاصة فى مدينة بنغازى اى اكل فى اى وقت يعطى للطير سواء فى الصباح او المساء يسمى عشاءوفى فترة المقيض يفضل تقسيم العشاء على وجبتين احداها فى الصباح واتكون نص عشاء بحيث الطير يذوبها كلها
وممكن حتى يرومج عادى وفى فترة العصر اعطيه نص عشا اخر وما يصبح الا امذوب عشاه وامرومج وهكذا وتختلف كميات الطعام حسب حرارة الجو تنقص او تزيد

أبو رداد

14/04/2007, 09:05 PM

ذيب البر
الله يحيك يابو منصور وشرفتنا في مرورك على الموضوع
وهذا راعي المقيض لو مثبت عنوانه مع عناوين مراكز الربط
دامك مدحته تراه يستاهل المدح
,,,
المري
ماشاء الله عليك يابو معيض
موسوعه
كنك تعرف وش افكر به
ههههههههههه
اشكر لك مرورك الكريم
,,,
عاشق السيل
الله يحيك اخوي وشرفتنا في مرورك الكريم
والطير في الطبيعه مرات مايحصل ولاوجبه في اليوم ومرات مرتين وثلاث
والطبيعه تختلف عن الشبك
,,,
حطاب
الله يحيك
واشكر لك مرورك الكريم
ونصايحك الطيبه اخوي
,,,
عرادي
الله يحيك
واشكر لك مرورك الكريم
وان شاء الله تلاقي الوكري
,,,
خشم الهامل
الله يحيك واشكر لك مرورك الكريم
واكيد تجربتك خاطئه
واستفاد من كلام الاخوه الباقين
,,,
الفيتو
الله يحيك يابو صالح
الطيور توصل مرحله تترك احد الوجبات
وانا اشوف وجبه وحده اصح للطير
والطائف خارج المراهنات
المفروض طيور الطائف بلا علف تبدل ريشها
على طيب الهوا ههههههههههه
واشكر لك مرورك الكريم
,,,
ابو عايد
الله يحيك
واشكر لك مرورك الكريم
وبالفعل الطيور
تحتاج في بداية الربط او قبل الهدد في المقيظ
وجبتين
,,,
صادق الهرجه
الله يحيك
واشكر لك مرورك الكريم
وصادق يصادق الهرجه
,,,
سرحان
الله يحيك يابو هذال
راح اسميك هلال
لانك تطل علينا في الشهر مره
ههههههههههههه
ومانستغني عن ملاحظات ونصايحك
,,,
سلطان العوني
الله يحيك واشكر لك مرورك الكريم
ويبين جاز لك كلام ابو هذال
هههههههه
,,,
شيخ الخوالد
الله يحيك يابو سطام
واشكر لك مرورك الكريم
,,,
قلب الذيب
الله يحيك يابو ماجد
ومشكور على النصايح الطيبه
واشكر لك مرورك الكريم
,,,
صياد ليبا
الله يحيك
ومشكور على المعلومات الي زودتنا بها
وتسمية الصقاقير في المغرب العربي للوجبات
واشكر لك مرورك الكريم
,,,
,,,,,
,,,

عفتان

14/04/2007, 09:39 PM

مشرفنا العزيز بو رداد اشكرك على هالمواضيع اللي تجدد النشاط خاصة و حنا في بداية الربطه و الله يعين الجميع
اخوي الغالي عني انا اغدي الصبح بدري و اعطيه نص اللي اعطيه عشا ووقت العشا قبل المغرب بنص ساعه
تقبل تحياتي اخوي و نحن في انتظار رأيك

الساهر1

14/04/2007, 11:01 PM

موضوع قيم ويعطيك العافية ابو رداد

بالنسبة لي في بداية المقيض اغدي واعشي

ولمدة شهر الى شهر ونصف

ثم يقتصر الامر على العشاء فقط

مارشال

15/04/2007, 02:38 AM

احب اعشي الطير وبعد غياب الشمس بسعتين او اكثر, يبرد الطير شوي / تعرف وقت المقيض حر والعلف يتعب الطير

لكن ما انصح انه يغدى الطير ابدً في وقت المقيض ............

تحياتي

مارشال

15/04/2007, 05:47 AM

على فكره في الرياض ماعندنا رطوبة الليل عشان نعلف الطيور اول النهار ........... بدلاً من الليل

بالعكس من اول النهار والجو حر في الرياض والطير ماله خلق يطير من شبه لشبه ........

والسلام

مارشال

الرياض

28/3/1428هـ

الوهـ قحطان ـاج

15/04/2007, 12:14 PM

اخوي ابو رداد

سؤالك وجيه

بصراحه انا قرنسة طير عندي شيهانه

وكنت احط لها عشاء فقط الساعه خمسة العصر

وماشاء الله تبارك الله عليها مصفيه بالحيل

والي يشوفها يقول انها ماهي مصفيه بيتي وكنت ارش الارضيه وقت الحر

لاني قنت مقرنس في ارض واحد من اخوياي في جدة تقرب الي عسفان تعرف الارض هناك صحراويه وسموم يلحق الطير ولا بد من رش

الارض علشان مايحس الطير بالجو الحار لان طيره مات بسبب الحر لانه حر ولا هو متعود مثل الشواهين على الجو الحار

وقرنسة من ابدع مايكون مصفيه

وكل واحد له طريقته في المقيض

وتحياتي لك يالغالي

أبو رداد

16/04/2007, 07:48 AM

عفتان ,, الساهر ,, مارشال ,, الوهـ قحطان ـاج
الله يحيكم
واشكر لكم مروركم الكريم

طيرحوران

16/04/2007, 09:12 AM

مرحبا ابو رداد وآسف على التأخير لكن بدلي بدلوي
بالنسبه للتسميه عندنا غدا وعشى مافيها كلام
بالنسبه للوجبه هذه تختلف من طير لطير وراعي الطير أو راعي المربط هو اللي يعرف هالشيء بالنسبه لمتابعته للطيور
وكذلك تعتمد على الأجواء
وأيضا تعتمد على قرناس الطير فإذا كان الطير من النوع اللي يهل الريش دفعه واحده مثل يحذف ثلاث ثلاث فهذا يحتاج إلى غداء وعشى بالنسبه لأجوائنا في نجد
وكذلك الطير اللي يحذف وحده وحده هذا نغدي ونعشي بس نقصر عليه بالغداء مثلا اعطيه سمانه كامله فيأكل نصفها ويترك الباقي وكذلك العشاء فأبداء اغديه نص واعشيه نص
بس أهم شيء الطير مايكون نازله صنعته من قل العلف
واسف على الأختصار
مشكور

الظغط العالي

16/04/2007, 10:18 AM

السلام عليكم ورحمة الله وبركاته

أسمحولنا نشاركم الراي أمرهم بينهم شورى ونا في راي الشخصي وعتقادي أذا كان الطير مقيظه مربط فهي وجبتين

حتى يعتد الطير وعقبه وجبه هي ماتهم ان كانت غدى ولا عشى أهم شي البراد ولو مهتم في طيره كل يومين

يحطله على الوجبه زيت سمك لنه يساعد الطير في تقويت ريشه ويحطله في الاسبوع بيضه قدامه من دون ما يكسرها

وأذا كان الطير مقيظه طلق فتكون وجبتين ونفس الموظوع على الزيت والبيض ويفظل أذا شفت الطير مابدل يعني تأخر

أذا كان هزيل عده وأذا كان عدييد العكس يعني أقصر عليه وبعدين عده هاذه مجربه وتفيد في الطيور الي تبدل متأخر

ونصيحه مني أذا عطيت الطير وجبات دسمه بيتم يبقي بقاي على الوكر وهاذ يسببله الاتهابات وخاصه أذا كان الجو رطوبه فهو يكون من أسباب الرداد أبعده الله عن طيوركم جميع وتقبلو مني أخوكم المخلص

http://www.mekshat.com/pix/upload/images32/mk49677_5555.jp

أبو رداد

16/04/2007, 03:42 PM

طير حوران ,,, الضغط العالي

الله يحيكم

واشكر لكم مروركم الكريم

ومداخلاتكم وشوركم الطيب

شبراق

22/04/2007, 01:42 PM

بالنسبة للغداء والعشاء هذي متوارثينه من الشيبان ودايم الكلام يكرر حتى لو فيه خطاء

اما بالنسبة للمقيض الطير يعطاء وجبه واحده باليوم دسمه تكفيه بنظري بسبب الطير بالحر مايكل زين والاصل الطير مصطنع فما يحتاج انه يعلف مرتين وان شكلتله مره بالاسبوع وجبتين باليوم مايمنع
هذا الي اشوفه وكلن له رائي

ابوالجازي

22/04/2007, 05:38 PM

تسلم اخوي ابو رداد وحياك الله يالغالي..

بخصوص اذا الجو بارد يفضل انك تعشيها بس اذا جاء الوقت حر ورطوبة يفضل انك تغديها بدري علشان تصرف قبل الظهر وهذا الوقت (( من الفجر الى الظهر )) هو ابرد شي في الرطوبة لان الرطوبة عادة بالليل ....

وانا افضل الغداء على العشاء لانك في الليل تضطر تطفي الليت على الطيور وتخلي الناموسية شغاله فدائما الطيور اللي في الظلما ادراجها

ضعيف جدا جدا ..

اما في النهار فالطير ادراجه للعلف زين ..

وكل له نظرية..

اخوكم - ابو معيض

اشهد بالله انك صقار مانتب سهل يالمري ولايهونون الاخوان الباقين
تسلم يابو رداد على هالموضوع الكاف الله يبيض وجهك

أبو رداد

22/04/2007, 06:42 PM

شبراق ,, ابو الجازي

الله يحيكم
وسرني مروركم الكريم
وتعقيبكم المفيد