ياراعي الشاهين لاتقيضها الان !!! ادعها حتى بداية شهر 7 !!!!!!!!!!

[المري]

السلام عليكم .. اخواني الأعزاء.. اطيور شلوى


موضوعي اليوم يتكلم عن دعو الشاهين سواء فرخ او قرناس .. حيث انها ماتربط مع الحرار في هذا الشهر,,

بل تدعى شهر 5 وشهر 6 وبداية 7 تربط وهذا يقلل من كثرة عدد اشهر ربط الشاهين حيث انها تربط شهر 5 و6 و7

وهي بدون فائدة ماتحذف الا في بداية شهر 8 اغسطس..

فالفائده :

1- تقليل اشهر الربطة لدى الشاهين.
2- انها تتعب الشاهين في هذا الفتره حتى انك اذا ربطتها تحصلها تقرنس على طول..
3-المحافظة على ريشها وخاصة الفرخ, لانك تربطه شهر 7 و8 فهذا يقلل من تكسار وتصداع الموس والنايفة.
4-المحافظة على لياقة الشاهين حتى اذا جات كراوين الصفري تحس انها لم تربط ولم تؤثر عليها الربطة.


وللمعلومة :

اكثر مايستخدم هذه الطريقة اخواننا في قطر , فياليتهم يشاركون في هذا الموضوع..


ملاحظة:
الرجاء من الاخوان اللي يقيضو الشاهين الان ان يحاولوا ان يزيلو الصفرة التي في ذيل الشاهين لانها تلعب

وتخرب الريش وخاصة الموس والنايفة .. وكلكم تعرفون ان الشاهين اول الوقت اعتماده الكلي على هذه الريش.



وسلامتكم

اخوكم - المري

[عفتان]

الف الف شكر يا ابو معيض
تسلم يمناك لا عدمناك
من ابداع الى ابداع
في انتظار جديدكم القادم
و يا مرحبا يا مرحبا

[أبو رداد]

مشكور يابو معيض
ملاحظات قيمه
وفعلا الشاهين نحس في المقيظ
وشفت بعض الاصدقاء مايربطوه لين يبدا بالحذف
وخصوصا الفروخ
ولكن الدعو مايكون مثل الموسم
ماتتجاوز 10 مسحات الفجر
وبعضها بعد مقناص كراوين صفري يالله تحذف
سبحان الله
صدق القال يبلي ويعين

[المري]

مرحبا اخوي عفتان وتسلم وتشكر على المرور ..

**

ارحب يابو رداد وكلامك زاد في الموضوع حلاوه..

وصحيح بعض الفروخ مايحذف الا في شهر 10 اجل وش هو تربطه !!!!!!!!!!!!

لانه في مثل هالظروف مايحصل من الربطة الا دمااااار على ريشة ..ولا يحصل خير..

تسلمون على المرور

والله يعطيكم العافية..

اخوكم - المري

[501]

يا بونا يا ابو معيض الخبره لها دور

والصقاره لها دور @@@@@@ تسلم يا ابو معيض على
النصيحه التي لها الفائده العامه بين الصقاره.



grnaas.org/img/upload/wh_20013139.jpg [/img

501

[راعي الخلوي]

السلام عليكم
انا عندي فارخ شيهانه صايد له فوق العشر كراوين الموسم الماضي...

وقبل ثلاث اسابيع جاتنا موجة حر في الشرقيه مهيب طبيعيه والله اني ادعي الشيهانه من مسافة 500 متر واول مايجيني خليته يمسح مسحتين ولمسك الحمامه والا هو يفح تقل صار له ساعه!!!
بعدها ربطته لان الحر هلاك للطير خصوصا الشياهين

[صقر قطر]

ابشر يا بو معيض



انا عن نفسي ما اربط و لا ادعي الفرخ



اخليه مبرقع بالمجلس ياكل و يتبرقع



و لين جاء اول 9 ابداء ادعيه و يبداء ايحذف



و في هذي الحاله يعتمد على الطير



في طيور تلحق ريشها و ما تنفع لكراوين اول الوقت و في طيور تحذف بالوحده و تقنص كراوين اول الوقت و تلحق حتى على الحبارى و اذا كنت محظوظ بعضها يمسك لين شهر 1 و تغسل السنه اللي بعدها مع الحرار هذي نادره

[المري]

مرحبا اخوي 501

ومرورك شرف لنا وأبشر باللي يسرك..

****

مرحبا اخوي راعي الخلوي..

يكون دعو الشاهين في وقت الضحى الباكر حيث ان مافيه حر ابدا.. وانت ابخص..

الين شهر 7 والوقت بارد الصباح..

****

مرحبا اخوي صقر قطر

وحياك الله وكلامك صحيح فرخ الشاهين في حذفة علة العلل..

ولازم انك تحافظ على ريشه لان يقنصه اول الوقت وربما الوقت كله..

****

[Abunaif]

الصفري يالله يالله ندعي تبي من يشجعك عجل شلون في الصيف :)))))))))))))))))

[راعي دهام]

.




كلامك سليم يا بو معيض لكن مثل ما قال ابو نايف


الواحد يالله يدعي في الصفري شلون يدعي بالصيف


والمشكله ان الواحد مو كل وقته فاضي ..


والبعض ما حوله مدعى قريب ..


على العموم تشكر على هالموضوع الرائع ..



و تقبل تحيتي ..





.

[المري]

مرحبا اخوي ابو نايف ومن طول الغيبات جاب الغنايم..

وصحيح بعض الناس ماهوب متفرغ ولا عندي وقت هذا مافيه حيله..

***

راعي دهام

حياك الله يالغالي..

وصحيح مثل ربعنا هل الرياض المدعى منهم يجي 80 كيلو !!!!!!!!!!!!!!!!

بس بالنسبة لي ولبعض الربع ساكن في هجرة وبيته في طرف الهجرة يروح على رجليه ويدعي ويعود..

تسلمون جميعا وماقصرتو..

اخوكم - المري

[ابوالجازي]

السلام عليكم
تحياتي لك يالمري
احسن شي ابتعد عن الغثا والهم واقنص بحر يقرنس بدري ونفسه زينه
علما انه يوجد حرار اسبق من الشياهين فوش يحدني على الشاهين
هذي وجهة نظر خاصه وكل له وجهة نظر
تقبل مروري

[المري]

مرحبا ابو الجازي وحياك الله يالغالي..

الماخوذه تستانس الا قدك تشوف زولها على السيت بين الطيور..

ومحبين الشياهين ماعاد يخلونها ..

ووجهة نظرك على عينى وعلى رأسي..

وعسى الله يرعاك ويحفظك..

اخوك - المري

[((الخالدي))]

يالمري أبسأ لك أذا ماقيضت طيري في الصيف يحذف الطير أذا أقبل الموسم؟

[ابو عايد]

السلام عليكم ورحمة الله وبركاته

السلام عليكم ورحمة الله وبركاته


إخي أبو معيض من ناحية الموضوع مهم ويفتح النقاش نافع وفائدة من ناحية مقيض الشاهين أختلف معك في هاذي أول شي الجو حار ومشابط الطيور وتغدي بعض الطيور وأنا من ناحيتي الطيور الى عندنا حاذفة المغاطيات بعض الطيور وترى أهل قطر مهوب كلهم يربطون شهر 7 الواحد مو فاضي يابو معيض في الصيف يدعي

هذا وجه نظري قابل الصواب أو الخطاء

[عناز]

ابو معيض ياخوي عندي شاهينين بحريات ودعيتهن حتى 5-4-2007 ورغبتهن للدعو تغيرت وانا مليت واعتقد ان فكرة الانتظار حتى شهر 7 ميلادي غير صائبه لان الحراره بالسعوديه بدأت ترتفع وربما يؤثر ذلك على نفس الطير

[المري]

مرحبا اخوي نمر وحياك الله ..

طيرك اللي تسأل عنه وش هو؟


**

اخوي ابو عايد

اتوقع مافيه شاهين هالحين حاذفة المغاطيات !!! الا اذا كانت اجبليه..

***

مرحبا اخوي عناز

والله انك صادق الواحد ماله خااااطر يدعي .. في هذا الجو الحار..

بس من بغى الدح ماقال أح..

**

والسنه هذي ابدعي واعطيكم اخر يوم اوقف فيه..

وسلامتكم

اخوكم - المري

[مزاجي]

بيض الله وجهك يابو معيض على هالمواضيع الطيبه

[القحطاني]

يعطيك العافيه ابومعيض
وبيض الله وجهك

[ظبياني920]

مرحبا
والله أنا عندي شاهين حاذف من الاخيرة لين الرابعة

وانا من قطر
وربعنا مايقيضون بـ7 الى بعضهم

[رضوان]

السلام عليكم
مشكور يالامري على المعاومات القيمه وهذي والله ما هي غريبه عليك وتسلم يمينك الي كتبت لنا الموضع مع تحيات خويك رضوان

[قناص ام وشاح]

عمي عنده فرخ شاهين جايه هدوا وهو الان مقيض

[عناز]

الله يقويك يالمري وابشر بالموميان لك ولطيرك