خـويـّك ..إلـتـفــت وراه .. وش تسوي ؟؟

[راع الكحيلة]

هل حصل أن رتبت أمورك مع العائلة الكريمة ومع عملك بأنك ستتركهما ليوم أو يومين مع الربع في البر وقبيل الرحلة بيوم أو بساعات ...

إذا بأحدهم يلتفت وراه ... وتخرب الرحلة وكل الخطط ؟؟

**

هل جهزت أغراضك وعفشك والخيام انت والربع , على أن تحملوها في وانيت أو شاص أحد خوياكم

فإذا بصاحب الموتر يلتفت وراه وتتلف كل الاستعدادات ؟؟

**

هل حسبتم حساب المبيت في البر لبضع ليالي وفي أثناء قضاء أحلى الأوقات وزبدتها

إذا بأحدهم يلتفت للوراء وتنقضي تلك الأوقات الجميلة قبل أوانها ؟؟



قد حصل لي مثل هذه المواقف

وكانت ردة الفعل :





أول شي أنتم عرفتم وش اقصد بإلتفت وراه والاّ لا ؟؟








يعني يبغى يعوّد .. أو يهوّن








إلاّ.. تدرون ؟؟










أترك ردة الفعل لكم









عطوني تجاربكم خلـّوني استفيد منكم

[المرقاب]

والله وهقه
لكن ما تقدر تقول شي عسى المانع خير
بالنسبه لي حصل لي موقف مخالف, يوم أن كنا في الصمان بين قرية والرفيعة وفي أثناء الرحلة أردت أن أتطمن على الأهل من مكان فيه أتصال وبعد الأتصال أذا بالوالده تخبرني بوفاة قريب وذاك اليوم يوافق يوم الخميس فما كان مني الاّ ان أخبرت صديقي حيث هو من أصطحبني بالسيارة ولأنه هوصديقي والآخرين تعرفت عليهم في نفس الرحلة ألمحت له بأني أرغب في العودة حيث أنهم سوف يصلون عليه يوم الجمعة ولكن ماحصل هو عكس المتوقع حيث أكملنا الرحلة الى نهاية يوم الجمعة ولست أدري الى الآن هل صديقي هذا أستوعب الموقف أم أنه حاول أن يتجاهل ما حصل!!!!!!!!!!

[اول]

العذر والسموحه

[باترول98]

السلام عينكم ورحمة الله وبركاتة
والله هذي مشكلة تعكر المزاج وتحوس عليك برنامجك في الرحلة
قد حصلي موقف وطلعت اناواخوياي لصمان وجابو معهم واحد عله الله لا يعيد ذيك الطلعة
المهم هذا العله اول مره يروح لصمان واستبعد الدرب وقف بنا في الطريق عند جيفة الله يكرمكم وقال مني متحرك من مكاني هذا ونحاول معه
لين طاع يبعد عن المكان ويوم جلسنا في مكان زين وحلو ابلشنا يبي الرياض بحجة ان عندة شغل وهو ماعندة الا الدجة لاشغل ولا مشغله وحولنا فيه يجلس واقتنع ويوم جابكرة نفس الموال ورجعنا عشانة وعقبها قلت للي جابوه هذا لاعاد يطلع معنا ابد وانا معكم هذا حده الثمامة ونت جاي لا وبعد الثمامة واجده عليه ( والمشكلة انه يقول انه جاي لصمان كثر شعر راسه )

[azozy]

في الحقيقة هو موقف (أو هي مواقف) تمر على الكثير منا ويكون لها تأثيرها السيء على مجمل التخطيط لكن في رأيي
إن الواحد يعرف ربعه وخوياه ويعرف التزامهم بكلمتهم فاذا حصل مثل ذلك من الطيبين شرواكم فرفيقك معذور والتمس له العذر وفي الباقين الخير والبركة وتوكلوا على الله وكملوا رحلتكممهما كانت التبعات يعني لو تستأجر شاص للخيام أو جيب للمشوار وطرى على بالي صدر هالبيت اللي ماني متأكد من صحته يقول (خوينا مانتلبه بالمشاريه)
وأكرر ان الخوي خوي والا عيال الناس واجد
ننتظر بقية الآراء

[راع الكحيلة]

والله وهقه
لكن ما تقدر تقول شي عسى المانع خير
بالنسبه لي حصل لي موقف مخالف, يوم أن كنا في الصمان بين قرية والرفيعة وفي أثناء الرحلة أردت أن أتطمن على الأهل من مكان فيه أتصال وبعد الأتصال أذا بالوالده تخبرني بوفاة قريب وذاك اليوم يوافق يوم الخميس فما كان مني الاّ ان أخبرت صديقي حيث هو من أصطحبني بالسيارة ولأنه هوصديقي والآخرين تعرفت عليهم في نفس الرحلة ألمحت له بأني أرغب في العودة حيث أنهم سوف يصلون عليه يوم الجمعة ولكن ماحصل هو عكس المتوقع حيث أكملنا الرحلة الى نهاية يوم الجمعة ولست أدري الى الآن هل صديقي هذا أستوعب الموقف أم أنه حاول أن يتجاهل ما حصل!!!!!!!!!!


حقيقة موقف غريب من الرجل ... ولكن لعله لم يستوعب الموقف كما قلت
والمصارحة كانت ستحل ما احتارت النفس في تفسيره

كنت أقصد بالأشخاص الذين يلتفتون للوراء بالأشخاص الذين يرغبون في العودة ..فقط للعودة
أو الشخص الذي لم يرتب أموره للرحلة ثم يفاجيء زملاءه بقراره البايخ بالانسحاب
والحجة , عنده شغل .. طيب وينك طول ها المدة أثناء الترتيبات ما قلت عندك شغل ؟؟

ولكن أشكرك كل الشكر على ذكرك لهذا الموقف والذي قد يحوّر الكلام من إظهار عيوب بعض الأشخاص الذين ينسحبون في آخر لحظة ..إلى ..إظهار عيوب أعضاء الرحلة الذين لا يقدرون ظرف أخيهم الطاريء الذي أشغل فكره .

بالنسبة لحالات الوفاة أو المرض أو الإصابات لا سمح الله أو غيرها من المستجدات التي قد تحصل فجأة فهذا موضوعها ذو استثنائية خاصة ... وخاصة جدا

ولا خير فينا إن أمضينا أوقاتنا الممتعة في الرحلة وعندنا أخ مرافق يكاد يقتله الحياء من طلب العودة بسبب ظرف طاريء ألم به
وينبغي علينا في مثل هذه الحالة عندما نحس أن الرجل قد تلقى معلومة أزعجته أن نكثر عليه السؤال وبإلحاح أيضا :
يا بو فلان عسى ماشر ؟؟ يا خوي لا تضايق وترى حنا ومواترنا تحت أمرك
يا خوي قم أتخاوى أنا وياك أوصلك للبيت .

بل أحيانا قد يكون الشخص المتضايق عنده سيارته تحت يده ويمكنه الذهاب بها من غير التأثير على عدد السيارات التي تحتاجها الرحلة ولكن مع هذا يتحرج من الإنسحاب إما بسبب خوفه على التخريب على زملاؤه أو ربما لخوفه من عبور المقطعة لوحده وهو غير ملم في تلك المناطق
فينبغي علينا كسر هذا الإحساس عنه وتقديم الفزعة له من غير جرح شعوره

وقد حصل لي موقف أشغلني عن رحلتي ولكن الحمدلله كانت الجولة البرية قد شارفت على الانتهاء
وكان الربع يبغون قضاء يومين في زيارات الأصدقاء عندما جاءني الاتصال عن مرض الوالدة شفاها الله ..وعندما علموا بذلك أصروا على العودة فأقسمت عليهم ألا يفعلوا وأخبرتهم أننا لسنا في مقطعة حتى أحتاج لرفقة أحد فنحن الآن في مناطق مأهولة .. ولا خوف بإذن الله من التعطل
فوافقوا على مضض ..بسبب القسم

فعلهم أزاح عن كاهلي الاحراج عندما عرضوا علي العودة بل وألحوا عليها ولم يقصدوا من وراء ذلك أي مجاملة ..ولم يتركوني كما قلت إلا بعد أن اطمئنوا من وصولنا للمناطق المأهولة بالسكان .



أكرر شكري لك

[راع الكحيلة]

السلام عينكم ورحمة الله وبركاتة
والله هذي مشكلة تعكر المزاج وتحوس عليك برنامجك في الرحلة
قد حصلي موقف وطلعت اناواخوياي لصمان وجابو معهم واحد عله الله لا يعيد ذيك الطلعة
المهم هذا العله اول مره يروح لصمان واستبعد الدرب وقف بنا في الطريق عند جيفة الله يكرمكم وقال مني متحرك من مكاني هذا ونحاول معه
لين طاع يبعد عن المكان ويوم جلسنا في مكان زين وحلو ابلشنا يبي الرياض بحجة ان عندة شغل وهو ماعندة الا الدجة لاشغل ولا مشغله وحولنا فيه يجلس واقتنع ويوم جابكرة نفس الموال ورجعنا عشانة وعقبها قلت للي جابوه هذا لاعاد يطلع معنا ابد وانا معكم هذا حده الثمامة ونت جاي لا وبعد الثمامة واجده عليه ( والمشكلة انه يقول انه جاي لصمان كثر شعر راسه )

أما خويكم هذا علة :) :)

يا الله لك الحمد هذي تجربة طيبة.. وتراك استفدت من ها الرحلة إنك ما عاد تدعيه لأي رحلة إلا إن كانت لا تبعد أكثر من 20 كيلو فقط وتراها واجد :)

والله استغرب يا خوك وشلون يفكر ها الرجال ؟؟ يشوف العالم متعنية ذاك المشوار الطويل
ويشوفهم مستانسين في محلهم اللي نزلوا به .. ويقوم إلا يخرب عليهم الطلعة بحجج واهية

كان الله في عونك .. ولاعاد تعوّدها واختر السنافية شرواك فقط

[راع الكحيلة]

في الحقيقة هو موقف (أو هي مواقف) تمر على الكثير منا ويكون لها تأثيرها السيء على مجمل التخطيط لكن في رأيي
إن الواحد يعرف ربعه وخوياه ويعرف التزامهم بكلمتهم فاذا حصل مثل ذلك من الطيبين شرواكم فرفيقك معذور والتمس له العذر وفي الباقين الخير والبركة وتوكلوا على الله وكملوا رحلتكممهما كانت التبعات يعني لو تستأجر شاص للخيام أو جيب للمشوار وطرى على بالي صدر هالبيت اللي ماني متأكد من صحته يقول (خوينا مانتلبه بالمشاريه)
وأكرر ان الخوي خوي والا عيال الناس واجد
ننتظر بقية الآراء

كلامك صحيح في وجوب معرفة الشخص لخوياه .. لكن تدري يا خوك الواحد ما تبخصه إلا إذا سافرت وياه
وبعض الربع ما دامه حول الديره فهو هاب ريح وطاير بالعجة :) وكل شوي يا الله يالربع خلونا نطلع لنا طلعة طيبة ننسى فيها القصور واللي سكنها

وعندما يأتي الصملي وتخطط وتتعب انت وخوياك إلا تلقاه التفت وراه وقام يمهمه
يالربع انتم ملزمين على التطويل؟؟ .. والا يالربع وش لنا في التعب ؟؟

هنا تكتشف صاحبك .. هنا الموقف الذي أعنيه وخويي هذا بعد اكتشافي لطبعه تحرصت من دعوته مرة أخرى إلا إذا كان المشوار حول الازفلت أو دون بعد :) :)

أما بالنسبة للخويا شرواكم اللي عارفهم وعارف طبايعهم ومجربهم .. فإن أحسست أن أحدهم أصبح في خاطره شيء من الرحلة فإني أكون الباديء في إزالة الحرج عنه لأنه سيف مجرب ولا خير فينا إن لم نقدر حرجه منا

شاكر لك كل الشكر

[راعي الهـــدد]

الأخ الغالي راعي الكحيلة



اووووووه انت فتحت المواجع اي والله ....



وش رايك برجال قانصين وهو معنا وجينا مطلاع كايد كايد حيل ...

الى درجة أن الأخوان ينزلون تحت الربع
يردفون له بالحصى كل مارقى يردفون له وهاه
ويالله السلامة



المهم ابو مناحي رفيقي على الباب الأيمن
شاف الدعوى مابه الا حمار شكمان ...
واردف لاتردف ... وانتبه ابو حمد ترى الموتر بدى يميل شوي ... والثاني بأعلى صوته ... عدل عدل ... عدل الموتر



وهو يلتفت علي ويقول ... ابو حمد قلت هاه اصبر مانيب بحالك خل نرقي الموتر اول خل العيارة بعدينا ...



ابو حمد ... ابو حمد ... والتفت عليه واشوف
الا والله دمعته يوم خرت ... يالله بالي فيه خير
وش فيك ابو مناحي .... ابو حمد تكفى مابي
المشاكل ... وش مشاكله يابن الحلال وشفيك
سلامات تكفى قل لي ... وطلعنا الموتر ورقينا
الظهره



واوقف الموتر على طول



وشفيك ابو مناحي ابوحمد ارجوك ابي ارجع للديرة وتهل عبرته ... لاحول .... طيب طيب ابشر


صبرك علي ...


واروح لباقي الربع وابين لهم الوضع بصورة مغايره ... من اجل سلامة الرجال من النقد او انه بعد يجيه كلام وتهزيء ...



المهم بعد يوم رجعناه .... وراحت الأيام
ومشت ... وجاء يوم وقابلته وبدى يتعذر مني
ويقول وش الي صابه ذاك الليل ... قلت وش
عذرك .... قال بالحرف الواحد اي والله ولا
ازل عليكم .... ((( يابو حمد انت داري ان
الكفر لو زل يمين او يسار انا بنموت .... قلت
طيب وبعدين ... قال انت داري اني (( الله
يكرمكم )) أني سويتها على نفسي وبلت في
سروالي ... ))) الله يكرمكم والقارئين جميعاً



قلت ايه معذور معذور اقولها وانا ميت قهر
كيف اني رافقة هالرخمة .... ومشيت من
عنده ... وعديته من عرض خلق الله ولا نشته
بكلمه ... وخليته وحلفت بالله ما اصحبه ولا يصحبني في حل او ترحال .....




الغريب في الأمر ياحبيبنا راعي الكحيلة ... ليس انه فعل هذا كله .... وليس انه بال في
سرواله من الخوف .... وليس انه التفت
ورآه .....



لاوالله الغريب انه يدقدق على جوالي الى فتره قريبة وين مقناصنا السبوع الجاي ..... ؟؟؟


ههههههههههههههههههههههههههههههههه


هذي الي مالها طب ولا لها علاج .....
استرجعت وحمدت الله .... وقلت الله ينسيه
رقمي ويكفيني شره ....







قصة أخرى مغايره ....




مرة من المرات كنا طالعين ايام عيد الفطر عام 1425هـ


ومحملين اغراضنا وكل شي وواحد من الربع
حالف يجيب ذبيحته معه وجاب ذبيحتين


وناوين نفلها ونوسع الصدر المهم وصلنا مكانا
ودقينا الخيمة



وبعد طلوع شمس اليوم الثاني قال واحد ابي
امشي .... خير ابو سعد .... والله ودي
امشي .... لا يقولها وبوجه شين ....




لاحول وش السالفة ....؟؟؟ واوصي عليه ولد عمه ... قلت قل له يسوي خير يصبر لو الى
بكره خلاص ماراح نجلس على اتفقنا 5 ايام



... ويحاول فيه مافيه فايده .... لاحول ... المهم
شغل موتره يبيه يسخن .... وقبل مايمشي يوم
انسحب الثاني ... وش عذرك قال باخويه
لايضيع .... يابن الحلال ماهوب ضايع هو الي
دالنا على المكان وين يضيع دور غيرها تكفى
يابو مطلق اجلس .... وعقب حبة خشوم
جلس ....



ابو سعد مشى .... دققنا في الأمر وسالنا منا
ومنا .... ولم يهدأ لي بال .... وبحثت الرجل
بعد مجيئنا من البر .... وجدت أن الرجل له
اربعين يوم عن اهله ... (( منفس المره وتوها طالعه من النفاس وانتو بكرامه )) وموقت انه
يطلع معنا يوم وبكره يروح يآخذهم ....





عيب والله الي يصير



ياناس عيب والله ...




ذليت ربعك .... وحست طلعتهم .... ورجعت
قبل الحل .... وانحاسو عقبك .... لعشان
ويش ....



ما اقول الا خير





ابو سعد رحمه الله توفي قبل اشهر اسأل الله ان
يغفر له ويرحمه ويتوب علي وعليه


يعلم الله كم كنت احبه رحمه الله


ولعل المآخوذ كان مشغله ومعذور الله يجعله
الحين يتندح مع الحور آمين ياكريم



ياناس هلت عبرتي .... ياناس هلت عبرتي ....

ياناس هلت عبرتي وفاض كل مكنون .... يوم الفراق الي به القلب محتاس



الله يرحمك يابو سعد ...


ياراعي الكحيلة ... جيت ابي اطرح
ماعندي .... وابي اعطي الربع بعض المواقف
وجاء موقف ابو سعد عارض وتسببت علي
بالبكا والله المستعان ...


رحكم الله يابو سعد





يا أخوان الشاهد



تكفون لا احد يلتفت ورآه


وخل مشيتك مشيت ذيب لايهاب


وارفع راس خويك



وخلك معه في الزينه والشينه



ولا تعطيه قفاك



وافرح لفرحه



واسعد لسعده



وأن اعسره شي من الصوادف فشله بيمينك يامال الشحم



اخوي راعي الكحيلة المواقف كثير



وش رايك اوقف او بعد


ترآك غالي حيل جعلك تسلم


واشكر لك هذا الموضوع القيّم




وخذ في راسك ان اكثر من يرجع للديرة ويفركش ربعه انه من النوع الي

يعشق اللحاف حدر المكيف والباقي مشفر

والله انها غبنه يرجعك رفيقك لعشان هالأمور





محبك ابو حمد

[عاشق VXR]

السلام عليكم ورحمة الله وبركاته .

رحمك الله يا ابو سعد واسكنك فسيح جناته .. اللهم اغفر له وارحمه .. وعافه واعف عنه .. واكرم نزله .. ووسع مدخله .. واسقه بالماء والثلج والبرد .. ونقه من الخطايا كما ينقى الثوب الابيض من الدنس .. اللهم ابدله داراً خيراً من داره .. واهلاً خيراً من اهله ..وجميع موتى المسلمين .

و ثناء جماعة من المسلمين عليه بالخير سبب لدخوله الجنه - بإذن الله -
لحديث أنس رضي الله عنه قال : مرّوا بجنازة فأثنوا عليها خيرا ً،
فقال النبي صلى الله عليه وسلم : { وجبت } ثم مرّوا بأخرى فأثنوا عليها شراً ، فقال النبي صلى الله عليه وسلم :{ وجبت }
فقال عمر بن الخطاب رضي الله عنه ما وجبت ؟
فقال : { هذا أثنيتم عليه خيراً، فوجبت له الجنة ،وهذا أثنيتم عليه شراً فوجبت له النار، أنتم شهداء الله في أرضه} [ أخرجاه ].


------------------------------------------------------
اخي العزيز / راعي الكحيلة ..
اشكرك على طرحك لهذا الموضوع الجميل والممتع ,,, ولا تحرمنا من ابداعك القادم .
وانا صراحة حصلت لي قصة مشابهة للموضوع .. وقد سبق ان وضعت موضوع عنها .. ووجه الشبه فيها هو الرجوع من الرحلة فقط ..
ولله الحمد كلنا التفتنا الى الوراء مساندتاً لصاحبنا ...

وهذا رابط الموضوع :
http://www.mekshat.com/vb/showthread.php?t=77457


اكرر شكري ،،

[ميراج]

أثر شغلتكم شغله ياالمكشاتيين

إذا هون الخوى قبل بيوم ولا يومين مافيه مشكله إما إذا هون فى وقت الممشى ما على منه ماشى ماشى الله لايعوق بشر

ولاكن المشكله اللى يهون فى البر هذا ما قد مر على ولا تخاويت أنا وياه جعله بعيد

مره من المرات كنت مربع فى الصمان بلحلال عام 1415ه وكان فيه ربع وزملاء فى العمل ودهم يسيرون على

ووعدتهم على نهاية طريق الصمان يوم الخميس الصباح وجيتهم على الوعد وأخذتهم إلى الخيام عند الحلال والمسافه

50 كيلو وكانو 5 أشخاص على سياره وحده المهم وصلنا بعدالظهر والطباخ مجهز الغداء وتغدينا وتمشو فى الفياض

وكان ربيع ذيك السنه طيب مره المهم أنبصطو مره يوم عودنا للخيام قبل المغرب وكنا ملقطين فقع والنار مشبوبه والقهوه

جاهزه وفلة الحجاج فى جو زين الزملاء مستانسين مره قال اكبر واحد فيهم عمره حول 55 سنه خلونا نمشى ترى

المسافه بعيده قالو له الربع خلنا نمرح حنا معلمينك وش طرى عليك قال والله ما اقدر امرح لازم نمشى المهم مشو

وهم متنكدين خرب عليهم الأناسه وكنت فى إجازه يوم رجعت ولا الزملاء يعلقون عليه أثره تو متزوج على زوجه

ثانيه وعلشان كذا رجعهم مع العلم انهم معلمينه ان الرجعه يوم الجمعه فى الليل

مشكور يا بو طلال

تحياتى للجميع

[ولد ويبار]

السلام عليكم ورحمة الله وبركاته هون معنا احد الربع مخاوينا للشر قية الله يهديه لا ومتى,,,,,,,,,,يوم الخميييييييييس والله وركبناه القطار وتسهل الله يحفظههههههههههههههه

[عروق الدهنا]

اخوي راع الكحيله
اشكرك على الطرح الجميل
اللي يلتفتون ورا هذولا مشكله وكنت اعاني من الاشكلا ذي يووم كنت صغير قبال السياره كنت انا اللي اجزمهم وارتب امور الكشته
واذا جا يوم الاربعاء الظهر بعد المدرسه يقول راعي السياره هونا عدل بدل يقول ابي اودي ماما لسوق او شي من هالقبيل
لكن الحين ولله الحمد الربع لويحصل لهم يقعدون بالمقناص شهر مامن خلاف

اخوي راعي الهدد
اضحكتني في القصه الاولى الله يضحك سنك قل امين يابوحمد
والله يغفر لبوسعد ويسكنه فسيح جناته ويجعله بالفردوس الاعلى وموتا المسلمين جميعا

بعدين يابوحمد انتبه لكلامك
ترانا عزوبيه

والسلام ختام

[أسير مكشات]

اول شي يعطيك العافيه على الموضوع

ثاني شي يكون هناك شرط من شروط الرحله وهو عدم التهوين وإذا هون يكون هناك شرط جزائي وهو ان يترك الموتر
والشرط الثاني ان يتم تقفيل جميع وسائل الأتصال
وبذالك تكون الرحله (( ممتازه ))
على الكيف بالعربي

[جي اكس أر 3]

السلام عليكم
مرحبأ اخي العزيز راعي الكحيله
اولا اشكرك علي طرح هذا الموظوع الجميل والممتع لكي تعرف من تصحبه في رحله القنص الحمد الله لم اتعرض لموقف ما ولاكن خروجي الي البر مع مجموعه متجانسه منذو وقت طويل لا تزيد 4 اشخاص ،
شكرأ لك اخي العزيز راعي الهدد ابو حمد علي هذه القصص الشيقه ومعرفه من تصحبه ،،،،،
تقبل تحياتي

[sasasasas]

المواقف كثيره بس من ناحيتي

اذا كنت وسعت صدري وحصل امر طارء فهو لنفسي

يعني احاول بشتى الطرق اني اصرف نفسي بدون ما اخرب الطلعه

لخوياي

تحياتي لك اخوي على الموضوع الرائع

[راع الكحيلة]

بو حمد راعي الهدد

وشبلاكم فضختوا قليب خويكم وروعتوه روعة ما اظنه بينساها أبد
والدليل ... الدمعة اللي زلت وملحقاتها :)

أثاريكم متوحشين يا حقين القنص :)

اللي محيرني كيف بعد ها الموقف يطلب انه يخاويكم ؟؟ :) :)

أسعد الله أيامك فقد اسعدتنا بهذه الطرفة

أما ابو سعد الله يرحمه ويسكنه الجنة و امواتنا واموات المسلمين

فلا تعليق عليه ... تلطفا لذكراه العزيزة عليك

تقول المواقف كثيرة ؟؟

أقول الموضوع موضوعك ... فهات ما عندك من مواقف طريفة أو مأساوية :)

شاكر لك هذه المساهمة الظريفة

[راع الكحيلة]

عاشق Vxr

حياك الله أخي الكريم

وإن كنتم كلكم إلتفتم للوراء من أجل خاطر خويكم .. فهذه لا تدل إلا على الشهامة

والتي يتحلّى بها الرجاجيل شرواك وشروى الحاضرين

[راع الكحيلة]

مــــيــــراج
الحبيب ابو طارق

أما سالفة خويكم هذي محيرة بالحيل :)

إن كانوا الربع مبلغينه مثل ما قلت ومأكدين له الخبر عن نية المراح .. فكل اللوم على راسه

أما إن كانوا فاجأوه بالنية .... فما له لايم يا خوك.

شاكر لك يا بو طارق مرورك الكريم

[ربيع الكشته]

الكشته بالنسبه لي غرام وهيام وحب متجذر في شرايين القلب
احلم بها في العمل وفي البيت واوسع صدري بذكرها خاصه اذا تم تحديد موعد الاقلاع
ولا عندي استعداد اتراجع الا من شيء يستحق مرض او غيره
وربعي بالمثل نفس الشعور .... ولو تحصل لي يوم اعتقد اربط الملتفت لوراه في ذيل اقرب ناقه
ههههههههه موضوع جميل .

[omiran]

ايها الاحبة السلام عليكم ورحمة الله وبركاته
اود ان ادلو بدلوي في هذا الموضوع بقصه قديمة حصلت لنا من احد الربع وهي في عام 1405هـ وبالتحديد في اجازة رمضان اي يوم 25رمضان
وهي اننا متفقين بالرحله الى ابها ومن ثم الى الطائف ومكه لاداء العمرة وكنا مرتبين مع الربع ومعنا سيارتين المهم محملين العفش و نمرعلى واحد وحمل فراشه فاتى والده وخرج علينا واعتذر منا ولم يوافق على ذهاب ابنه معنا !-(توفي صاحبنا رحمة الله عليه في حوالي عام 1409هـ) رحمة الله رحمة واسعة وتجاوز عنا وعنه وعن جميع المسلمين - واما الاخر من الربع فعندما مرينا عليه ونرن الجرس وبعد حوالي ربع ساعه انتظار خرج علينا اخيه الاصغر منه ويقول : اخوي يقول انا اسف مانيب رايح ، وبعدها توكلنا على الله ورحنا اربعتنا على سيارتين !! ،ومن تعليقنا على بعض القصص والطرائف سمينا هاك السنة سنة انا اسف اذا ذكرنا اي قصه قريبه من ذلك التاريخ او القصة او اذا اردنا ان نطلع الى اي رحلة نسأله والا انا اسف؟؟ ههههههههههههه
وصار تندر بهالموقف


موضوعي : رحلة الى بلاد الشاي بالصور (http://www.mekshat.com/vb/showthread.php?t=81239&page=3&pp=15)



http://cgibin.erols.com/cgi-bin/Count.cgi?df=omiran &ft=6&tr=N&dd=B&md=8



http://7hasas.jeeran.com/22.gif

[راع الكحيلة]

ولد ويبار

حياك الله أخي الكريم

وزين إن حولكم القطار والا كان جبركم توصلونه :)

[راع الكحيلة]

عروق الدهنا

هذي والله المشكلة .. لا صار اللي يهون له مكانة استراتيجية في الرحلة :)

مثل صاحبكم ذاك الوقت ... راعي الموتر

ومن غير الموتر ما به كشتة

شاكر لك المداخلة أخي الحبيب

[الرهدن]

موضوع رائع عن الكديش

وتراهم واجد ,, والتجارب معهم لاتحصى ولكني عجاز كتابة وملول

وقولت هونت وإلا نسيت عندي شغل أقرب من عصى العمى عند بعض ناس00

لكن !!

وشوله تطلع بواحد ماتعرفه زين أو يعرفه واحد معك معرفة صح00

الشاهد :

لاتطلع بواحد تجربه بالبر وبس 0



.

[البدر900]

عزالله انك قلبت المواجع ياراعي الكحيله وانا اقول ان المقناص على اخوياك اللي معك وصدق من قال الرفيق قبل الطريق وانا حصلي هالموقف اثناء الموسم الاخير كنت قانص القميري من الفجر وكنت الحالي وبعد ماتغديت فالبر وشلت اغراضي راجع للبيت واثناء الطريق وقبل ماادخل البلد توقفت علشان اعبي بانزين واذا بزميل لي قديم رئاني فسلمنا على بعض وهاه وش الاخبار وش العلوم مثل ماانتم خابرين وسالني من وين انت جاي علمته اني جاي من مقناص قميري والله ويطير فيني ليش ماتعلمني اذا بغيت تروح انا اهوى البر والطلعات
(((والله يااخوان اني قلتله وبكل صراحه (( انت ماتقطع الفرجه )) قال اللي مايقطع الفرجه انت قلت اجل الخميس خللك جاهز من يوم تصلي الفجر وانت عندي قال تم المهم الرجال جاء في الموعد ومشينا سالني وين الوجهه قلت قريب مكان فيه طلح علشان القميري واذا مالقينا قميري قلبناه ضبان اشوى انه مومقناص ثاني والا علوم المهم المسافه 250كلم تقريبا والله يااخوان تونا واصلين المنطقه يوم رمينا ثاني ضب الا خويي يوم ةتغير وجه وش فيك ياولد قال نبي نرجع ليش عسا ماشر قال زهقت وشو انت تمزح والا صادق قال بس رجعنا قلت انا معلمك انك ماتقطع الفرجه قسم بالله اني ولعت لكن قلت عسى بالامر خيره المهم يوم جت الساعه وحده حنا في البيت وادخل على الوالد منصفق وجهي قال خير انت مافنصت اليوم قلت الا قال ليش رجعت بالسرعه ذي عسى ماشر والله يااخوان ان ابوي ماصدق انا واصلين ذيك الديره بس قال لي كلمه واشهد انه صادق واشهد نها كلمة حق (((قال ياولدي المقناص يبيله رجاجيل )))) قلت اشهد انك صادق وسلامتكم وآسف على الاطاله

[ابوهتون]

السلام عليكم...العام طلعنا للصمان وكنا في ثلاث سيارات احد الزملاء قال لامبرنا ممكن بكره الخميس ارجع للرياض..قال اميرنا خير ان شاء الله(رد عليه ان رحيمه ممكن يسوي عشاء لاهله) قال(خير ان شاء الله)...يوم صلينا الفجر صاحبنا يدور جواله...تحت الفراش ..يمين.. يسار ...ما هوفيه صاح فينا الجوال ضاع ...ردنا عليه بتلقاه بعدين...فعلا لقيناه(متـــى..الجمعه بعد العصر في شنظته)...وسلامتكم...

[راع الكحيلة]

الموضوع قديم لكنه جديد متجدد ما دام فيه من نوعية اللي يلتفت وراه في آخر لحظة

أشكر كل من ساهم ونتمنى المزيد من تجارب الإخوة خاصة من سجل حديثا معنا في المنتدى

كل الحب والتقدير

[صبي غلباء]

السلام على الجميع
اما ذا العالم اللي يلتفتون وراء واجد
مرررررره كنا في الصمان وربيع وفلت حجاج وكنا رايحين على موتر واحد كنا اربعه وخيمه وعلوم سنعه واحد من الشباب ما قد راح معنا بعيد نعرفه لكن في الديررررره المهم الرجال تغيرت اخلاقه دايم ساكت ويتستدح ويركب السياره وينزل حقيقه اقلقنا حتى واحد من الشباب قال هذا وش فيه تقول جعري ما غير يتسدح ولا يشتغل ونفسا شينه بعد صبرنا عليه وتناسيناه صراحه قلنا يمكن ندم انه خاوانا
رجعنا الجمعه يمكن دخلنا الرياض بعد العشاء وتفرقنا
يوم السبت الصباح عرفنا ان الرجل سوى عمليه حصوووه في الكلى زرنا الرجل مرقد وسالناه كيف ما فيك خلاف؟؟؟؟ قال من وصلونا للبر وهو كان يعاني من مغص كلوي شديد لا يمكن يتحمله رجل عادي
طيب ليش ما قلت لنا؟ قال =فلان مودي عياله وفلان تارك ربع له ومخاوينا ما ابي اخرب عليكم واسف يمكن ما كنت في جووكم اسمحولي
عز الله انه خوووي معنا الكلمه ومن ذاك اليوم الي اليوم وكلنا الثلاثه نتسابق على اخووووة هالرجال
وتعلمنا ما ننقد احد حتى نعرف السبب الحقيقي لعذر الانسان في سلوك معين حتى في غير المكاشيت
ونبي نسمع من الشباب

[* Storm *]

موضوع ممتاز اخوي الكحيلة

والمواقف هذي كثيرة تحصل وبعضها فيها خيره

لاصار السالفه فيها شي مو بزين مثل الوفاة نرجع كلنا اما نترك صديقنا ضايق صدره

لعل وعسى الله يعوضنا بخير منها

اما ان كان سبب مشاغل ممكن يروح لحاله وان يبي يرجعنا لعلها خيره

ملاحظة أخواني : الموضوع لذكر طيب وطلب رأي فلا يجوز اننا نذكر اخواننا في ما

لايحب .. البعض كاتب رخمة والثاني عله .. قد يكون هذا الكلام غيبة لأخوك ..

فياليت من الجميع ان يذكروا أخوانهم بالخــير ليكون المووضوع صالح :good:

[عبد الله 99]

هاذا اشين شي يعكر الرحله عليك

اذكر قبل سنتين احد الأصدقاء ناوين نطلع السبت الفجر يوم صلينا الفجر ويدق الرجال علينا والله ما اقدر اطلع ان خالي توفى و انا ملزوم اني اجلس مع الوالده و الصلاة عليه الظهر اخرنا ممشانا صلينا عليه الله يرحمه عاد حنا مزنوقين الحين ما يمدي احد يروح للمزرعه يجيب الخيام كنا متكلين ع الرجال بس ما كتب الله انه يجي شوي الا ويرن جوال واحد من الربع اثر خوينا الي متوفي خاله يدق رد عليه يا ابو فلان و الرجال يحلف قال موتري موقف عن باب بيتي كامل مكمل و المفتاح مع السواق تبونه يجيب لكم الموتر ولا تجون تاخذونه والله و الرجال ملزم وحالف يمين انه ان ما جينا ناخذ الموتر انه يترك اهله و يخاوينا و الحمد لله عدت على خير و سلكة امورنا والله يغفر لنا و له ولخاله


هذا الرجال الي والله كلن يتمنى مخاواته و الرجال ونعم شرواكم و الحمد لله ع السلامه والله الرجال ما قصر

و دايم اقوله انا احرص على خويك اما تخاوي ذيب ولا دجاجه مشكلة البعض ما تعرف عنه الا في الطلعه و صعبه اترك الرجال و السبب واحد ما يستاهل


تقبل مروري

[راع الكحيلة]

السلام على الجميع
اما ذا العالم اللي يلتفتون وراء واجد
مرررررره كنا في الصمان وربيع وفلت حجاج وكنا رايحين على موتر واحد كنا اربعه وخيمه وعلوم سنعه واحد من الشباب ما قد راح معنا بعيد نعرفه لكن في الديررررره المهم الرجال تغيرت اخلاقه دايم ساكت ويتستدح ويركب السياره وينزل حقيقه اقلقنا حتى واحد من الشباب قال هذا وش فيه تقول جعري ما غير يتسدح ولا يشتغل ونفسا شينه بعد صبرنا عليه وتناسيناه صراحه قلنا يمكن ندم انه خاوانا
رجعنا الجمعه يمكن دخلنا الرياض بعد العشاء وتفرقنا
يوم السبت الصباح عرفنا ان الرجل سوى عمليه حصوووه في الكلى زرنا الرجل مرقد وسالناه كيف ما فيك خلاف؟؟؟؟ قال من وصلونا للبر وهو كان يعاني من مغص كلوي شديد لا يمكن يتحمله رجل عادي
طيب ليش ما قلت لنا؟ قال =فلان مودي عياله وفلان تارك ربع له ومخاوينا ما ابي اخرب عليكم واسف يمكن ما كنت في جووكم اسمحولي
عز الله انه خوووي معنا الكلمه ومن ذاك اليوم الي اليوم وكلنا الثلاثه نتسابق على اخووووة هالرجال
وتعلمنا ما ننقد احد حتى نعرف السبب الحقيقي لعذر الانسان في سلوك معين حتى في غير المكاشيت
ونبي نسمع من الشباب

الله يجزاك خير .. طرحت لنا نقطة مهمة جدا أخي الحبيب

وسلم على السنافي خويك وقل له ترى والله إن بعض الحيا مهوب في محله ..

تدري ليه يا صبي غلبا ؟؟
لأن وش خانة الرفيق العزيز شرواك أنت وربعك إذا ما أبوح لكم بشي يضرني ويمكن يتلف علي كليتي .

الحيا يجمّل كل شي والحياء من صفات المؤمنين
لكن موضوع الكشتة كان أسهل وأبسط من إنه يعرض حياته للخطر والسبب الخوف من النقادة .. ولا أظن أحد ينقد على خويّه المريض

أكرر شكري على إضافتك المفيدة

[راع الكحيلة]

موضوع ممتاز اخوي الكحيلة



والمواقف هذي كثيرة تحصل وبعضها فيها خيره


لاصار السالفه فيها شي مو بزين مثل الوفاة نرجع كلنا اما نترك صديقنا ضايق صدره


لعل وعسى الله يعوضنا بخير منها


اما ان كان سبب مشاغل ممكن يروح لحاله وان يبي يرجعنا لعلها خيره


ملاحظة أخواني : الموضوع لذكر طيب وطلب رأي فلا يجوز اننا نذكر اخواننا في ما


لايحب .. البعض كاتب رخمة والثاني عله .. قد يكون هذا الكلام غيبة لأخوك ..


فياليت من الجميع ان يذكروا أخوانهم بالخــير ليكون المووضوع صالح :good:


بارك الله فيك

كلام طيب..

[قناص الهمله]

الله يعطيك العافيه

[wrs3975]

هناك مواضيع يستمر بريقها على الرغم من قدمها ..أشكرك أخي راعي الكحيله على هذا الموضوع الجميل .. وإن سمحت لي بإضافة بسيطة على ماتفضلت به .. هذا الشخص اللي ( إلتفت ورا) لم يكن في الأساس على استعداد للذهاب وكان لديه نوع من التردد ...أكرر شكري وتقديري لك وللجميع

[محمد-الرس]

احولت اعيوني وانا اقرى القصص والمواقف المفيدة

[العاذر]

شكرا لصاحب الموضوع
صاحب الخبره وراعي البر ما يمكن يختاااار أحد متردد او يلتفت وراه
او معرفتك به سطحية
بعضهم طقها والحقها ما يفرق ..
والشئ الخارج عن الإرادة لا خلاف فيه..
والمسألة مهوب بطلع وبس وتعال يا فلان وعلان وركبنا هنا تطلع العلوووووووووووم

نصيحة لا تطلع الا مع من تعرفهم جيدا لو شخص واااااااااحد خير من مجموعة فيها واحد يلتفت وراه والسلااااااااااااام

[تلميذ الصحراء]

قال علي بن أبي طالب رضي الله عنه
[إلتمس لأخيك 100عذر فإذا لم تجد له عذر فقل لعل له عذر لا أعرفه]
هذي الأخوة ولا بلاش
أخوة الدين
ياسلام

[كحيلان تميم]

هو شف انت من الاساس قايلن لك ترا بنقعد بالمكان الفلاني من يوم كذا الى كذا .. انت موافق ماعندك مشاكل ..؟؟ اذا قال ايه خلاص تم .. لاكن تقول ايه ولاطلعوا الربع تقول برجع ..!! هنا المشكلة كذا بصراحه اعتبره رجال ماهو كفو ورخمه ..

خلك قد كلامك اذا بتطلع قل ايه وكن قدها ماتقدر قل والله ماقدر ولا احد بيشره عليك او ليش ماجيت او رجعت ..


لاكن قد تطري بعض الضروف التي لاتحتمل التاخير مثل وفاه شخص عزيز او اصيب مرض او او او عذر فعلا يكون معاه حق حتى يمكن تقوله خذ موتري ولاخلصت شغلتك ارجع لي او انت الي توديه بنفسك وتساعده ..

اما تمسك كذا لا والله برجع لو يسويها معي واحد بقوله طس واحذف رقمي ولا اعرفك ولا تعرفن ماتشرف بالاشكال ذي ..!!


قبل رمضان هذي السنة تقريبا قبل شهرين كنت متواعد مع ولد خالي رفيق دربي وكبري ومع بعض عايشين من يوم حنى صغار ..

متواعدين نروح للشرقية لنا 3 اسابيع وكل ماجينا بنروح تتاجل بسبب ضروفي وضروفه .. المهم رحنا على موترة المهم .. انا الله بلاني بالام شديدة وموجعه جدا بالبطن ولا ادري وش بلاي .. والله يكرمكم يطلع مني دم وفيني اسهال .. فقبل الروحه مريت صيدليه وخذيت مسهل .. المهم سافرنا وكان التعب والشقى بعينه .. طول الطريق والاسهال لاعب فيني وعرض علي يوديني لمستشفى ورفضت قلت ان شاء الله الامر بسيط و ولد خالي كان متعاون حتى يوم جينا ننزل العزبة عند البحر يهوشني اذا جيت اساعده يقولي انت ماتقدر وفعلا طول الرحله وانا منسدح ومتهبذل بهذله ولا ودي اقوله نرجع انكد عليه والحمدلله كان متفهم .. الحمدلله رجعنا بعد يومين زي ماخططنا و اول مادخلت البيت كان ليله رمضان وهي الدخله .. طحت اعلى الفراش مقدر اتحرك والام فضيعه جدا جدا وصرت لااستطيع مفارقه الفراش الا لدورة المياه الله يكرمكم بسبب الاسهال الشديد .. وبصعوبه رحت للمستشفى وبعد فحص ومنظار طلع عندي التهاب حاد وتقرحي بالقولون والى الان اعاني منه من اول رمضان الى الان .. لاكن اخذت علاجات وخف كثير معي و الحمدلله انا حاليا مرتاح وخف كثير والحمدلله على قضاءة وقدرة .. وفعلا اذا تبي تعرف الصديق سافر معه واكتشفت انه رجال .. الحمدلله ..