نبي طريقة طبخ الضبان لاهنتم

[هاوي مقناص]

السلام عليكم ورحمة الله وبركاته

عرفنا واكلنا جميع الطيور اللي حللها لنا الله

بس الضبان كيف طبخها واكلها

لاني قبل كم يوم صدت ضب
وفتحت بطنه وطلعت اللي بمعدته كلها حسب صور صيد بعض الاعضاء

اللي بمكشات بس كيف الطبخه راحت عن بالي

نبي لاهنتم واللي عنده خبره فيهن يعلمنا جزاكم الله خير .

ودمتم .

هاوي مقناص

[أبرق الشقيقة]

السلام عليكم وحمة الله وبركاته

هلا اخوي هاوي مقناص

بالنسبه لطبخ الضب بقولك الي متبع مع عامة الناس وهي بسم الله
اول شي اقطع الراس والأيدين والرجول وشب علي القدر ونزل الضب وخله بالماء يطبخ اقل شي 10 دقايق طبعاً حسب كبر الضب كلما كبر الضب كلما زاد الوقت
المهم بعدين طلع اضب بعد ماينتهي الوقت الي قلت لك شل جلده طبعاً كل ماطول بالماء كل ما كان شيل الجلد سهل بعدين ياطويل العمر خلاص كشن عليه واطبخه عادي مثل اللحمه اذا بالكاتم 10 دقايق وفك البلف و كب الرز وبعدها بعد 10دقايق ثانيه واضرب بالخمس

فيه طريقة ثانيه ياخوي وهي الصلخ تصلخه بس تبي حريف ممهب نقص بك حشاك لكن صعبه شوي وميزته توفر عليك وقت ليت فيه احد يفيدنا عن صلخه وشكراً




أرجو أني افدتك لو بشي بسيط واسف علي الأطاله

أخوك / حمد ** أبرق الشقيقة **

[(خوي المقناص)]

كفى ووفى أخونى أبرق الشقيقة (http://www.mekshat.com/vb/member.php?u=6184):::
الصلخه بسيطه جدا أفتح بطنه ثم نضفه ثم أفصل الجلد عن اللحم وعاد أطبخه وسلامتكم

[هاوي مقناص]

السلام عليكم ورحمة الله وبركاته


الف شكر لكم علي هالمعلومه الطيبه

لاهنتم .


هاوي مقناص

[ابونايف الروقي]

السلام عليكم
فيه طريقة للطبخ من جد روعه انا مجربها ..
1- قطع الضبان وفصلها اليد لحال والرجل لحال والعكره لحال وافصل الظهر من الوسط طول وعرض ..
2- طلع الثرب (( الشحم )) الاصفر الي في جنوب الضب و شلخه بالسكين تشليخ ماهوب تقطيع عشان الحراره توصل داخله .. وطلع الكبد وتشيل المراره الي في الكبد (( كيس لونه اخضر شفاف )) وانتبه للمراراه لا تنفقع لانها لو انفقعت طلعت طعم مر في الاكل ..
3- حط الضبان بعد ما تغسلها في القدر الكاتم مع مويه وملح بدون اي شي ثاني فقط وكثر المويه شوي يعني لازم تغطي الضبان تغطيه كامله وتزود وخذ احتياط انها تبي تطول وهي تطبخ .
4- حط ((الثرب)) في القلايه مع اضافة الملح المطحون فقط لا زيت ولا اي شي وحطه على نار هاديه وحركه على النار لين يطلع منه زيت فرغ الزين كل دقيقتين في قدر صغير او اي شي ... كرر العمليه لين تحس ان الثرب نشف وصار لونه اسود وصغر حجمه ..ثم طلع الثرب وحط الكبد مكانه وحط عليها شوي زيت من زيت الضب وابدا قلب فيها لين تستوي ترا ما يبي لها وقت طويل .
5-جب قدر ثاني وحط نص الزيت الي طلع من الثرب في القدر وحط عليه بصل مقطع وزوده شوي وحط طماط بس لا تكثر الطماط وحط وفلفل وثوم وبهارات وملح وليمون اسود وقرفه وضبط به كشنه ثم زودها شويه مويه ..
6-انتظر الضبان في قدر الكاتم حوالي 20 دقيقه اذا هي صغار واذا هي كبار 30 دقيقه عشان كذا قلت لك في البدايه كثر مويه .. ثم طلعها .
7-اشخل المرقه حقت الضبان وصب المرقه في القدر حق الرز .. يعني ربع القدر مويه عاديه مع الكشنه والباقي مرقة الضبان ..
8-صب الرز ...في القدر الي فيه المرقه والكشنه ..
9- شل القشر الي على الضب ..
10- اذا استوى الرز صب الزيت الي طلع من الثرب على الرز من فوق وهو بالقدر ثم انكبه حط الكبد على الاطراف في الصحن والزيت الي معها ..



11- بالعافيه ..
//// ملاحظه لازم تكثر الملح شوي على الضبان في قدر الكاتم .. يعني ما تكثره مره .

[عبدلله السال]

وعزمنا لاتاكل لحالك

[ابونايف الروقي]

الاخ هاوي مقناص على الاقل شكرا للي شارك او شكرا للي مر على الموضوع ؟