فزعتكم يالصقارة(يموت الرجال مانخي)

[معشي الطير]

مساكم الله بالخير جميعا .
يالربع انا عندي طير من اطيب الطيور لاكن جتة ضربه في جناحه الايمن وديتة للمستشفى وخذوا له اشاعه وقالو عنده خلع في الجناح (من عند ثومه الجناح) وقالو ما نعالجة ابدا وبصراحه انتم عارفين وش موقف راعي الطير لما يصير له مثل هالموقف وخصوصا لما يكون الطير غالي بالنسبه لك .بصراحه انا قلت انشاء الله ان الاخوان في المنتدى راح يفيدوني خصوصا ان الطير يحرك جناحه ويرفعه لاكن لما يجلس على الوكر شوي ينهزع جناحه بشكل قوي .للمعلوميه الطير علفه طيب بالحيل ونفسيته مره زينه لاكن المشكلة في هالجناح...
ارجوا من الاخوان ان يفيدوني لو باي فيده .وابي اعرف هل المستشفي اللي بالشرقيه يقدر يعالجه او اي مستشفي داخل او خارج المملكه ,
وجزاكم الله عني خير الجزاء.
اخوكم :
احمد التميمي

[T U R K I 0 9 0]

والله صراحه مالي خبره بس بيجون النشاما شرواك ويعلمونك بالحل

واذا ماحد مر على موضوعك عندك اعضاء واجد لهم خبره ومنهم عضو اسمه المري ولا يهونون الباقين لان اللااحظ عليه كل اهتمام بالطيور ومشاكلها ودمتم سالمين

[معشي الطير]

مشكور اخوي تركي على مرورك .
يالربع كل واحد منكم يقول اي شي يحس انه يفيد ،

[T U R K I 0 9 0]

(http://www.kuwait25.com/falccon/sick6.html)



لقيت لك هذا بس مادري فيه شي عن الكسسسسسسسسسور

فيه طريقه رح للياهو واكتب علاج الصقور او كسور الصقور وان شالله بتلقى اللي تبي :)

[معشي الطير]

بيض الله وجهك اخوي تركي . والله ماقصرت وجعلها في موازين حسناتك,

[عـــرادي]

معشي الطير
ما تشوف شر لا انت ولا طيرك
وانشاءالله بسيطة انا عندي طير قبل كم سنه
صدم السلقه وانخلع جناحه حتى انه ما يقدر
يطير على الوكر وربطت الطير وعطيته حلب
وشب وقرنس الطير ولا فيه شي .
والله يشفي طيرك
عرادي

[الزاجل الازرق]

اخوي معشي الطير وينك انت الحين بالضبط حددلي موقعك وانشاء الله افيدك بالشي المناسب

اخوك ابودغيم

[صاروخ]

اللهم رب الناس اذهب الباس واشفة انت الشافي لا شفاء الا شفاءك
هذا اللى اقدر اساعدك فيه
ولا تيأس
علما انه يوجد بعض الصقارين عنده خبرة فى العلاج احسن من المستشفى
وفاله الخربه الموسم القادم ان شاء الله

[قناص الضواري]

أخوي أن كنت في الرياض أشور عليك عرضه على أبو عبدالله خالد العويدي منزله في حي الخليج بالرياض وترى ماله جوال

يتواجد غالباً في المنزل بعد المغرب

وعلى كل حال ريح الطير وعلفه زين مع حلب فتره وموميان فتره أكبر

وأسئل الله أن يشفي طيرك ويزيل هم كل مسلم

[أخو وضحة]

السلام عليكم ورحمة الله وبركاته
حيا الله معشي الطير أنا عندي علاج جربته بنفسي شخصيا مع وكري حق واحد من أخويانا لكن أبيك تتأكد هل هو كسر ولا خلع
إذا كان كسر أنصحك شفله زبون بلاشي تعب نفسك لكن إذاكان خلع كويس بس ينقصك شغلة وحدة تروح للعطار وتقول له عطني موميا أو ميميا شكلها مثل الصلصال ما هي لينة ولاهي قاسية لونها أسود وتأكد من أنها أصلية إيرانية.

طريقة العلاج سواء مكسور أومخلوع :-
تفرد جناح الطير وتحط فوق الجناح قطعة فلين مستقيمة وأيضا تحت الجناح بشرط تكون الفلينة قاسية بعض الشي مثل فلينة الخيار وتربطها
تذبح حمامة وتأخذ قلبها وتأخذ قطعة من الموميا تحطها في القلب وتعلف الطير ثنداوة الحمامة وبعدها تعطيها الطير تكرر هذا المنوال لمدة ثلاثة أسابيع بعدها تفك الظماد عن الطير وتستمر في علاجه بالموميا بعد فك الظماد أسبوع تقريبا
لا تنسى تخلي الطير مبرقع في الثلاثة الأسابيع عشان ما يفك الضماد
وشكراااااااااااااااااااا
وتقبل تحياتي

[معشي الطير]

حياكم اللة جميعا .
والله ماتتصورون قد ايش فرحت لما شفت سرعه هالردود والشي هذا يدل على طيبكم وبيض الله وجيهكم جميعا وجعلكم ماتشوفون شر لاانتم ولاطيوركم.
مع تحياتي لكم
Turk090i
عـــرادي
الزاجل الازرق
صاروخ
قناص الضواري
أخو وضحة
جزاكم الله خير الجزاء

[معشي الطير]

اخوي الزاجل الازرق انا في الرياض.

اخوي اخو وضحه : طيب ماتاثر على ريش الطير وخصوصا اننا في وقت قرناس .وكيف تمسك الفلينه في جناح الطير ؟

[عديم]

السلام عليكم
بسيطه انشالله خل الطير ياخذ راحته في المقيض واخذلك حب حلبه صره في قطعة خيش وارمه في حوض الماء وخله ينقع عطه اسبوع وترك وقبل ذا اخذلك ثلاث ايام وانت تصب على مكان الضربه ماء وملح دافي جدا وموميان في العلف كل 3 ايام ولا تكثر منه
انتبه لاتضايقه وتخليه يكفخ او تلف عليه شيء خله هو ابصر بعمره بس ساعده بها الادويه الشعبيه شب وموميان والعلف الحار فروخ حمام عليك به كل ماصغر الفايده اكثر والله يوفقك

[nasser_ali]

ود الطير عند فارس ويعطيك العلم...
المشكله ان فارس نفسه مسافر بس اللي مكانه دكاتره

[عطاب]

اخوي معشي الطير
السلام عليكم ورحمة الله وبركاته
أنا طيري رمحة ناقة وخلعة جناحه
ودييته للمستشفى وأخذو له أشعة
وقالو الجناح منخلع وقالوا أن عنده تضخم
بالكبد ولا يوجد له علاج والطير موات
خلهم عنك
عليك بالحلبة و الرشاد
والشب الاسود
والا وده العويدي أحسلك

[الزاجل الازرق]

يالغالي اسمع رح يم خالد العويد وبأذن الله راح يعالج طيرك وقبل ماتروح استفسر منه 0505220908

وذا مافاد عطني خبر راح اوصفلك كريم قوي جدا جدا تحطه على الطير لمدة 3 ايام وراح تشوف طيرك

عندي طير حول من مفوق وصفق بالارض وكان مستحيل ياقف على رجلينه ولكن بعد ذكر واحد من الاخوان الله يبارك فيه
ذكرلي هذا الكريم وراح ارسله لك اليوم اسمه ممتاز يالربع جدا للكسور والاتواء

الله يقومه بالسلامه وجعله يبسطك انشاء الله

اخوك ابودغيم

[alkongrs]

أذا كان واحد من الزملاك أو الزملا الوالد خبير با الطيور خلوة يقولك وما يشوف شر طيرك

[أخو وضحة]

لا ما تأثر على ريش الطير وصدقني ما نسيتك لأني قلت لواحد من الشيبان إلي لهم خبرة في علاج الطيور قلي خل جناح الطير مثل ما هو والله الله بالموميا والعصافير الصفر إلي تجي في المزارع يقول لي العصافير الصفر تقرنس الطير بسرعة وتحافظ على الريش وتعطيه لمعان وتشد ثومات الطيور وقال هذي كانوا الأولين يستعملونها مع الوكريلت صايدة الأرانب لأنه تعرف مقناص الأرانب ما هو سهل على الطير وشكرا........
تقبل تحياتي

[قناص حرب]

ياخوي ان كان انت في الرياض ود الطير للعويدي

وان شاء الله هو بيفيدك

[حمد الدوسري]

اخوي معشي الطير

في عيادة في البحرين خاصة للصقور ويمدحونها

لكن اذا انت من الرياض اشور عليك تدور القريب منك

[معشي الطير]

السلام عليكم ورحمة وبركاتة .
حياكم اللة جميعا وبيض الله وجيهكم واللة ماقصرتوا وكفيتوا ووفيتم .واللة ياتفاعلكم وردودكم على الموضوع عن الف طير .وعزالله ان مالشدايد غير اهلها.
مع تحيات اخوكم المخلص
احمد التميمي

[السرحان]

أسعد الله صباحك ,,,
مالك بعد الله سبحانه إلا فهد العوبل " النعيريه " متخصص في مثل هذه الامور والناس تاتيه من كل مكان
رحله وإن شاء الله راح تجد ضالتك عنده بعد الله
ولا أوصيك برّ والدينك ,,, أحلى تحيه

[سنجااار]

الله يعينك يابوناصر عندي صور مفصله لجناح الطير وكم الريش الي تقصه علشان يثتبت الجناح ما يتحرك ويختلف تجبيره بس ماعرفت اصغر حجمها . والله يوفق الجميع

[سنجااار]

الله يعينك يابوناصر عندي صور مفصله لجناح الطير وكم الريش الي تقصه علشان يثتبت الجناح ما يتحرك ويختلف تجبيره بس ماعرفت اصغر حجمها . والله يوفق الجميع

[سعد الاحمد]

الله يشفيه ويعافيه ان شاء الله وما يشوف شر ..

[ابو شموع]

السلام عليكم

[معشي الطير]

حياكم اللة جميعا .
اخوي (السرحان) اللة لا يهينك اذا عندك رقم (فهد العوبل) حتى انسق معة وارسل الطير يمة.
جعلة اللة في موازين حسناتك .