سؤال لمحبين الجير

[qtr5]

السلام عليكم ورحمة الله وبركاته






حبيبت استفسر من اخواني اللي لهم خبره في الجير

شعلوم الجير .. وهل فيه شي يميزه عن الحرار اللي نعرفها .. من حيث السرعه مثلا

السؤال بشكل عام .. يعني انا عارف كل طير يختلف عن الثاني .. بس ابي بشكل عام .هل فيه شي يميزه او يعذربه ؟؟


ثاني شي عن الجير الشاهين .. هل هو افضل من الشيهانه البحريه .. من حيث السرعه .. والطبع .

وكذلك بالنسبه لتبع الجير ..




وبغيت اعرف بشكل عام شنهي مميزات الجير وشنهي عيوبه ..


وشنهي افضل الاماكان اللي يباع فيها الجير في الامارات .. واذا ممكن عنوانها على الانترنت .. .. انا اسمع دايما عن فولكن سنتر ... هل هو الافضل او هناك افضل منه ؟


وجعلكم تسلمون مقدماً

[nasser_ali]

وعليكم السلام

انا مثلك متولع بالجير بس ليلحين ماحصل اني نقلت واحد بس انشاء الله النيه قويه الموسم الجاي
وهذا موقع قالكون سنتر http://www.nadalshibafalcons.com/arabic/
بس شكله ميت ولا يحدثونه باستمرار حتى ارقام التليفونات غلط!! بس انت اذا معزم كلم واحد اسمه سهبل يعطيك المفيد

وبالنسبه للمقارنه مع الوحوش....انا الصراحه ماشوف اي تكافؤ
خصوصا لجاك طير حر او شبهان خلوي بكر والا ثتو انا اشهد انه يسوى الجير كله !!!
وسلامتك

[مدرب الطير]

ماهن شي اقوى من الجير
((اسئل مجرب ولا تسئل خبير))

وتقبل مروري

[الوافي عزام]

اخوي الغالي

هناك فروق واضحه ومعروفه بين الحر الاصيل والجير

وهذه الفروق ليست حكر وانما معروفه وممكن تجي وممكن ماتجي بالطير

الجير ( دفش , يهد على اي شي ,يا كل الطيور اللي جنبه لا جاع , يجيك سبوق مره والا خايب , احجامه كبيره , اسعاره غاليه على الاش , متهور )

الحر الاصيل ( على اسمه اصيل , فاهم وراكد , مايهد الا على علم ثبات , فيه السبوق الفارط وفيه الردي , ذو حكمه وبعد نظر )

هذا اللي يحضرني الان وشكرا لك

[صلفيق]

السلام عليكم
الجير اذا فعل فعل بس نادر منها الي يفعل علي خبرتي جربت 2 كلها 18*18 ولا احلا من شكله وعينه ولا الحمام البري ما يروح عليه مثل طيران الشيهانه البحريه الفرخ بس عيبه الشجاعه ما كلها شجاعه نادر تلقا الشجاع الاول هديته علي اكثر من حبارى ولا كنه يعرفها وعلمته اكثر من مره بس سبحان الله ما نفع . الثاني والله حمد لله نجح بس بعد عناء تعلوم علي خمس حباري الله لا يوريك بس عوضنا الله طلع من ابدع ما يكون هدد علي كيفك ركاده والحمد لله

[بو غازي]

السلام عليكم ورحمه الله وبركاته
مرحبا اخوي قطر 5 وعسى الله يكتب خير الامور

بقولك شغله صارتلي انا يوم جيت اشتري كمبيوتر سألت الاشخاص ذوي الخبرة وش اشتري قالي واحد عليك بدل والثاني قالي لا عليك بتوشيبا والثالث قال لا عليك اتش بي والرابع قال لي لا عليك بايسر صراحة احترت بس كل الي سألت لهم قالولي نفس المواصفات اللهم فرق الشركات ولولا الاذواق لابارت السلع.
اما بالنسبة للجير فهو طير جيد لاكن الاصيل اجيد منه بالنسبة لي ترا هي توافيق سبحان الله
واسال الله ان يوفقك فيما يحب ويرضا.

[رفيق الطيبين]

السلام عليكم اخوي/

الجيرالبيور الوحش اسرع من الحر العادي ومن الشاهين بدون شك؟؟

لا اسباب منها.............

1- لقصر النهار وطول الليل في ديرته سيبيريا الله خلقه سريع لكي يتمكن من صيد فريسته

ويسمونه اكثر الصقاقير الشفاط ..لانه يعلق احباراها على طول مايخليهم يستمتعون شوي با الهدد

وتحصل اسعاره غاليه واكثر من يقناها الشيوخ لغلي اسعاره لانه سريع مره والناس تدور السبق والفعل لانهم ماهم مستعدين

يضحون لو بحبارى وحده لقلة الحباري عندنا....

اما با النسبه لجير الشاهين...
انتو اعلم بان الشاهين سبوق والجير اسبق فأذا اجتمعوا الله يستر منها اكيدانها في السبق ماشاءالله مايروح عليها شي

لاكن على حسب المزارع اللي تهجن ومن الناحيه ذي ماعندي خلفيه عن المزارع الزينه يمكن يفيدونك الاخوان في النقطه هذي اكثر مني؟؟


بس فيه سلبيات في الجير...

1- يصاب في اغلب الاحيان بالسومار او السده لثقل وزنه الزايد اللي يصل الى عشرين في عشرين

2-يصاب في اغلب الاحيان بدود الكبد

3-الحر ماتعود عليه اللي عندنا وقد يسبب له اقلاع


هذى اللي قدرة افيدك فيه وارجومنك
ومن اخواني المعذره اذا قصرة في شي ولاكن هذا حد علمي وانتو كلكم تكميل
وتقبلو تحيات اخووووكم/

رفيق الطيبين

[qtr5]

الله لا يهينكم ..