عطوني رايكم وانا متردد...................

[مدرب الطير]

يااخواني انا عندي طير طيب وفيه واحد من
اخوياي ولا امون عليه عنده غزال وكنت جالس عنده
وكان معي الطير وفجئه الطير بدا يكافخ مادري ليش
شلت الطير وكان يناظر الغزال وكان يطلب الغزال
والغزال بدا يخترش وهو في العشه فجى في بالي اني اهده على غزال فحبيت اخذ رايكم
ويليت تعطوني رايكم وبذات اللي جربو مثل الهدد
على غزال؟؟؟؟؟؟؟؟؟
بس عقب الربطه اذا الله وفقني
وشكررررررررررررررررررررررررررررررررررررررررا
وللي عنده غزال ريم ياليت يعطيني رقمه لني عجزت وانا ادور

[peregrine]

والله ماني عارف شنو اقلك لكن متاكد يبي الغزال يعني "طالعه" الي اعرفه صعب جدا على الطير صيد الغزال يعني طيرك لازم محجم جدا وسبوق وفعله نار حتى يقدر عهكذا مقناص و شفت مرة جير شاهين بيلس لصاحبه سمو شيخ حاكم دبي يصيد الغزال لكن الطير الله يخليه لصاحبه تقول اعقاب

موفق انشاءالله

تقبل مروري

[نايف قطر]

الطير يمكن طلب الغزال يبغيه وحاول انك تنسره من فوق غزال وتهده له وتشوف فعله وهاي راي وشكرأ

[بو غازي]

السلام عليكم ورحمه الله وبركاته
اخي العزيزمدرب الطير

انا من رأيي انك تشتريلة تويس صغير قبل لاتهده على غزال ويكون من تيوس الجبل الي تشابه الغزال وتخليه يذبحه بعدين جرب على الضبي وموفق انشالله.

[مدرب الطير]

الله يعطيكم العافيه على ردكم الجميل
والله انه رايك زين بو غازي


وتفبلو تحياتي

[الاشعل 316]

وانا خوك خذلك تيس عماني لان التيس العماني يشبه الغزال

وفك التيس وخل التيس يبعد عنك حوالي 500 متر وفرع لطير اذا الطير طلب التيس خل الطير يذبحه

وبعدين دورلك غزال وعلمه عليه

لاني انا عندي وكري من السودان معلمه على الغزال بس الغزال كان ميّت وعلفت الطير على الغزال

وبعدين خذيت الغزال وثبت رجليه على الرمل عشان يكون كنه واقف والحمد لله انجحت الخطه ويوم اني فرعت لطير

اطلبه على طول وجتك تمسح على الغزال هذا كل اللي سويته تراه في ساعتين

والحمدلله الطيره متعلمه على الغزال والى يومك عندي الطير

وتقبل تحيات

اخوك ابو سطام

[آبو غلآ]

تبغى شوري ؟
والله مهوب من كثر الغزلاان في المملكه عشان تروح تهد عليها
ريح نفسك دام طيرك يصيد الحباري وش تبي اكثر ؟
وموفق

[أبو رداد]

السلام عليكم ورحمة الله وبركاته

مايطلب الغزال الا الطير الشجاع بالفطره
واشور عليك تشتري خشف (اهل السلق اعرف وين تباع الخشوف)
وتعقل ايد ورجل متخالفات وتضع له نسير على رقبة الخشف
ومافي مشكله لو ربطت الخشف في حبل طويل شوي
وتكرر العمليه ثلاث اربع مرات وكل مره تبعد الخشف اكثر
ومن ثم تقصر على الطير وتفكله الخشف معقول ايد وحده وكذلك تنسره
وبعد ذلك تفك له الخشف وان صاده اذبح الخشف واطعمه عليه
وبعد فتره اشتري له غزال وهده
ان الله وفقك والطير صاد ارتفعت قيمت الطير ضعفين
ولاتستهين بالغزال ترى شي منهن كرهن الطيور في الدنيا
تراه يضارب وضربته تاذي الطير جدا
مع تمنياتي لك بالموفقيه والنجاح
والله يحفظ طيرك من عيون الحساد
والسلام

[قلب شاهين]

أخوي مدرب طير ممكن تقول وش نوع طيرك ،،

وكلا ابورداد سليم وجرب ،،

[إجذب]

مدرب الطير
لا تغامر بهذه الأشياء إطلاقا
لأن طيرك حجمه يعتبر صغير ولو كان من الطيور الوافيه من الأحرار مقاس 18*18
وبعدين تبي تبلش مع حلال خلق الله كل يوم وهو هاد على جفر
ومغير تبلش بمحاسبة اهل الحلال ههههه
لكن طيرك يعتبر شجاع وحرام تهده على الضبى لن اي ضربة من الضبي تبي تدهوره وينكل ولا عاد يهد
مشكور اخوي

[مدرب الطير]

شكر لجميع الاخوه على المرور
وطيري جير شاهين 18*18
وتقبلو تحياتي

[*الـزيـن*]

ما شاء الله عليه

جير شاهين وحجمه كذا اكيد يبي يطلب الغزال ولا هي غريبه عليه

الله يوفقك ان شاء الله وجرب خذلك اول شي تيس الي تشبه الغزلان وخذلك واحد توه عمره صغير وجرب والله يوفقك



اخوك الزين