تكفوون يا أهل الشرقية أحتاج لمساعدتكم

[طائر السعد]

السلام عليكم ورحمة الله وبركاته

بمشيئة الله سوف أكون متواجد أنا والأسرة بعد أسبوعين من الآن 22/5 في الخبر بأحد شاليهات الهاف مون وأرغب بتمضية الوقت في صيد السمك .

عندي لكم كام سؤال وياليت أن تجاوبوني عليها وأخوكم غشيم بطرق الصيد وأنوع السنارة وكذلك الطعم ومثل ما قلت لكم فقط لتمضية الوقت مع الأولاد للفائدة وجزاكم الله عني كل خير

ما هي أفضل الأوقات للصيد ؟

أفضل أنواع الطعم ؟

المحل الذي تتواجد به السنارة بالخبر ؟

نوع الجلب والسنارة ( طبعاً الصيد بيكون على الشاطيء )

والشكر موصول لكم سلفاً على المساعدة

أخوكم أبو عبدالرحمن

[بورهف]

حياك الله اخوي بوعبدالرحمن
والله الهافمون انا ماحبه
واماكن البيع السنانير في الخبر ماادلها
لكن اذا على الطعم خذ خثاق يضرب عليها اغلب السمك
وقت الصيد وقت السقيه وبالتويق
وعليك بالصبر
وتقبل معلوماتي المتواضعه

[صياد متهور]

أخوي أفضل الاوقات مثل ماقال أخوي بورهف الخثاق(الحبار) ماأدل بالخبر ولا كن في الدما في حي الزهورعند مطعم هرفي وكودو مادري انت عندك قصبة ولا لا بس شوف اذا بتصيد بخيط خذ الخيط 50 والثقل 1 السنارة(الميدار) 16 وهذا اللي عندي تجيب لنا صور صيديك موفق انشاء الله....................

[طائر السعد]

الاخ بو رهف
الاخ صياد متهور
الله لا يحرمكم الأجر ومشكورين على المعلومات
الله يجيب لنا واحد من أهل الخبر يدلنا وين تنباع السنانير
بالمناسبة أخوي صياد
القصبة عندي بس من عهد نوح قديمة بالحيل لكن المكينة على خير مايرام

[بوعابد]

سلام عليكم
والله في الخبر ما أعرف مكان لبيع مستلزمات الصيد بس في الدمام عندك محل السنارة الذهبية تراة ممتاز جدا والدمام قريبة يم الخبر , والخثاق ممتاز , الوقت عند السقية أرجو أن المعلومات تفيدك

[الصياد 1]

فيه محل قريب من سلاح الحدود بشاطي الغروب انا من زمان مارحت المحل بس انشالله يكون لسا موجود المحل فيه كل الادوات البحرية الي تبيها ناسي اسمه اسئل عنه وبالنسبه للصيد استخدم ميدار رقم 9 للسنارة نصيحة مادامك بتطول عند الشاطي استعمل طريقة التبيت خذ خيط قوي مقاس 70 خله طويل ركب ثقل كبير شوي عشان يثبت مع الموج والطعم خثاق قطعة كبيرة شوي الميدار رقم 6 كل ماتقدر ارم داخل البحر اكثر خل الخيط مدة طويلة لا تسحبه يفضل ترمي الخيط قبل المد اذا خليت الخيط مدة طويلة اربع او خمس ساعات مافيه مشكلة والله يكتبلك التوفيق انشلء الله التبيت للاسماك الكبيرة انشاء الله

[معاند سيف]

عزيزي,
انا انصح انك تنسي الصيد بالنهار وقت اللي تكون فيه ناس تسبح علي الشاطيء لسببين: اولاً مافي سمك يقرب عندك, ثانياً خطوره السناره علي الاخرين. بعدين فيه شغله لازم تعرفها , هافمون مافيه سمك صغير الا ماندر. هافمون متوفر فيه السمك الكبير خصوصاُ السبيطي. يعني تشوف لك وقت يكون مافيه ازعاج والناس نايمه و تحدق بطريه مناسبه للسبيطي. انا شخصياَ أفضل بلد حر وأخلي الخيط راخي للسبيطي.

[شلال البحر]

بسم الله الرحمن الرحيم



اخي طائر السعد

السلام عليكم ورحمة الله وبركاته

اولا اهلا وسهلا بك في ربوع الشرقية والف مليون مراحب بك

اما بالنسبة لاماكن الصيد في الخبر كثرية وهي عندك في العزيزية والشبيلي وكورنيش الخبر

وعن محلات بيع ادوات الصيد هنالك حوالي خمسة محلات وكلها في الخبر ثلاثة قريبة من مركز الرحمانية واثنان في شارع الامير محمد ما بين تقاطع خمسة وستة واذا اردة المساعدة اتصل علي على الجوال رقم 0502407668

واهلاو سهلا بك في الشرقية وان شاء الله ترتاح فيها وتقظي عطلة جميلة



اخوك شلال البحر

[Dmmams Diver]

اهلين وسهلين

حياك الله بالشرقية
واذا ما شالتك الارض شالتك عيونا


والله الاخوان ما قصروا
بس حبيت انصحك بما انك مبتدأ
عدة الصيد اذا كنت بتشتريها
يعني اخذ لك شي للتعليم

يعني لا تاخذ الشي الزين و الماركات
لا اخذ على قدك نسبة لانك اول مرة تحدق
يعني خذ لك شي اللي يجي بـ 200 تقريبا(العدة كاملة)

واذا اتمرست يالغلا خذ لك الشي الزين

وانا أجزم و ابصم بالعشرة انك اذا جربت الحداق
راح تدمن عليه

بالتوفيق

[طائر السعد]

بو عابد
-----
معاند سيف
شلال البحر
Dmmams Diver
الف شكر على المشاركة وأتحفتوني بما عندكم من معلومة فجزاكم الله عني كل خير
شلال البحر أشكرك والله يخليك لعين ترجيك سوف أتصل عليك على الأقل حتى أستأنس بسماع صوتك ... ومشكور يالغالي