بالنسبة للرز البشاور

[rooco]

السلام عليكم ورحمة الله وبركاته

يالله حي الذيابة

ودي استفسر عن البشاور اخبر انه يختلف عن الرز العادي بالطبخ

من ناحية الطريقة في مقدار الماء وبعض الاشياء الثانية

وابي طريقته خاصة مع القميري والدخيخلات لاهنتم يالربع


وجعل مثواكم الجنة

[rooco]

يعني لازم ادق على الشيف رمزي؟

[فايروخ]

السلام عليكم ورحمة الله وبركاته

اخوي نفس ابوكاس بس اقل موية

اخوك فايروخ شيف مبتدى .

[سنجااار]

السلام عليكم ورحمة الله وبركاته
طريقة ياطويل العمر تنقعه بمويه حاره لمده نص ساعة وبيكون جاهز شارب الماء ولا الدخيخلات ولا القميري مستوي وخالص طلعهن و صف المرقه بس وكبه عليه وقدر الماء فتر هذا طريقتي علشان مايجيك حبته فيها مثل الحرشه والافضل انك تطلع الدخل او القميري واذا طلع الرز خطه عليه علشان الدن ينزل وبتكون دهنيه الله هم عافنا بي والسلام ختام
اخوكم مشروك

[rooco]

فاايروخ سلمت يااخوي الله يجزاك الجنة ووالديك



مشروك تسلم يالنشمي وجزاك الله الجنة ووالديك

[برق السما]

اخوي نفس ابوكاس بس اقل موية









سلامتك وأنا اخوك .. البشاور يشرب مويه .. فلازم تكثر مويته .. وتنقيعه أطول من العادي ..

وطبخه كذلك اطول .. والباقي كلن وطريقته ..

[عشانا]

احذر تربيص الرز البشاور لانه سوف يتكسر
الافضل للرز البشاور هو غسله مرة او مرتين حتى ينضف من الشوائب
والرز البشاور يحتاج زيادة في الماء عن الرز العادي ويحتاج ايضا زيادة في السمن
عليك بالرز البشاور ماركة باب الهند او المهيدب
ومن تجربتي انصح بطبخ الرز البشاور بالقدر العادي وليس بالقدر الكاتم
وكانك تبي كبستك تطلع هبال فعليك بدق الثوم مع الزنجبيل الطازج ووضعه على تكشينة البصل

[جنون الليل]

إسمحوا لي يا النشاما أقول لكم كلكم ما عندكم سالفة
ً الرز البشاور كل ماركة لها وزنة مختلفة عن الماركة الثانية وأيضا حسب تاريخ إنتاج الرز إذا حق هالسنة أو من كم سنة والرز كل ما يكون قديم يكون أفضل خاصة المزة الهندية أما البشاور لا تاخذون أقدم من سنة
والبشاور إذا جيت تغسله إغسله بحذر لأنه ممكن يتكسر وأنت تغسله وإياكم والماء الحار يكفي ماء دافي وشوية ملح ناعم
وإياكم وغسله مرة ثانية بعد التنقيع لأنه يكون سهل الكسر وممكن ينطحن معك
حتى المزة الهندية إذا غسلته ونقعته إنتبه بعد تعيد غسله مرة ثانية عقب مانقعته لأنه يتكسر بعد
أما أحسن نوعيات البشاور فهو 000000000000
أول شي الشعلان والمهيدب هذولي قمة
أما المزة كثير منها زين لكن في المقدمة الوسام والمهيدب والشعلان

بالنسبة للرز العادي المزة فطريقة وزن الماء هي إنك توقف الملعقة في النص غذا وقفت مستقيمة ما طاحت يمين ولا يسار فهو وزن ممتاز
وتخليه على النار نار عالية لحد ما يبدى يغلي وإذا بدى يغلي تخليه لين تشوف الرز بدى يشرب الماء ثم تقصر عليه قصر عادي لحد ما ينشف
ثم تنمل له النار تنميل وتحط تحته الصاجة إذا موجودة وتخليه مدة 25دقيقة إلى نصف ساعة عشان تطول حبته
أما قياس الملح والزيت أفضل شي كل مد من الرز له
ملعقة ملح ناعم ونصف بيالة زيت
أما البشاوور فطبخه يختلف من ناحية قياس الماء والملح والزيت فكل مد من الرز يحتاج أقل من ملعقة ملح وبيالة زيت واللي ما يخافون عن الزيت يحطون بيالة ونصف
أما الماء أفضل شي يكون الماء فوق الرز إثنين سم والنار تكون في البداية عالية وإذا بدى يغلي على طول تقصر عليه النار قصر عادي
لحد ما ينشف وإذا نشف تنمل له النار تنميل
وفيه طريقة سهلة جداً للجميع وهي إنك تحط الرز والملح والزيت وتالماء وتكثر كل شي طبعاً لأنك بتخلي الرز يطبخ علة نار عالية ثم إذا شفت الحبة بدت تستوي تشيله من على النار وتصفيه من الماء بس لا تصفيه مرررررررررة خل شوي ماء بين حبات الرز عشان إذا رجعت القدر على النار تنمل عليه النار وتخليه يكمل إستواء
بباقي الماء المتبقي بين حبات الأرز
ثم إذا نشف مرة



بس البهارات يفضل دايم تكون صاحية ولا تخلونها مطحونة ولو حمستوها مع الزيت بس شوي تشويح لا:no2: تخلونها لين يتغير لونها وتغير لون الزيت لأنها بتخرب بياض الرز
وفي النهاية إذا نشف مرة أدير عليه شوي زيت يعطيه لمعة رهيبة أو زبدة أو سمنة أحطها أحياناً من باب التغير وخاصة في الشتاء وبعد أقوم أخذ شوية بهارات مطحونة بين أصابعي وأرشها على وجه الرز وهو في القدر وأغطيه وهو يسحب ريحة البهارات
ويطلع يجنن خاصة اللي ما يحبون الكشنة ولا إذا ما عندك بصل وتبي كشنة سو هالحركة
وأنا أحيانا أسوي كشنة من الزبيب والصنوبر والبطاطس مربعات صغار مقلية وحمص حب ((بليلة))

أقوم أحمص الصنوبر أول بشوي زيت وبعدين أشيله وأحط الزبيب وأخليه لين يتحمر ويتنفخ شوي
يطلع جنان للي يحبون وبعدين أضيف البطاطس المربعات ومقلية سابقاً أو مسلوقة والبليلة
والصنوبر وأقلبهم على النار وأحط الصنوبر معهم
وإذا خلصت حطيته على الرز بعد ما ينشف وغطيت القدر وخليته يسحب الريحة لمدة ربع ساعة
ولو حبيت ذوب شوية صبغة صفراء ((بودرة الزعفران)) مقدار نصف بيالة بس وصبه في أماكن متفرقة على الرز ويطلع لك ألوان في الرز جنان


وسلامتكم


وإن شاء الله أكون كتبت ما يفيد وينفع
وإذكروا الله لاتنظلوني:D

[(أبوزيـــــد)]

ماشاء الله تبارك الله عليك يا جنون الليل ...

كفيت ووفيت مابقيت شي الا وقلته...
وحبيت اضيف معلومه وتوضيحها الا وهي ان الرز البشاور يقلل مويته ويكثر زيته ..
بينما الرز العادي (المزه) عكس ذلك .....

الله لايهينك على ها التقرير...

تقبل خالص تحياتي....