المساعد الشخصي الرقمي

مشاهدة النسخة كاملة : ماهي طريقة عمل السلطة الحارة


اخو تكفى
11/06/2007, 10:08 PM
السلطة الحارة المكونة من الطماطم والفلفل الاحمر
عجزت اضبطها ما ادري كيف بعض المطاعم تحبكها
اللي يتقنها ياليت يعلنها
ابوالدعزي
11/06/2007, 10:23 PM
غالي والطلب رخيص اخو تكفى

شف ونا اخوك بحكم خبرتي المتواضعه في هالمجال لكني عرفت السر فيها

وهو لازم تعصر في عصار يدوي ولا تقرب الخلاط الكهربائي لانه يوخر الطعم منها والعصار اليدوي الحديد تلقاه في محلات الادوات المنزليه وقيمته تقريبا 35 ريال هو مخصص اصلا للحم بس يستخدم لفرم الطماط والخضار تطلع رهيبه فيه
ومالك في الطويله الطريقه يالغالي
المقادير حزمة بقدونس وحزمة كزبره وطماط حسب الرغبه يعني حسب كمية السلطه اللي تبي شوي ولا كثير
وفلفل اخضر حار بعد حسب الرغبة تبي حار كثر ولا لذعة حرارة حط شوي عاد ان بغيت احمر ولا اخضر كله واحد
وبعدين حطها في الفرامه وسم بالله وشف الفرق بالطعم شي صراحه واسف على الاطاله
وادعلي بس
مجازف2010
12/06/2007, 03:01 AM
اذا تبي احسن سلطة حاره ( احسن من حقت المطاعم ) خذ المقادير

حط في الخلاط الكهربائي التالي
2 حبه طماطم حجم وسط
4 حبات حبحر ( فلفل ) طازج تقدر تكثر او تقلل حسب الرغبة
4 فصوص ثوم
1 حبه بصل
بقدونس
وعصير ليمونه واحده
ملعقة ملح
وملعقة شطة تباسكو ( اختياري )
واخلطها

وبالهناء والعافية ( هذي انا مجربها وطلعت جنااااان )

تحياتي لك
الغزال الشارد
12/06/2007, 06:12 PM
الله يعطيك العافية

تحياتي لك
غزال الصحراء
13/06/2007, 03:47 PM
اذا تبي احسن سلطة حاره
خمس حبات فلفل احمر فص ثوم
طماط حبه بصل وحده حجم وصط؟؟
3 م خل شوي ماء شوي كمووووووون وملح
وبالهناء والعافية ترا حاااااااااااااااااااااااااااااااااااره مره
الله يعين بطنك

اختك غزال الصحراء
sasasasas
15/06/2007, 01:46 AM
عليك باحبرح شقراء وما عليك تضبط السلطه

وعلى كيفك
^_^
16/06/2007, 01:44 PM
إذا كنت من محبي الحوار لدرجة الجنون وراعي كيف
ماعليك الا بالحبحر الأحمر حق الحوطه أو الخرج مايقارب عشر حبات مع نص ليمون أصفر مع القشر
وتخلطه بخلاط يدوي وبعد الخلط تضيف عليه زيت زيتون للحفظ بالثلاجه
بالهناء والعافيه
كشته 111
16/06/2007, 04:54 PM
اخوي تكفي طريقتي في الشطة الحارة اجيب فلفل حايل الاحمر المطحون واحط معه طمام وبصل وكمون وملح وفي الخلاط واذا طلعته من الخلاط كب عليه ملعقتين زيت زيتون ساسو وشوووووي فلفل اسود وحركه با الملعقه جرب ورايح تدعي لي ....

و شفت سلطة حارة يسونها المطاعم الصينية وطريقتها ( يعني اني اروح مطاعم صينيه وتري خبري بها من 6 سنين ) :


يجيبون ذاك الفلفل الاخضر عرضه كنه مسواك وطوله طول التمره بس حار جداااااا ,, ويجيبون صحين شكله شكل الفنجال ويحطون فيه قطيعات من ذا الفلفل وسط خل مخفف بماء , بس تعال شف وشلون يفتح الشهية للاكل بشكل عجيب ,,,,
عبدالله العمرو
16/06/2007, 05:02 PM
أخوي أخو تكفى / لاعدمتك ...

أما طريقتي فهي كالتالي :

2- حبة طماطم وسط
4 - فلفل حار ( أخضر أو أحمر ) حسب الرغبة اللونية :)
2- فص ثوم
2 - ملعقة خل أبيض
كزبرة خضراء ( ورق ) بحجم 2 ملعقة كبيرة ( مغرفة )
1- ملعقة ملح ناعم
1 - ملعقة صغيرة كمون
4 - ملاعق ( أكل ) زيت زيتون
============
حط جميع المقادير بالخلاط حتى يكون الخليط ناعم ...

وبالهنا والشفاء ...


تحياتي /
عديمة احساس
19/06/2007, 12:59 AM
انا طريقتي غير وطعمه روعه

بالخلاط اليدوي او الكهربائي

2طماط وسط

فلفل اخضر حار 10حبات

فصين ثوم

كزبره مقدار كف يدك

عصير ليمونه

ملح حسب الذوق

ياسلام مع الكبسه اوالمضغوط او الشوايه

وبالعافيه
ولدعلى
19/06/2007, 04:50 AM
اما انا سلطتي غيرررررر

وطعمها بعد غير وغير وهيى.......


حبة طماطه

3 فصووص ثوم صغيره

1 فلفل اخضر ( او حسب الرغبه )

شووي كزبره

والجديد الى عندي

قطعه زنجبيل بحجم حبتين تمر

والافضل تكوون طاازه


اخلطهم بالخلاط وادعووولي

وهالسلطه مليااانه فووويد للجسم


لأحتؤؤها على اهم عنصؤين الثوم والزنجبيل




ولك تحيااااااااااااتي
nashad
19/06/2007, 05:42 PM
انا عندي طريقة فلفل يقول انا حر
سو كشنه كثيرة الطماطم والزيت والصلصه
وقطع عليها نص كيلو فلفل حار
الصل الأسود
21/06/2007, 08:49 AM
يا اخوان جربو النعناع مع السلطة

شي خراااااااااااااااااااااااااافي ، جرب وأنت الحكم
اسير الغربة 1
22/06/2007, 01:04 PM
الله يعطيك العافية
اسير الغربة 1
22/06/2007, 01:11 PM
مشكور وماقصرت يعطيك ألف عافيه


تحياتي لك.
شليويح السر
22/06/2007, 11:55 PM
فلفل الحوطه 5 حبات
فلفل رومي 1 حبه
ملعقه صغيره خل التفاح
رشة ملح
ملعقه كبيره معجون طماطم
ربع ملعقه صغيره كمون
حبة مسمار ( عويدي )
ورق بصل 3 ورقات
يعجن مع بعض جيداً
...................
وارفق على عمرك بعدها