هل الصقارة مزاين او صيد ...

[راعي برق]

بسم الله الرحمن الرحيم
السلام عليكم ورحمة الله وبركاتة ....
استغرب من الشخص اللي يبغى يشتري طير تلقى مواصفاتة ابي طير مزيون ( !!! ) يعني حمر صافي او اشعل صافي والراس كاشف والنحر اكشف ولون الريش متناسق مع لون العيون ....
بالمقابل وجهت نظري انا ان فعل الطير هو اهم شي تلقى الواحد عندة طير عادي ولكنة علية العلم ( فعل طيب ) وتلقى سعرة عادي ليش ....
من اهم المواصفات الي يدورها الصقار هي المواصفات الي تبيض الوجة اذا هد الطير مثل :
كبر المخابط .
السبق .
قوة القلب .
الطيار ( الجناح ) .
الولف .
الذبح .

هنا السوال :
هل الصقارة مزاين او صيد ...
تبون تقولون الثنتين اقول معليش لكن ليش فرق السعر للطير العادي والطير المزيون .
مع العلم ان الصقار يبحث عن الفعل اولا واخرااااااااااااااااااا .
تحياتي
ابو عهد

[أخو وضحة]

كلامك صحيح هي مزاين والا صيد
لكن أنا أقول صيد
الزين موبجايبلك كروان والا حباري
واذا اتحدت الثنتين في الطير عزالله ربح راعيها
طيب عندي وجهة نظر : مثلا شريطي الطيور إلي يبيع ويشتري فيها من أجل المادة هو ما يدور إلا الزين للي يدورون الزين من الطيور في الشكل ويبيع الطير العادي إلي فعله يبيض الوجه للي يدورون بياضة الوجه قدام الرجال ........................................

[عبدالله هدد]

اخوي فيه ناس تدور الطيور الكايفه والفعاله
وفيه ناس تدور الطيول الفعاله
لكل واحد شف بشي بس شف الفرق
بين الطير كامل المواصفت راعي الفعل وشف الطير
العادي المقبول وانت تعرف الفرق ولاكل واحد رغبه


وشكـــــــرا


وتقبل مروري

[مشــعوفان]

السلام عليكم ورحمة الله وبركاته

أرحب ياراعي برق


أخوي أحس بلاهب بصدري من موضوعك


هالحين صقارة مزاين مايهم الصيد واللحوق مثل ماقلت اللون وأذا هو صافي أو لا وأذا راسه زبيديه أولا


ماينضرون الى مجسه ثنداته مناكبه يابعدي راعي الطير والصقار الصحيح عارف اللي يبي .

بتجيك أيام ياراعي برق بتشوفهم يتمشون بالأسواق وكلن راز طيره والموتر يلق من النظافه وتوايره بها لكس



ياحر سبدي حراه

[أبو رداد]

وعليكم السلام ورحمة الله وبركاته

سؤال جيد واكيد له اجابه مقنعه
ان شاء الله يجيبوك الاخوان عليه
ولي عوده انشاء الله ...

[شبراق]

ياراعي برق

فيه ناس تحب الطير الملون السبوق الساطي وذا صار ذابح بعد اكيد يبي يغلى سعره (اذا صار دراهمك تخدمك ليش ما اشري الطير المزيون الفاعل الي فعله تبيض الوجه ).
وفيه ناس تحب الطيور المجاهيم وتلقاه فاعله وماودك الى تشوف رفته وبنفس الوقت اذا صار فعله زين تلقا سعره بعد غالي .

ولولى اختلاف الاذواق لجلست السلع

[الاشقرالكاشف]

نص المال نظره ونص الثاني افعال الطير

[صقار أبوظبي]

يعطيك العافيه
الملون قليل الي يجي به عذروب

[طارق الحربي]

الطير من صقاره

والناس تدور بالدرجه الاولى الشكل وكذلك التقاطيع التي تدل على السبق وغيره مهمه جدا

تحياتي لتفكيرك العاقل

[الوافي عزام]

الناس اجناس !!!!

تلقى البعض يبي طير رزه قدام الناس واذا سيرعليهم احد جابه عندهم يشخص به وهذي الطيور معروفه بالسوق ولها اهلها وتسمى ( ديكور )

اما اللي مثلكم وشرواكم له هدف وغايه من اقتناء الطيور والكل يعرفها وتلقاه يبحث عن الطير السبوق الصايد ولا يهتم للون وغيره

وشكرا لك على موضوعك

[خيال الصبحا]

وعليكم السلام
لامانع من أن تكون
الأثنين بالطير ، الشكل
والفعل ، لإن كل واحد يتمنى
أن ينقل الطير النادر ، وبنفس الوقت
يتمنى الطير الفاعل ، لذلك أن حصلت
الثنتين فهذا المطلوب ، وأن كان الطير فاعل
ولو شكل عادي فهذا يصلح للصقار الي بمعنى
صقار ، أما ان كان الطير مزيون بلا فعل فهذا للناس
الي تبي تتمنظر به،أما الصقار فراح يبيعه بلا شك أو يشوف
له دبره ، وشكرًا

[مدرب الطير]

مشكور اخوي على الموضوع الجميل لكن كل صقار له رغبه في الطير واهم شي يكون صايد
والطير ونخوك فتنه وجمال وروعه في الشكل انا لشقت طير الراس كاشف ادوخ بس اتمناه يكون صايد


وتقبل مروري

[ذيب البر]

كلامك جيد بس ابضرب لك مثال هالحين لو تبي تسافر من الرياض الى حايل الددسن توديك واللكزس توديك

يعني صفة المشي او ميزة المشي على الاسفلت موجودة بالسيارتين وش تختار !!!!

حنا مانقول خذ لكزس بدي بس وعطلانه ما تمشي مثل ما نقول خذ طير مزيون وطياره ردي

والناس قدرات واذواق وميول ويدخل فيها امور ماديه وغيره وكل على حسب
قدراته والتفاوت موجود في كل شي الطيور وغيرها

ان شاء الله اكون وصلت لك بعض الي في بالي

[جرب حظك]

إلي يدور الزين والجمال يروح حق شركات تفريخ الجير ترى ماخلوا شي تشوف الطير تقول حاط مكياج من كثر الألوان
http://www.mekshat.com/pix/upload/images38/mk29253_blkgyr.jpg

[راعي برق]

بسم الله الرحمن الرحيم

اخو وضحة
حنا بلانا من الشريطية !!!

سهيل 12
حياك الله

مشعوفان
ياحر سبدي حراة ( صدقت )

ابو رداد
اشكر مرورك

شبراق
الكلام ان الناس اخذت الطيور مزاين مهوب ( صييييييييييييييد )

الاشقر الكاشف
الموظوع انة صار كلة نضرة !!!!

صادق الهرجه
اشكر مرورك

طارق الحربي
اشكرك من كل قلبي .......

الوافي عزام
اشكرك

خيال الصبحا
اشكرككككككك

مدرب الطير
وانا ادوخ بعد بس المشكلة اذا صار منظر ( ديكور )

ذيب البر
يا ذيب الموظوع ان الناس طلعت تشرط بالزين مهوب بالفعل الله يرضالي عليك.

جرب حظك
اشكر مرووووووووورك

اشكر للجميع مرورهم وتفاعلهم .
تحياتي
اخوكم
ابو عهد

[راعي عقاب]

[مشاء الله

http://www.mekshat.com/pix/upload/images38/mk29253_blkgyr.jpg[/QUOTE]

[راعي برق]

راعي عقاب
اشكر مرورك
البارح طال النقاش عن هذا الموظوع ولا طلعنا باي نتيجة كلن لة وجهة نظر
اخوك
ابو عهد

[خيال الصبحا]

راعي عقاب
اشكر مرورك
البارح طال النقاش عن هذا الموظوع ولا طلعنا باي نتيجة كلن لة وجهة نظر
اخوك
ابو عهد
السلام عليكم
الأخ راعي برق
أنا أعتقد والعلم عند
الله ان قصدك(أيه أفضل
الطير الي شكله زين ولا يفعل
والا الطير الفاعل وشكله ماهو زين؟)
أما كون الناس تبحث عن الطير النادر فهذا
مايضر أن كان مع الندره فعل ، وشكرًا

[راعي برق]

خيال الصبحا
الله يرضالي على قلبك قل امين ....
اشكر مرورك اولا
كلامي واضح
الناس طلعو يدورون الزين بالطيور ويدفعون الى مالاحدود علشان الشكل
مش عشان الفعل !!!!
هنا مربط الفرس
وجهت نظري مادام الطير يذبح وولف ويحبة قلبك وش عليك من الشكل ...
صح ولا لا
تحياتي
ابو عهد

[شبراق]

شبراق
الكلام ان الناس اخذت الطيور مزاين مهوب ( صييييييييييييييد )


وش محرق رزك انت الحين ؟؟

[تنوم]

نصف الحلال نظررره

[راعي برق]

شبراق
حياك الله
اللي محرق رزي وانا اخوك الغلا اللي بالسوق ( غلاء المهور )
تحياتي لك
اشكر مرورك مرة اخرى

تنوم
حياك الله
اشكر مرورك
نصف الحلال نظرة كلام صحيح
بس ما يغلا كل شي علشان النظرة واللي مهوب نضرة ما يسوى شي
مع العلم ان المطلب الاول والاخير بالطير هو الفعععععععععععععل
تحياتي
اخوكم
ابو عهد

[أبو رداد]

السلام عليكم ورحمة الله وبركاته

الله يحيك اخوي براق
اشكرك واشكر كل الاخوه الي شاركوا
في هذا الموضوع
,,,
سبب ارتفاع اسعار الطيور الملاوين او (الطيبه)
لايعود فقط لجمالها
بل يعود اساسا الى طيب مواكرها
اغلب الطيور الملاوين تجمع بين الجمال والفعل
وهذا نتاج لما جربه العرب
حيث نادر ماتجد عيب في وسرة طير ملون
ونادر ماتجد طير ملون جبان
ونادر ماتجد طير ملون غير سبوق
ولهذا الصقاقير القدامى ينادوها بالطيور الطيبه
لانها طيبه في كل شي شكل وفعل
,,,
وهذا لايعني عدم وجود طيور غيرملاوين طيبة فعل
بل موجوده ولكن نسبة طيبة الفعول بغير الملاوين قليله
ولهذا تجد الصقاقير يتنافسون على اقتناء الطير الملون
منذ قديم الزمان وليس الان ..حيث كان بعضهم (لما كانت الطيور كثيره)
عندما يصيد طير غير ملون يقص من ذيله ويطلقه
وبما ان هذه الفصائل الطيبه اصبحت نادره وقليله جدا
واسعار الصقور كاي بضاعه خاضعه للعرض والطلب
فتجد رغابتها يدفعون اثمان باهضه لاقتنائها
ولهذا تجد اسعارها مرتفعه
ولاشك ان هناك من يشتريها لسبب اللون فقط
ولكن جنايتها الاصلين يعرفون سبب غلاها
هذا ماعندي
وارجو ان يكون جواب مقنع
والسلام

[راعي الشرفا]

الصقاره صيد وليست مزاين
ولكن هناك من الناس من يرغب في شراء طير غالي لكي يقول فلان والله ابو فلان عنده طير طيب يعني المفاخر بطيرة
ولكن تكمل مواصفات الطير المزيون عند فعلة فترى بعض الناس يذهب لاشراء طير بارخص الاثمان ولكن فعلة طيب وهذا هو المفاخرة فية بفعل الطير لا بشكلة زشكرا

[خيال الصبحا]

السلام عليكم
الأخ صاحب الموضوع
كلامك جميل ، وأسف للفهم
الخاطئ بالرد السابق ، وان كان
الطير فاعل هذا اهم شيء ، وأنا اؤيد
وجهة نظرك ، وأنت لا تحرق رزك ولاشيء
انت تبي طير فاعل لو شكله عادي ، وهذا سعره
معقول ، وشكرًا

[راعي برق]

ابو رداد
حياك الله
كلامك مقنع جدا واشكر لك التوضيح
حسب فهمي ان الطيور الملاوين اشتهرت بالفعل ( اشكرك ) هذا تبرير مقنع
اشكر مرورك

راعي الشرفا
حياك الله
والله انك جيت على الجرح
تحياتي

خيال الصبحا
حياك الله الف مرة
ليتك جنبي احب على خشمك
اشكرك على اريحيتك وهذا يدل على سمو اخلاقك الكريمة
تحياتي

اخوكم
ابو عهد