المساعد الشخصي الرقمي

مشاهدة النسخة كاملة : تحذير عاجل جدا لكل الاخوان


راعي عنيزة
15/01/2002, 09:51 AM
سلام عليكم

نظمت امارة القصيم حملة مداهمات لمحلات بيع الكنود وتمت مصادرة اجهزه جديده واجهزة موجوده في تلك المحلات للصيانه
ويتوقع التشديد من الدوريات على الاجهزه في السيارات

لذلك انتبهو ولا تودون اجهزتكم للصيانه في الايام هذي ولا تحرصون تراسلون في السياره الا في البر

الله يستر ويحمانا ويحمى اجهزتنا وجميع اجهزة المسلمين :)
الوراد
15/01/2002, 10:03 AM
كثر الله خيرك على هالخبر والتنبيه

والله يكفينا شرهم وشر مدهاماتهم اللي ماله سنع ابد ابد

لكن ياخوي اللي يستعمل الأجهزه بالديره اشوف ان ماعنده سالفه

كل ديره تطبه تلقى اللجلجه والهواش والسب والكلام اللي ما يطلع من عقّال

والله اعلم انهم هم سبب هالمشاكل والمداهمات

يعني لو كل واحد يستعمل جهازه للضروره فقط مثلآبالبر تسان ارتحنا من هالمداهمات وافتكينا من هالمشاكل

واللي بالديره يخربون على غيرهم احيانآ ويدخلون على موجة الشرطه والا الدفاع المدني او غيره من الدوائر الحكوميه

:confused:

والا انت وش رايك ؟
راعي عنيزة
15/01/2002, 10:16 AM
الله الله اخوي الوارد رايي من رايك وما عليك زود

ومثل مانت شايف الشبكه في الديره كلها مراهقين وسب وهواش وكلام ماله داعي

ويقولون ان سبب المشكله هو التقطيع من بعض المهبل على شبكة الدفاع المدني ببريده وذا الي خلى الاماره تتحرك

بس وش المانع ان الدفاع المدني يشفرون ولا يغيرون اجهزتهم ويرتاحون ويريحون :confused:
الهاوي
15/01/2002, 10:39 AM
ما قصرت اخوي راعي عنيزة وظاهر ان التشديد في كل مكان والله اعلم

والله انك صادق اخوي الوراد السبب الرئيسي في هالمشكلة هم اللي يستخدمون الجهاز في الديرة
يالله الشكو لله .:mad:
السمح
15/01/2002, 12:14 PM
راعي عنيزة ما قصر بهالخبر التحذيري ..

وأضم صوتي لصوت الأخ الوراد .. وكلنا نعرف نوعية المكالمات اللي تتم بالديرة .. هذولا هم اللي خربوا علينا ..

تقبل تحياتي ..
راعي عنيزة
19/01/2002, 12:14 PM
الهاوي والسمح

مشكورين يا بعدي على هالمداخله الجميله وبالفعله مستخدمين الديره خربو سمعة الاجهزه الي بصراحه مالنا غناة عنهن وفوائدهن ما تحصى واقلها انك تتواصل مع الشباب في البر وتاخذ علوم الربيع والمقناص وتبادلون الاحداثيات
بدوي متحضري
21/01/2002, 02:16 AM
مشكور أخوي على هذا التحذير وما قصرت ولو ننا ماحنا عندكم بس نعاني من نفس المشكلة المراهقين والأطفال و0000000 المهسترين 00
راعي عنيزة
22/01/2002, 01:32 PM
هلا وغلا اخوي ولا يهمونك وابد الي يضيق صدرك طق الفرار وخله يقشر بصل :)
مطلق الاشناب
09/10/2012, 03:18 PM
مازال البحث ساري ياخوان*
سلطان البريك
11/10/2012, 09:39 PM
الله الله اخوي الوارد رايي من رايك وما عليك زود

ومثل مانت شايف الشبكه في الديره كلها مراهقين وسب وهواش وكلام ماله داعي

ويقولون ان سبب المشكله هو التقطيع من بعض المهبل على شبكة الدفاع المدني ببريده وذا الي خلى الاماره تتحرك

بس وش المانع ان الدفاع المدني يشفرون ولا يغيرون اجهزتهم ويرتاحون ويريحون :confused:



لا مستحيل ... ما احد يقدر يشوش عليهم من اجهزة المراسلات العادي ... ولكن مثل ما تفضل به الاخوان بعض الاخوان فيهم الجهل والطيش وعدم احترام ذاته .. تلقاه يسب ويتكلم بكل شي .. سئ .. للاسف
ابوسعودد
11/10/2012, 09:47 PM
الموضوع قديم من عام 2002]