سـالفة الطير اللي أنطرح بمجيرمه وبيع 280,000 ريال_بالصور_

[المري]

السلام عليكم .. اخواني الاعزاء..

هذا قرناس هواء طرح في مجيرمة الموسم اللي طاف , أحذفو له سمانه ويوم علق في الشبكة اطردوه ولكن مافيه

فائدةومن عقبه هدو عليه ثلاث وكارى ولا فيه فائدة , حصلو اثنين من الوكارى ميته بسبب تشابكها مع هذا

الطير...!!المهم فلت من الشبكة ويوم جاء ثاني يوم ويحصلي واحد زهراني من طواريح مجيرمه ويحذف له والله

يعينه ويطرحه..تزاودو اهل مجيرمة وصار من نصيب واحد ينقاله فهد بن جدعي .. بقيمة 280,000 ريال !!!

راح الطير للرياض وبيع في الرياض , جلس الطير عند واحد من الشيوخ الى وقت الكراوين وهدو على الكراوين

وفعل الطير.. وطياره طيب بالحيل.. المهم يوم جاء وقت الربطة عطوه صقاره وهو واحد من الربع , قبل اسبوع

باعه على واحد من أعضاء مكشااات وهو (( فـــــــــــالكون 7 )) وان شاء الله يهده ويصيد ويستانس به..

وعسى فاله التوفيق...

صورتين لهذا الطير...



http://www.mekshat.com/pix/upload/images39/mk1168_e2 (small).jpg

http://www.mekshat.com/pix/upload/images39/mk1168_e3 (small).jpg



ملاحظة: هذا ماوصلني من سالفة الطير واللي عنده تصحيح جزاه الله خير..

وسلااااااامتكم

اخوكم - بومعيض

[سنجااار]

ماشاء الله عليه الله
طير مبروك والله يوفق الجميع

[محبوب..]

اخوي المري الف شكر مني على هالسافه الحلوه والعجيبه ولك تحياتي

[المري]

مرحبا خوي محبوب واخوي مشروك

وماقصرتو .. وتسلمون على المرور..

وصراحة القصة غريبة لان الطير اشوف قيمته من 100 الف وتحت.. بس ماادري وش السالفة؟ ياليت يجي احد من اهل مجيرمه ويوضح

السالفة..

اخوكم - المري

[قناص الحبارى]

اخوي / أبو معــــيض ،،

السلام عليكم ورحمة الله وبركاته ،،

بيض الله وجهك وما قصرت على التفصيل ..

بس مو كن سعره غاااالي شوي .. وإالا صار فيه تحدي ..؟؟

أتوقع الميه وحولها مناسبه ..


مجرد رأي .. ووجهة نظر ..

أنا أشهد إنه نادر..

أخوك/ أبو عبدالعزيز

[ضميان ابوحمد]

السؤال هل هذا الطير فرخ أم جرناس هوى وهل يمكن تحديد ذلك من خلال الصور سؤال للصقارين00000 ؟

[مقداد]

مرحبا اخي ضميان

نعم يمكن تحديد الطير بسهوله وهذا قرناس هوا واضح جدأ


ومشكور يالمري والله يطيح واحد مثله في يدك السنة المقبلة

أخوك // مـقـداد

[مران]

يالله حي اخوي بومعيض كيف حالك وماقصرت على هذه السالفه وكالعاده مبدع

[المري]

مرحبا بالجميع وحياكم الله وماقصرتو..

بس الطير قرناس هواء مافيه كلااااام حتى من الصورة واضح جدا جدا , وخاصة من صورة منحره..

وسلامتكم

اخوكم - المري

[قلب شاهين]

السلا م عليكم ،،

والله يالمري الطير هذا سالفته سالفه لكن اظن سعره غالي مره لكن الله يرزق الجميع ،،

ملاحظه :

الطير قرناس هوا ,,

[*الـزيـن*]

السلام عليكم

280 الف يعني وش بقى 300 الف

ماادري يا المري كم مقاسه ماني متأكد من الصوره اخاف ظالمته

وبعدين يكفي انه قرناس هواء بس مو بالسعر هذا

الا اذا الي يساومون الطير تحدي بس على فكره كم طلع على اخونا الغالي فالكون7




اخوكم الزين

[راعي ساموده]

السلام عليكم ورحمة الله
ماشاء الله تبارك الله

انا قد سمعت عن زهراني بالقنفذه او حولها صارت له حول هالقصه وباع الطير بحول الميتين وفيها ( يمكن يكون هو ) وجا الخبر بالجريده -
(شاب سعودي يخرج من بيته بلا مال ويعود بميتين الف ريال)

[فنجون]

الطير عادي جرناس حمرهواء وشكله عادي لا هو اشقر حتى يستاهل هالمبلغ

[فنجون]

والا كلامي ما هوصحيح

[المري]

كلاااامك صحيح يافنجون .. وماقصرت ..

ااخوكم - المري

[الوشاح]

مشاءالله تبارك الله


الله يهني راعيه فيه يصيد ويفيد

والله يالمري ولا يهونون الربع منب راعي طيور


لاكن شدني الموضوع

280 اعتقد فيه شي من المبالغه

لاكن هذي الهوايه مثل باقي الهوايات مكلفه جدا

تحيتي لك

[شبراق]

مشاءالله الله يطرح فيه البركه لخونا فـــــــــــالكون 7

[أبو رداد]

مشكور يابو معيض على السالفه
والطير مدفوع فيه ثلاث او اربع اضعاف حقه
وتصير مثل هذي البيعات اذا صار في الموضوع مزاود وشحن بين التجار
,,,
الله يهني راعيه فيه ويعوضه عن المخاسير
ويرزق جميع المسلمين
والسلام

[الزاجل الازرق]

هلا ومسهلا باابومعيض

بالنسبه للطير يستاهل اذاكان قرناس هواء وجناح الطير طيب

ولكن صحيح السعر غالي عليه

واذا ماخاب ظني ان الطير قياسه 17 * 17

الله يبارك للبايع والمشتري ويوفقهم

والله يارزقك ياابومعيض فرخا أشعل او اشقر يارب

سلمت وسلمت يدينك على هذا الموضوع



اخوك ابودغيم

[ابرق العزاف]

مشكووووووووووور
وبالتوفيق للبائع والمشتري

[هاوي مقناص]

السلام عليكم ورحمة الله وبركاته

ماشاء الله تبارك الله

الطير طيب بالحيل يالغالي ابو معيض .


والله يهني البائع والشاري

وعسي فالك احسن منه يالغالي ابو معيض

لك اجمل التحيات .

اخوك :
هاوي مقناص

[راعي الشرفا]

مشاء الل طير مبروك لرجل مبروك

[*سرحان*]

280 الف !!!!
انا اشهد انهم توهقوا فيه

[peregrine]

الله يبارك للشاري والباع ويعطيك العافية ياابو معيض

لكن سؤال "وعذرا على التطفل"

ليش غالي زيادة

[ابو شيخة]

الله يعطيك العافية

[501]

ما شاء الله على ذا الطير
ومن وقفت الطير تعرف فعله
الله يجزيك خير يا ابو معيض
على النقله الطيبه عن الطير
501

[الوعيلي 711]

والله الطير طيب
مشكورمحبوب ع الموضوع
تقبلووومروري

الوعيلي

[الفهد11]

صور الطير للاخ فالكون
لكن وين الاخ فالكون يعطينا تفاصيل اكثر عن الطير وعلومه

شاكر لك يالمري نقلك الجميل .

[قرناس حائل]

الله بكتب اللي فيه الخيره ان شاء الله
ما شاء الله طير حلوا الله يبارك لراعيه و يطعمه من صيده ان شاء الله
اما بالنسبه لقيمة الطير فهذا هو البيع و الشراء
اخوكم : قرناس حائل

[نايف الخالدي]

يعطيك العافيه يابو معيض
ومشكووووووووووور وماقصرت على هالموضوع

[طارق الحربي]

شكرا يابو معيض

انا اشوف مع احترامي انه مايسوى هالقيمة

تحياتي

[حطاب 123]

السلام عليكم ورحمة الله
الطير صحيح بيع ب280000والي شراه هو علي بن جدعي رحمه الله ولكن الطير لم يقسم له بيعه في اول الموسم ثم جلب الطير الى الرياض وبيع ب25000ريال اخر الموسم ثم خرج الطير وبيع وهو وحش . تحياتي للجميع

[الوافي عزام]

الله لايهينك يالمري

وبالنسبه للطير زين مهوب ردي لاكن القيمه لك عليها شوي !!!

وبالتوفيق للجميع

[عزام 2]

والله يابو معيض السالفه اللي عندي ماهي كذا

ولكن انت تقول ان احد الاعضاء شراه

ولكن الطير جلس عند القحطاني اقصد الجدعي الى اخر الموسم

ومن ثم هو اللي نزله سوق الرياض وكان بيننا اتصال معه

والطير كانت رجله توجعه وراح بسعر قليل بالنسبه لسعره

ولك تحياتي

[خيال الصبحا]

وعليكم السلام
يابو معيض
وش سر مواضيعك؟؟
أدخل للنت اليوم ، وادخل ثاني
يوم وأشوف الردود قومه وقعده(ماشاء
الله تبارك الله)أحسب أن الموضوع قديم ، ولكن
ادخل للأستفاده والقاه مكتوب اليوم.
المهم بخصوص الطير والقيمه الي من حظ البايع
أنا يسولف لي أخونا العضو بمنتدى مكشات بأسم(صاحب
الطير)يقول أن الطير وقف سعره حدود 80 الف أو ادون شوي
المهم قام هو وفرق السومه ، وقامت الناس تزود ألين وصل 280الف
يعني السالفه صارت منافسة ، ويقال أن راعي الطير أنصرع بالمجلس يوم
وصل السعر 280 الف (يعني ماكان يحلم بها) ويقول أخونا صاحب الطير
أن الطير جابوه الرياض وبيع بحول العشرين الف(ماني متذكر كم بالضبط)
، وأن راعي الظير سامح الي شروه بحدود نص المبلغ يوم عرف أنه أنباع بطفاس ،وشكرًا

[وليم]

يااخوان كلامكم علا العين والراس شراه علي بن جدعي رحمه الله 280 الف وتوفى الله يرحمه ومراكثر من شهر علا وفات المرحوم وا تصل ابنه على المحرج ابو سلطان وقال انت خابر مشرا ابوي باالطير قال ايه قال ابي ابيع الطيرقال ابوك شاريه غالي وفيه عذروب ان احد اصابعه منقطع والطير مثل البنت كل اي شي يعيبه قال ان واحد من الشيوخ قد سامه 100الف قال الكلام من زمان والطير فيه عيب مهوب بسيط المهم جابوه للحراج وصل 18الف وحده الولد 20الف وبيع والله يرزق الشاري ويعوض علا البايع

[خبت قوس]

السلام عليكم
أخوي المري ولاهان جميع الأخوة الاعضاء
بصفتي احد قناصة الساحل ومن قناصة مجيرمة أحب أوضح لكم خبر الطير المذكور في السالفة وهي :
إن القناص خلف الزهراني هو من طرح الطير في خبت يسمى الدوايا بطريق الساحل شمال محافظة القنفذة وهو قناص مبتدئ ولكن كان بالقرب منه قناصه ساعدوه في طرح الطير وحسب ماذكر انه رمى القمري لطير آخر وفجأة وهو بالطير الحر على القمري وعلق وأمسك بالطير واتجه به إلى مجيرمة إلى عزبة مسعد بن العود كبير صقاري الساحل ووصل الطير هناك قبل صلاة العشاء وبدأ تجار الطيور في التوافد لهذه العزبة وبدأ السوم بثلاثين ألف من بن جدعي ولكن سطام بن ضويحي اكلمها مائة ألف على طول وبقي هناك تنافس بينهم إلى أن وصل السعر إلى مائتان وثمانون ألف واستلم صاحب الطير مقدم خمسة عشر ألف على أن يستلم الباقي بشيك في أقرب وقت بكفالة رجال المقناص ، وبعد فترة قاربت الشهر والنصف في انتظار الباقي من قيمة الطير أتي بن جدعي شاري الطير ومعه ربعه يفيدون بأن معزبهم لايرغب بالطير وأن قيمته عالية وبعد مداولات وصلح تم تسليم صاحب الطير مائة ألف ريال وصارت قيمته الحقيقة مائة وخمسة عشر ألف ريال وانتهت بالصلح بهذه القيمة وأما أين ذهب الطير وكيف كان وهل قنص أو ماقنص فأنا لاعلم لي به واطلب العذر والسموحة منكم على الإطالة ولكن حبيت أوضح لكم ماحصل .
كما أفيدكم بأني أول من نقل خبر هذا الطير وقت طرحه مباشرة وهذا الرابط
http://www.mekshat.com/vb/showthread.php?t=60761
آمل أن أكون قد وفقت في نقل المفيد من تفاصيل هذه القصة ولكم مني خالص التحية والتقدير
الاسم بمنتديات مكشات قناص الخالدية ، الرمز على الجهاز / هاوي المقناص

[hawwamT]

هذا الطير تعليقة هامور كبير لهامور صغير واللي راح فيها مسكين الزهراني..الله يعوضه

[السمح]

شكراً يا بو معيض على إيراد القصة التي استمتعت بها مثل بقية الإخوان

والشكر موصول لأخي الغالي قناص الخالدية على تصحيح أجزاء من القصة التي كانت قريبة منه

سبحان الله اللي يعطي ويهب من يشاء

تحياتي

[القناص887]

يا نا الله رزقه ومشكور أخوي على الخبر

[المنصوووري]

أخوي المري أنا أقول أن الموضوع منافسة مثل ماقال أخونا خيال الصبحا

ولا الطير مايسوى هل القيمه

ولله يوفق ألي شراه....... تقبل مروري

وسسسسسسسسسسسسسسلامتكم.

[حزام سبيع]

الله يعطيك العافيه يالمري
ويعوض الجميع

[بوخالد الكعبي]

ماشاء الله عليه الله

[راعي مسكت]

يستاهل فالكون 7 كل خير
والطير ما شاء الله عليه مسكت

[حيدرة]

السلام عليكم

مشكور قناص الخالدية

وفيت واسكت قول كل متحدث

[طـير شلوه]

سلمت يقناص الخالديه على التوضيح

[حب الوطن]

السلام اخي العزيز ( المري ) ماشالله على الطير واضحه الصلافه في وجه

هذا الشيك الطاير منوت الصقاره على فكره هذا المسمى يطلق على كل طير

يتذاكرونه الصقاره ولايطرحونه الى بعد فتره في مجيرمه الطير ياالربع يستاهل

القيمه والله يبارك لخونا ( فالــــــكن7 ) ويوفقه ومشكور اخوي المري

اخوك / مافيا