قصيدة اطراف لينه

[سعودي]

هذي قصيد للشاعر خلف بن هذال عن الابل حبيت اهديها لكل محبي الابل


أطراف لينه

الذود يا هذال يصخم حنينه=مابين شبك وبين قصر ودماله
وأم الحوير عندي اليوم شينه=رد الحوار وفك عنها الشماله
العين يوم تشوف ريمه حزينه=يسرح بها قلبي ويضوي لحاله
والفاطر العوجا عليها غبينه=ان رجعت للحوش جبن ونذاله
سقها برفق وخلها في سكينه=تمشي ويسقيها المطر من خياله
من حاجر تنطحك ريحه غرينه=شال العدف والريح تطرق زلاله
ان عاش راسي يالحيا تاصلينه=وتبدلين السر قفر بداله
يازين شوف العشب الخضر يازينه=قبل شهر شعبان ينقز هلاله
حوايج العطار باطراف لينه=شمال اعويج والخشيبي شماله
والذ وأطيب من عطر المدينة=ما ساق فيها شاري العطر ماله
بالروض كني جالس في سفينه=ترقد مخازرت السلق في ظلاله

[ابو عمر اللاحم]

الله يعطيك العافيه وصح لسانك اخوي سعودي.

تحياتي ،،،

[ف.البشري]

سعودي

مرحبا

شكرا لك على هذا الاختيـــــار .

[رحــــــــال]

قصيدة معبرة من شاعرلا يكتب إلا الجزل من القصيد

مجهود تشكر عليه..............


ولك مني أجمل تحية ...............

[أبو صحن]

السلام عليكم

حيى السعودي وحي ماجاب

قد طلبتها من واحد من الأعضاء وعدنا بخير أنه إذا قدر بينزلها بموضوع لكن الظاهر أنه نسى وحنا عزينا عن طلبنا واللحمد لله جابها بليا منه

مشكور أخي السعودي وخيرها بغيرها ياصاحبي ياراعي لينــــــــــــه

سلام

[سيف السيف1]

مشكور أخي سعودي على هذه القصيدة الرائعة للشاعر خلف بن هذال
أخ سعودي فيه كلمه أتمنى أ ن يتم تصحيحها وهي الخشيبي وليست الخشيفي,, ولك كامل الشكر.
=======================================
:( أخي العزيز ابو صحن يعلم الله أني بحثت عن هذه القصيدة عدة مرات ليتم إنزالها في المنتدى بناء على طلبك , فلم أجدها وبهذه المناسبة أقدم إعتذاري لك:( أخي ابو صحن الحق علي وانا مستعد أقوم فيه , تبي الذبيحة في لينه الأسبوع هذا تراها جتك وتستاهل أكثر , أنا في إنتظار ردمنك...:BUTT1:

[أبو صحن]

السلام عليكم ورحمة الله وبركاته

أخي العزيز أبو فارس يكفيني ردك ومافيه داعي تعتذر

أما بخصوص الحقوق ترا مامن حقوق مابين الأخوان مجرد مشاريه وردها

وذبيحتك مقبوله وموفوره يا بعدي وكن سايل دمها من يوم كتبت ردك بلون الدم (يفهمها وهي طايره)

الطيب أدراء شرهته لا تشره******وأحسب حسابه قبل يشره عليه

[سعودي]

الاخ العزيز ابو فارس

السلام عليكم ورحمة الله وبركاته

شكراً على الملاحظة ولاكن للاسف لااستطيع عمال التعديل الان
انما مشرف المنتدى لو يتكرم مشكوراً بعمل التعديل اللازم

تحياتي

[laith]

الاخوه الكرام..

مشاركه جميله والحق يقال..من عضو كله ذوق..

وردود اجمل..من اعضاء اجمل واخص الاخ ابو صحن ......

وبالذات ابيات التوقيع..

اخيكم ليث...ابو حمد

[akhan]

ابيات جميله وعذبه