انا على المقناص قلبي يرفي [الأرشيف]

مشاهدة النسخة كاملة : انا على المقناص قلبي يرفي

برق المزون

25/06/2007, 10:56 PM

اعجبتني هذه القصيده ونقلتها لكم

انا على المقناص قلبي يرفي
بكره ونرجع يم آهلنا منا كيف
بديار لفروق الحبارى اتلفي
جنوب من حزم الجلاميد وطريف
الطير هو غاية غرامي وشفي
اقدره تقدير الاجواد للضيف
من كبر قدره شايله فوق كفي
وراعاه تسع اشهور بالقيظ والصيف
ودهنه لاشفت ريشه مصفي
على الدعاء وخفف النسر تخفيف
نقله يشرفني وشوفه يكفي
عن شوف ناس ما تعرف المعاريف
لاشفت لي نو ابروقه ترفي
نويت اجهز موتري للتكاليف
القيظ كله جالس ومتعفي
برد المكيف نشف الدم تنشيف
متى سموم القيظ عنا تقفي
وسهيل قبل يعمد الفجر قد شيف
والنار يصلح شبها للتدفي
البرد نوجس من نسيمه هفاهيف
قمنا لعزبتنا نشيل ونظفي
ونكمل الناقص ونملا المظاريف
اللي نشيل من اللوازم امكفي
امكتفين العفش بالحبل تكتيف
يمكن ليا جينا البقاله انوفي
حاجات نشريها كمالة مصاريف
والصبح من حزم ابرقيه امقفي
صوب المعظم والهضاب المواقيف
بديار جعل اشجارها ما تجفي
تعلها غر المزون المراديف
في رفقة اللي نارهم ما تطفي
على الشرف والجود ربع مواليف
مجلاس طلقين الشوارب امصفي
على الدلال اللي بهن ساخن الكيف
خويهم ما وجس كلام يحفي
غير المزوح الطيبه والسواليف
عقال وزن عقولهم ما يخفي
ولاهم على الفاظي خفاف وملاقيف

برق بريده

26/06/2007, 01:18 AM

تسلم يا اخوي برق المزون
عاى القصيده الله يعطيك العافيه

((الخالدي))

26/06/2007, 01:21 AM

القصيدة منشدة واللي منشدها حامد الضبعان

بس ياليت تذكر من اللي قايل الصيدة ومنشدها عشا ما يكون فيه تنازع

سلطان العوني

26/06/2007, 01:49 AM

الله يعطيك العافيه
قصيده كايفه وصح اللسان شاعرها

جبل راف

26/06/2007, 02:29 AM

صح لسان شاعرها وشكرا لك على النقل الطيب ياطيب

برق المزون

26/06/2007, 03:44 AM

القصيده لآ أعرف قآئلهـأ وكل مآفي الامر أعجبتي وأحببت أنقلهـآ لكم وتستـآهلون كل خيــــــــــــــــر

للمرجلـه سعرٍ ولآني بسوآم أشري ولو كـآن الثمن سمع وابصــآر

أشكركم على المرور الطيب

راشد بن محمد

26/06/2007, 08:49 AM

هذه القصيدة لشاعر الوصف والقنص

بدر الحويفي

والذي دائما ما يبدع في القصائد المقناصية ووصف الربيع والإبل ,,, ودائما يترك الأعراض

ابوشجاع911

26/06/2007, 08:59 AM

لو اني ماشفت ردك يا راشد بن محمد كان قلت انها لعبدالله بن عون

لاني سبق وقرأت له قصيدة عن المقناص في هذا المنتدى وهي رائعة فعلا

ياليت احد يجيبها لنا ان امكن

سبيع الغلباء

26/06/2007, 11:30 AM

تسلم يبرق المزون
واختيار جيد
ومشكور على النقل الجميل
بارك الله فيك
تحياتي

برق المزون

26/06/2007, 10:13 PM

اشكركم على المرور الطيب

علوم المقناص تشرح الصدر

الله يصبرنا على الحر لازم نهاجر زي الطيور المهاجره :confused:

با الصيف همي زايداتٍ رفوفه = ما غير ابدل بين شاشه وشاشه

وين الغيوم وين مزنٍ نشوفه = انا اشهد ان الوقت عجل انتحاشه