موضوع بيخالفني عليه الاغلبيه لاكن ماعليه .

[قشاع الرمث]

السلام عليكم ورحمة الله وبركاته

الكثير منا يبعد صحن الماء عن الطير
وقت المقيظ يعني الطير ياله يلحق الماء
ببوزه والسبب هو الخوف عليه
من الحفا . وانا اقول الكلام هذا مهو صحيح ..:no2:

وكلامي عن تجارب .

مر علي اكثر من طير بهن حفا وبعظهن
كان الحفا قوي بالحيل وكنت اغسلهن بماء
كل يوم عقب العلف واحياناا بماء وملح
والحمد لله عتقن . طبعا بتوفيق من الله .

والي اعتقد انه هو من اهم اسباب الحفا
هو الدم والمروش اعزكم الله . واي طير
به حفا ويجلس على دم او مرش حتى اذا كان
على رمل تسوء الحاله وغالبا تقلب سده .

وفيه دليل يؤكد كلامي وهو الطيور المقيظه
طلق تطب بوسط الماء وتحفر بجوانبه بالرمل
الرطب ( الثرى ) ولاكن باقي الاوقات على
شباب ( جمع شبه ) نظاف وغالبا من الزرع
ونادر ما تحصل بهن حفا . بالعكس الطير الي فيه
حفا بسيط يروح باذن الله . للمعلوميه ترى ما لي الا
ثلاث سنين اقيظ طلق ...


اتقبل كل الاراء بصدر رحب .


والله يكفي طيورنا وطيوركم الشر ...

[صقار قديم]

السلام عليكم و رحمة الله و بركاته ،

أوافقك الرأي 100 % اخي العزيز ..

تحياتي

[طارق الحربي]

ابو حماد انا معك

انا قبل كان عندي فكره ان الرمل الرطب يزود الحفاه ويحولها الى سدة بعدين عرفت انه غلط الدم الباقي من العلف والمرش وانت بكرامه هي اللي تزود الحفاه

تحياتي

[عبدالله هدد]

وعليكم السلام

الله يعطيك العافيه ونا اشهد على كلامك

وشكـــــــــــــــــــــــــــــــــــرا

[محمد الفهيد]

السلام عليكم و رحمة الله و بركاته ،

أوافقك الرأي 100 % اخي العزيز ..

تحياتي



اضم صوتي معااه
تحياتي لكم

[مدرب الطير]

مشكور اخوي على المعلومات المفيده وفيه علاج الا الحفه
وهو وضع ((بصل)) على الوكر الذي او الاماكن التي يجلس فيها الطير.
هذا ماعندي

وتقبل تحياتي

[قشاع الرمث]

السلام عليكم ورحمة الله وبركاته

الاخ صقار قديم اسعدنا مرورك

طارق الحربي مرحبا ومسهلا
ومابه شك . خذها عني .

سهيل 12 ( عبدالله هدد )

مرحبا الف

محمد الفهيد مرحبا بك

الاخ مدرب الطير
والله وانا اخوك جربنا كل شي
مافيه احسن من المحافظه على
نظافة الكف.
قالو حط ملحة الغنم .
وقالو على رمل .
وقالو على انواع من المراهم .
وقالو طحين بر يعجن بزيت زيتون .
وقالو طين وملح .

وكلهن ما نفعن .للاسف .

وبانتظار البقيه .

[الدبل الثقيل]

وش يعني الحفا بالنسبة للطير؟ لأني ماني صقار....

[نايف الخالدي]

اقول كيف حالك يابو حماد
انا ببين وجهت نضري البسيطه الى وهي
ان الخوف من الماء انه تلين جلده الطير وبعدين يسهل جرحها بسهوله اذا لانت جلده الكف وتسبب حفاه
وهذا رايي وارجو ان تتقبلوه

[طارق الحربي]

الشك زايل يابو حماد

[سنجااار]

كلامك سليم 100% ولا هانوا الرجال
اخوكم مشروك

[شبراق]

المقصد من ابعاد الماء مهو خوف من طب الطير على الصحن ويشرب ويرجع هذا بذن الله ما منه خوف الخوف من الرطوبه الي تكون بسبب قرب الماء من الوكر اذا صار مكانه رطب يسبب حفى لكن اذا كنت مبعده والي حول الطير يابس ماعليه بذن الله ا

هم شي مايمرح الطير على شي رطب اي ما يجلس اكثر من ساعتين على ماء او شي في رطوبه

هذي وجهت نظري وعذرون على القصور

[قشاع الرمث]

السلام عليكم ورحمة الله وبركاته

الدبل الثقيل :
الحفاه مرض يجي برجل
الطير مثل الجرح .

طارق الحربي
يا هلا ومرحبا .

مشروك
اسعدنا مرورك .

شبراق وجهة نظرك على راسي .

نايف الخالدي
يا هلا والله بابو احمد
انا بخير يعلك بخير .
لاكن عندي اعتراظ ( امون عليك ابعترظ )
بالنسبه للجرح في راحة كف الطير
ماله علاقة بالحفا نهائيا
الا اذا اهملت نظافة كف
الطير المجروحه ممكن تصير حفاة .

وللمعلوميه طيري الشتا الي فات
طق ( نش ) حصاة وانجرح
مع وسط راحة الكف وبعد فتره
بسيطه حول اسبوعين نشف الجرح
وطاح بدون ما يترك اي علامه او
قشر .
لاكن الحفاة فترة شفاؤها طويييله
وكل ما طاحت يطلع محله قشر (جرح )
اصغر من الي قبله وهكذا لين ما تقظي.

وطبعا غيرك معلم يا ابو احمد
بس بغيت اوظح .

والشكر للجميع .

وبانتظار البقيه .