متى على الله تبتدئ رخصة الطير...........بدر الحويفي

[البيطار]

بسم الله

السلام عليكم ورحمة الله وبركاته

هذي قصيده للشاعر الكبير بدر الحويفي......قاله بعد طول انتظاره لموسم الصيد ............ويتخيل فيها اللي راح يسويه اليا دخل الموسم.

ارجوا انه تعجبكم و تاخذكم مع الشاعر بدر برحلته للصيد...............




متى على الله تبتدئ رخصة الطير=وعقب الرباط يصف ريش القرانيس
والمزن بالمنشأ نشوفه مزابير=والبرق تالي الليل مثل المقابيس
ابي إليا قالوا مشينا على خير=والراي شدوه العيال المدابيس
وتواعدوا عقب العتيم المناعير=مسرى تحت داج الظلام الغطاريس
ربع لهم عندي معزه وتقدير=مدلهين اللي بقلبه هواجيس
وافين باللزمات ماهم مثابير=شيالة الكايد إليا دنق الهيس
يبون من خشم المسمى محادير=نشمل إليا لوقا ونجنب الى التيس
لوقفوا بارضـ(ن)بها اثلها وتأثير=وفكوا براقعهن حرار(ن)فواعيس
والطير تل وشافهن بالعثامير=الخرب كوبر والطبايل مفاليس
واعلقبه اللي يمزر الريش تمزير=اللي مخاليبه سواة الدبابيس
واللي تروح طيار ما عينت خير=شيهان نكسها على القاع تنكيس
نادر بحر ياخذ عليها مشاوير=ماهو بوكريـ(ن)يهاب الدماميس
وإليا تلافوا بالمعشى مناعير=في خايعـ(ن)جرمه سواة الكناديس
وشبوا وقادوا للسوالف معابير=والنجر يلعي والمباهر متاريس
خفاف النفوس رجال ماهم مثابير=ولامنهم اللي فيه كبر(ن)ولا خيس
وجوهم يبون الكيف ربعـ(ن)مسايير=قالوا علوم الربع قالوا عواسيس
نذكر لكم جول(ن)رثعنابه عصير=حازن من الخبه يبن الطعاميس
في ماقعـ(ن)عقب المطر مابعد ذير=تومي بنواره هبوب النسانيس
والصبح مدوا للحراوي مداوير=وطاحوا بجرتهن جداد ومداريس
وحثوا بهن بالخور مثل الطوابير=وتزارقن من جذوع الشجر والمتاريس
وتنهض اللي كن عينه سنا الكير=كد ذوقوه من الثنادي تلاميس
والخرب قام يحوز دون المعاشير=وزته وطار الريش مثل القراطيس
ومدوا عليهن مبهمات المواصير=شغل الفرنج مقورمات النواديس
وصادوا و وفقهم ولي المقادير=واهل الوكارى ربطوهن مفاليس
هذي حلاة الصيد وقت المخاضير=وبعض الصقاره يعلم الله مطاريس




..........................وهذي اللي طلبتها ياتالي الاولين والعذر على التأخير

والسلام عليكم

[ابو عايد]

وشبـوا وقـادوا للسوالـف معابيـر= والنجـر يلعـي والمباهـر متاريـس
خفاف النفوس رجال ماهـم مثابيـر=ولامنهم اللي فيه كبـر(ن)ولا خيـس


الله يعطيك العافيه


تشكر والله على الابيات الجميله ، وصح لسان الشاعر وصح لسانك , والاختيار والابداع الرائع


شكرا مره اخرى أخي البيطار

[المري]

اخي البيطار تسلم على هذه القصيده الرائعه


وصح السانك والسان الشاعر-بدرالحويفي

[السمح]

مشكور أخي البيطار على هالاختيار الرائع ..
والذي يدل على ذوقك الرفيع في اختيار القصيد الجزل ..
كثر خيرك .. وصح لسان بدر الحويفي وعز الله هذا الشعر الذي ينبض بالحياة ، والصور الرائعة ..
ننتظر المزيد ..

أحلى تحية ..

[رحــــــــال]

للــــــــــــــــــه درك يالحويفي

[وضح النقا]

~


تسلم يالبيطار...


وصح لسان بدر الحويفي..


تحيات


اخوك


وضح النقا

,

[ف.البشري]

البيطار

يا مرحبا بك

تسلم يالبيطار على هذا الاختيار للشاعر العملاق بدر الحويفي

هذا الشاعر المبدع وهو احد عمالقة الشعر في الوقت الحاضر

بالرغم انه ليس مخدوما اعلاميّــــاً , لكن الجيد يفرض نفسه .

اكرر شكري لك .

[تالي الاولين*]

.


يعطيك العافية وانا اخوك

وعزالله ماقصرت

وبيض الله وجهك


لك كل الشكر اخوي البيطار


.

[المري]

اخي البيطار بيض الله وجهك على ورود هذه الابيات اللي ان شاء الله ان وقتها


قرّب.


صح السانك والسان الشاعر/بدر الحويفي

[البيطار]

ابو عايد......المري.........السمح.....رحــــــــال.... ..وضح النقا......ف.البشري.....تالي الاولين*


الله يسلمكم ............و يكفيني والله منكم ياأعمدة المنتدى مروركم على الموضوع فكيف بتكرمهم بالردود...........

ومشكورين والله .......وارجوا اني اكون عند حسن ظنكم......

ومادام هذا طبعكم...فوالله حنا من ربعكم........وابشروا بإذن اللي ماتنام عينه باللي يعجبكم

[نقا هشال]

البيطار

تسلم على النقل

وصح لسان الشاعر