العيادات البيطريه

[الطبشي]

الكوكسيديا ودود الكبد والتهاب الامعاء امراض لابد من وجودها في كل طير يخرج من العياده واذكر هذه القصه طيرمصاب التهاب امعاء وعولج الطير من قبل العياده وعمل اعاده فحص واصبح سليم واخذ محط الطير السليم لطير لم يفحص من قبل وفحص المحط ووجد به كوكسيديا والله المستعان ماردودكم على هذا الموضوع

[قناص جبيل]

السلام عليكم ورحمة ا لله وبركا ته


اخوي الطبشي لنسبه لموضوعك أمراض لكسيد يا

ودود الكبد والتها ب ألامعاء من العلف وهو الحمام

اخوك قنا ص الجبيل

[المري]

مرحبا ومسهلا بأخوي الطبشي وحياك الله يالغااااليِ...

دامك جبت هذا الموضوع سوف اتكلم باللي في خاااطري:

كلااااامك هذا اقوله ويقوله اغلب الصقاقير اللي نواجهم في الدعو وفي المجالس وفي اسواق الطيور , يقولون : الدكاترة يلعبون علينا

بقولهم ان اطيورنا في كذا وكذا واطيورنا مافيه الا العافية !!! وكنا مع كلامهم ..

ولكن في الأونه الاخيره اصبحت انا اللي افحص اطيوري في البيت وافحص اكثر اطيور الجماعة اللي حولي , النتيجة 90% من الطيور

مصابة بكوكسيديا ودود أمعاء ودود رئة وغيرها من الامراض المعروف , وكل طير يختلف من طير , فأحد الطيور تجد معه كوكسيديا بنسبة

99% وبعضها 20% وبعض الطيور تحد معه دود أمعاء بشكل كبير جدا وبعضها ماتجد معه الا القليل..

بعد العلاج ولمدة اسبوع واحد يعاد لها الفحص فتجد اغلبها شفي تماما..

على فكرة أكثر الطيور المربوطة واللي علفها (( سمن )) تجد فيها منتشر الكوكسيديا ودود الأمعاء بشكل كبير , يعنى اذا عندك 50 طير

يمكن منها 35 طير مصابة وتجد ال 15 طير الباقية مافيها شي او فيه بسنب قليلة جدا...ويقولون السمن مايجيب هالسوالف؟؟

بس يمكن قبل المربط يكون معها هذا المرض.!!!!

وسبحان الله من تجربة الخاصة, الطير اللي يجيه الرداد تجده خاااالي من الكوكسيديا ودود البطن !!؟؟؟ ماادري وش السر في ذلك..


وسلااااامتكم وارجو اني قد افدت في هذا الرد..


اخوكم - المري

[راعي عقاب]

مشكور اخوي الطبيشي على الموضوع واشكر اخوي المري على الرد الوافي
الذي افادناء جميع

[المري]

هذه أبرك الساعات ياراعي عقاب يوم افاد ردي اللي مثلك وشرواك..

وجعلك سالما يالسنافي..

اخوك - المري

[عزام 2]

مشكور يالطبشي على الموضوع

وابو معيض ماقصر

ولا لنا رد خلاص ابو معيض وراعي عقاب كلهم ماعليهم كلام

تحياتي للجميع

[صارووم]

بسم الله الرحمن الرحيم
لاهنت ياخوي الطبشي على هالموضوع .. والمواقف والمشاكل مع هالمراكز الصحيه
كثيره ... الأكيد انه مافيه مركزصحي ناجح لدينا ... وهذي مشكله كبيره .. ( مافي زود الحكي فايده )
أخوي ابو معيض ... صبحك الله بالخير ..بالنسبه لجهاز الفحص الي تقول .. وين أحصله ؟ وكيف دقته بالنتايج ؟
ومشكووووووووووووووورين ..والله يعطيكم العافيه

[المري]

مرحبا ومسهلا بأخوي صارووم ..

أول شي يبغالك دراسة وبحث عن هذه الأمراض والتعرف عليها ..

ولازم تدرس الشي القليل من البيطرة حتى تتقن هذا الفحص..

بخصوص الدقة : دقيق جدا ويخبرك ويش مع طيرك حتى مايأخذ 5 دقايق..

ويطول الشرح .. بخصوص وين تحصله ؟ لازم انك تعرف لك دكتور مختص في هذا الشغلة علشان يختار لك الجهاز المناسب للصقور

واسعارها غاالية..

وعسى الله يوفق الجميع..

اخوك_ المري

[المري]

ولازم انك تعرف الصور المجهرية لك مرض حتى تفرق بين المرض والاخر , لان اغلبها متشابه في الصور المجهرية..

الشرح يطول ولكن بأذن الله مافيه شي صعب ..

الله يحفظكم ويرعاكم ..

اخوكم - المري

[501]

ما قصرت يا الاستشاري
(ابومعيـــــــــــــــض)
501

[الوافي عزام]

السلام عليكم ورحمة الله وبركاته

بالنسبه يالربع للأمراض وخاصه الديدان والكوكوسيديا وغيرها من امراض داخليه فهي طبيعيه جدا

والسبب لان الطيور طبيعتها ومعيشتها بالخلا والهواء الطلق والغذاء البري النظيف الذي لاشك بوجود الامراض به

وحنا يا الصقاقير ماعندنا غير حمام والا سمان !!! لو تشوف وش غذاء الحمام والسمان كان علوووووم

كل غذاها فيتامينات ومسمنات كيميائيه معروفه بأسماها مثل اراسكو وغيرها

ولو الواحد مايعلف طيره الا حمام بري وجرابيع وغيرها من الاشياء الطبيعيه ماجته هالامراض بارادة الله


وبالنسبه للمستشفى اللي بالرياض انا حصلي موقف معهم العام اللي راح :
جبت لهم طير كان له شهر طالع من الربطه وكان يعاني من التهاب بالتنفس ووزنه نزل بسرعه مع اني خليته كم يوم مادعيته واعلفه ولا طلعت بنتيجه

قلت بروح للمستشفى واشوف . وعلمتهم علوم الطير من طلع معي من الربطه وخليته عندهم واخذوا مني قيمه وقدرها يقولون علاج وفحص وتامين والطير لازم ينوم
انتظرتهم يتصلون علي مثل ماقالوا لاكن ما احد اتصل وطلعت من عملي ورحت لهم الصباح وسألت عن الطير وراحوا وجابوه لي

وياليتني ماشفته بوز الطير عليه منالعلف المتراكم من ايام والبرقع مليان علف من داخل وعينه ماعاد هيب طيبه وفيه ريشه بالذنابه منكسره

قلت طيب وش صار عليه قالوا ابشر وزنه زاد عن اول ؟؟؟؟ قلت انا اسالكم عن المرض اللي فيه واثرهم مايدرون وش السالفه ورحت للمدير ويم درى عن الموضوع قال بنرجع فلوسك وبنعالج الطير على حسابنا ولا لك الا اللي يرضيك

قعد الطير عندهم 15 يوم بدون نتيجه واوديه للعويدي ولا عرف له علاج عطاني قطرات وحبوب ولا نفعت
والطير ماعاد لي خاطر به ابلشني وانا يالله القى الوقت الفاضي اقضي اشغالي

ووديته للسوق وبعته بقيمه مهيب قيمته لاكن ارتحت منه وشريت غيره

والسلام عليكم

[المري]

مرحبا اخوي الوافي عزام.. ترى مثل هالتجارب تعلمنا وتبصرنا ببعض الأمراض..

اذا جاك الطير يأكل ولا يكسب يعنى دائم ضعيف , وشيكت عليه ولا حصلت مع شي من الديدان من المحتمل ان الطير معه رداد!!!

لان الرداد اذا تمكن من الطير خلاص تحصل الطير ماعاد يصير صنيع ويأكل ويصرف بس انه مايستفيد شي من أعلفه , فعرف ان طيرك

مع رداد ( العفن) الله يكفينا شره ..

وسلامتك

اخوك - المري

[وقاااااد]

الطبشي لاهنت على الموضوع الجيد ، وبالنسبه للخبطه الي تتكلم عنها هذي نتيجه اهمال العماله وعدم التشديدعليهم والدكتور ماله ذنب لأنه يفحص اللي قدامه 0

ابو معيض لاهنت على الرد الوافي 0 و هل الكوكسيديا تضر الطير وماهي اعراضها 0

[المري]

مرحبا اخوي وقاااااد ..

اولا: هي طفيليات تعيش في بطن الطير وبالتحديد في الأمعاء.

أعراض الكوكسيديا:

1- تسبب في أسهال شديد لنا الطير ( حيث ان بعض الطيور يصير هزلان وذلك بسبب الكوكسيديا)!!!
2- تتسبب في اطيار الطير: فتجده الطير مايطير الطيار المطلوب , وارتفاعه لك عليه , ماعاد يرتفع مثل اول..
3- تتسبب في انعماش وجه الطير بعد العلف بفترة فتعرف ان الطير يونس شي..
4- يصيب الطير جفاف فتجده يحب يشرب الماء بكثرة..

وحاااضر لأي أستفسار..

اخوكم - المري

[الوافي عزام]

والله يا ابو معيض معاد ادري عنه

آخر خبري به يوم وديته لراعي المحل وعطيته علومه وعلوم مرضه من الالف الى الياء وقلت له ترى الطير مهوب طيب اعلمك الصراحه

وشراه وبعد اسبوع اتصل علي وقال تعال تقهوى عندي بالمحل ويم جيته والا الطير عينه اليسرى منتفخه بالحيل ومع التنفس تنكمش وتنقبض
واستغربت وسالني عنه عينه قالت اول مره اشوف هالشي
جلس عنده الطير فتره وشراه ولد عمه وصقره وتعافى الطير وصاد معهم حبارى وعلومه زينه من ناحية السبق
ولاكن بعد فتره انتكست حالته وجابه ولد عمه للمحل وجلس عنده وحذف ريشه قبل المقيض بثلاثة شهور وهذا اخر خبري به

[فنجون]

اود ان اوضح ان اكثر العيادات يكذبون علي الزبائن ولا كيف يقوم بسديد ايجارات الفلل الكبيره وان قبل عشر سنوات لا توجد هذه الامراض واذا وجدت تم معالجتها بالعلاج الشعبي وهو الخيل

[وقاااااد]

مشكور اخوي المري على المعلومات
ياليت تفيدنا عن علاج الكوكسيديا هل هو سهل ولاكايد0
تقبل تحياتي اخوك / وقاااااد

[سنجااار]

يابومحمد الله يباركلك بالطير الجديد ويصير اخير من الاول
تقبل مروري مشروك

[المري]

مرحبا بالاخواان..

بخصوص علاج الكوكسيديا يجي منه ثلاث انواع:

1- بودرة توضع في ماء الطير..

2- حبوب تعطى الطير قبل العلف.

3- أبرة تعطى الطير عن طريق الفم.

وأحسن هذه العلاجات كلها هي الحبوب ومدتها أربع أيام ..

وسلامتكم

اخوكم - المري

[الوافي عزام]

يابومحمد الله يباركلك بالطير الجديد ويصير اخير من الاول
تقبل مروري مشروك

جزاك الله خير

وشكرا لك

[المزوحي]

الله لايهينكم الطبشي وابو معيض على الموضوع والاجوبه اللى فادت الصقاقير

[رآعي آلبآترول]

سلام عليكم
مساكم الله بالخير يالربع
علومكم غانمه ومجالسكم فوايد
احب اسأل المري عندي 8 طيور في المقيض ودي اتطمن عليها من الامراض وش السوات
والله لانيب جالس انقلها واحد واحد للعويدي
مع العلم اني مانقدت عليها في شي ابد علفها زين وكل شي زين بالحيل
بس تخبر الواحد وده يرتاح
لو تعطيني اسم جهاز من الاجهزه ذا الي تقول اسأل عنه واشوف اعلومه

[طيرالحمــــاد]

علومكم طيبه ومفيدة دائما ياصقاره
دائمـــــــا
الوقاية خير من العلاج

1/ نظافة المكان
2/علف الطير
3/عزل الطير المشتبه فيه
4/أعطاء الطير كورس في القرناس وبعد طلوع الطير من القرناس
5/ نظافة كفوف الطير أثناء المقناص والدعو من بقايا الدم والعلف بأستخدام عطر الليمون
6/ أدوات الطير
7/........................................ الخ
.
.
يطول الحديث في طرق وقاية الطير من الامراض ولو فندنا كل نقطه ماخلصنا
المهم يقول الصقاره بأن هناك عشرة أسباب أتخلي الطير مايصيد تسعه منها من الصقار
وواحد من الطير نفسه
وانا أقول والعياذبالله من كلمة انا عشرة اسباب أتخلي الطير يمرض تسعه منها من الصقار وواحد من الطير نفسه
وجهة نظر اتمنى ان تتقبلوها بصدر رحب



ولكم تحياتي
أخوكم طيـــر الحمـــاد

[المري]

معلومة:

بعض الطيور عنده مناعة اكثر من الطيور الباقية . فتجده اقل الطيور عرضة للأمراض..

وبعضها مثل مروحة الشفط اذا مر عليه المرض مسافة 100 كيلو شفط المرض شفط..

[عـــرادي]

مشكور يالطبشي على الموضوع

وابو معيض ماقصر