ياإخوان بيني وبين الدافور زعل اصلحوا بينا !!!

[راضي]

بسم الله الرحمن الرحيم



والله يااخواني اني اخاف من وضع الدافور بشنطة السياره مع العزبه حيث اني لاوصلت للبيت

من مشواري انزله للبيت واخلي العزبه كله خوف من الغاز خصوصا مع حرارة الشمس اخاف تنفجر السياره الله يستر

وهو المسكين وده يكون مع العزبه لكن ماخليته حتى بعض الاحيان يضيق صدري لاصرت طالع

بالصدفه واذكر انه مهوب معي فتصير العزبه شكل مااستفيد منها .

فا وش رايكم الله يرحم والديكم هل حرارة الشمس ضاره له خصوصا اني وضعته في جراب

ومكانه داخل شنطة السياره .

افيدوني ماجورين ...............

[نايف الحربي]

انت راضي وتبي ترضى بحكمي :)


الحق راكبك من راسك الى رجليك :)



لكن رجعه مع العزبه ولا تحرمه منها

لأن الحراره ماهي ضارته حتى لو توصل 50 درجه ولاراح تاصل الخمسين بالسياره
وخاصة وهو وسط العزبه يعني في ضل


انتهى

[هولوكس2005]

وش الدبه زرقاء ولا قواطي كوفيا


كانه الزرقاء فاا ألغلط عليك زي ماقال اخوي الحربي ماهو علشانه من صبيح لأ لأنه يقول الحق وتسامح من من الدافور ورضه براس دافور طيب ياا ببريموس ولا كوفيا ورجعه لعزبته ولا تفرق بينهم


توكل على الله انا احطها بالعده في السياره أم لتر

وتبي تجربها جربها حطها تحت الشمس الظهر بالحوش لتأكد
لأنها حديد متين معليها ولا تملها مره إذا عبيتها



وهذي هي
http://www.mekshat.com/vb/showthread.php?t=94863

[راضي]

تسلم ياخوي نايف الحربي
مادام ان الحراره حتى لو تاصل خمسين ماعليه فانا راضي بحكمك
وتوكلت على اللي ماتنام عينه وشاكرلك افادتك لاعدمتك
ومرورك الكريم.....

[راضي]

هلا اخوي هولوكس 2005
الدبه نفس اللي معك الله يبارك لك
وان شاء الله برضيه براس بريموس
بس تعرف وانا اخوك من مصلحتي ومصلحته
لاينفجر علي بكره وابلش يوم شفته زعل
قلت احتكم لاالنشامى وهذا انتم ماقصرتوا
شكرا لك اخوي هولوكس على افادتك
ومرورك الكريم ...

[asa39]

طيب ياأخوان الله يجزاكم خير
وش الحل مع قصر مفتاح الدافور بريموس
دايم يكويني واحاول استخدم منديل او أي قماش
هل احد منكم وجد له حل
هل الافضل وضع هذه المشكله في موضوع خاص
الامر متروك لكم

[صبي غلباء]

اقول وانا اخوك نزله للبيت وخله يزعل يأخي انت عارف انه لو صار فيه تنسيم لاي سبب وتشبعت السياره من جواء بالغاز وفتحت الباب وولعت اللبه انه هذي قنبله الله يستر عليك الصحه هي راس المال
وشكرا لك

[راضي]

اخوي asa39
شاكر لك مرورك ومشكلتك والله ماعندي لها حل
لعل الاخوان يفيدونك الله يرحم والديك
تقبل تحياتي............

[راضي]

اخوي بكاتشو والله ان كلامك هو اللي اجبرني اكتب الموضوع
فعلا كنت خايف جدا من هالمشكله اللي اوقعتني بين نارين
لكن بيعين الله وبحاول اشوف لي دبره
تسلم لاعدمتك على مرورك وافادتك اللي في الصميم
تقبل تحياتي..........

[desertman777]

أخوي


..::..حسب تجربة..::..

الدافورمصنوع ليتحمل أقسى الضروف الجوية

سبق أن حاول بعض الشباب أن يرمي الدافور الازرق وهو مليان

برصاص شعال (زود هبال)

ولم يتأثر وما درى من بعد حوالي 70 متر أوأكثر


الله يحمانا وإياكم من جميع الشرور

والاحتياط واجب:good2:

[الكابتن]

اهم شى وانا اخوك لا ينفتح اثناء الاهتزاز بالسياره

وغيرها ماعليك خلاف ان شاء الله
تحياتى

[التوفير]

مخطي الا تحرمه من الثيه ميضره الحراره انه مينزل من السياره ابد وسلام ياء رضي

[الذيب الابيض]

اخي الكريم


لو تلاجظ . ان دبات الغاز الكبيره تكون غالبا في خارج المنزل والجو شديد الحراره ماضرها

اما دبة الدافور جيزها جيز دبات الغااز الكبيره ( ومعاك حق انك ماتركبها ) لكن توكل على الله وركبها

اخوك الذيب الابيض

[الساهر2003]

اخي العزيزي اهم شي اذا كانت السنه داخلية فيجب فك راس الدافور لسلامة الاشخاص لان كثير من الناس يركب الدافور في العزبه والراس راكب واي ميلان لراس يسبب تنسيم للغاز ومن ثم الخطر واذا مليت الدافور راح يكون فيه تنسيم بسيط جدا وهذا لا ضرر منه وكان معنا دافور مليان وبدون راس ونطامر به في الحوض ومره يضرب في حطب ومرة في ثباتات الخيمه ولا صار الا كل خير لكن احرص على التشييك على الاسطوانه كل فتره وخذ الاصلي
والسلام

[راعي الخطوط]

والله يالحبيب أن دبة الغاز حقتي اللي زارفها من الوالد ولله الحمد ما نزلت من الشنطه لا صيف ولا شتاء :no2:
والله يحفظنا وإياكم

[بليزر]

الحقيقه ان الحق للدافور عليك
ولازم ترضيه بطلعه خاصه وتقوم تولعه لمدة نصف ساعه و تحب راسه علشان يرضى عنك
تراي امزح لا تسويها

[جهام القصيم]

اقول وبالله التوفيق يمكن يكون شي في نقس الانسان 0 ولا الحمد لله ما فية خوف ولا سمعنا ان فية احد انفجر معة دبة في السيارة, حل بسيط خذ لك حزمة حطب او خلة في شنطة السيارة او رايح بالك

[مريقب العيفار]

اخونا الكريم

افيدك عن نفسي

الدافور ما ينزل من السيارة

طبعا بالخرج الخاص

وزود على ذلك اكثر من علبة كوفيا مع العزبة

[قارئ]

انا ما تنزل عن سيارتي الدافور الكبير والدافور الصغير ابو علب زرق صغيرة مع سبير لها دايم موجود داخل العزبة والسيارة في الشمس

بس ....... ما اترك القزاز مسكر تمام انسم للي ورى سنتي تقريبا


والله الحافظ

[راضي]

اخواني


desertman777
الكابتن
التوفير
الذيب الابيض
الساهر2003
راعي الخطوط
بليزر
جهام القصيم
مريقب العيفار
قارئ
السموحه ياجماعه على التاخر في الرد شاكر لكم مروركم
والله افدتوني جزاكم الله خير وابشركم من عقب هالموضوع وهو ماينزل من السياره عسى الله يتمم على خير
مع تمنياتي لكم بالتوفيق ...........

[مسير عليهم]

دافوري بالعزبة بشنطة السيارة من شريتها والظهر اوقفها بالشمس وبالبيت احياناً بالشمس والحمدلله ماشفت منه شي صحيح يحتر ويخوف بس ماضره

اما صغير يخوف لإنه انكسر علي الفرار حق الغاز وصار يهرب وملى السيارة ريحة غاز