إلى كل الصقاره ((إستفسار))

[بومعطش]

يالله حيهم
شحالكم يالربع
ياغالين أسمع بعض المصطلحات اللي يستخدمها الصقاره وودي أعرفها لأني الحقيقه متولع بالطيور وإن شالله ربي يرزقني بالطير الطيب

المصطلحات اللي ودي أسأل عنها هي:
1/لاقالوا طير أفجح((وش معناة أفجح))
2/((الكراع)) وشو؟؟
3/((كاشف الراس)) وش المقصود بها؟؟
4/((قرموشه))وش معناتها؟؟


وشكرا.....

[@قرناص@]

اهل الخبره مايقصرووون

في امان الله

[ابوحافظ]

الله يحيك يابومعطش وابشر باللي اعرفه ...


1/لاقالوا طير أفجح((وش معناة أفجح))


افجح تعني الطير اللي فيه تقويس بساقه مع قصر الساق تلاحظ ان كفوف الطير متقااابله من قو التقويس بين رجليه... وعندنا بالشمال نقووله افحج ...


2/((الكراع)) وشو؟؟


الكراااع هو اللي يصير فيه سبوق الطير بين الكف ومفصل الفخذ توكن مسافه طوويله وعااري من الريش يعني مثل ساق ابوحقب والباشق هذا يسمى الطير اكرع...


3/((كاشف الراس)) وش المقصود بها؟؟


كاشف الراس يعني يميل للبياض او الغتااااار مافيه دعووج مثل الطيور الدغس والمجااهيم عاااامه وبعض الطيور الحمر تقريبآ ... يعني الابيض والاشعل والاشقر وحمر شقران تجي اغلبها كااشف رااااس يميل للبياض والغتاااار..


4/((قرموشه))وش معناتها؟؟


القرموووشه عند اهل الاماراات وقطر تعني المثلوووث للحراااار والجير يعني اذا الطير مب واافي مقااااسه واطرااف الطير مثل (( راااس بوز وكفووف الطير)) هذا يسمى قرموووشه(( مثلوث))..


وسلامتك وانتظر الشبااااب يفيدووونك وان شاءالله تستفيد..


اخوووك ابوحااافظ... تقبل مروري..

[بومعطش]

بيض الله وجهك يابو حافظ ماقصرت
وبانتظار بقية الأعضاء
ولو يكون الشرح على صور ولاعليكم أمر أتوقع أنه يكون أفضل وتوصل المعلومه أسرع

[حب الوطن]

السلام عليكم (بومعطش ) مشكور على الموضوع وبيض الله وجه ( ابوحافظ )الظاهر كفى وفى ولامهونه في الربع

اخوكم / حب الوطن

[قلب شاهين]

أخونا أبو حافظ كفى ووفى ،،

ومشكور على الموضوع وبارك الله فيك ،،

[بومعطش]

مازلت أنتظر المزيد ولايهون بوحافظ ماقصر كفى ووفى
بس ودي بالشرح على صور أفضل
الله لايهينكم

[بومعطش]

وين الصقاره شدعووه؟؟؟؟

[قرناس خلوي]

والله ابو حافظ ماقصر وكفى لكن يمكن يكون لدى بعض الأعضاء صور يقدر يشاركم بها إنشاء الله

تقبل مروري

[بومعطش]

شاكر مرورك أخوي قرناس وأنا أشهد أن أبو حافظ ماقصر بيض الله وجهه
بس ودي بالزود من باقي الرجال ولايهون بوحافظ

[بومعطش]

وينكم ياصقارة مكشات ؟؟؟

[بومعطش]

للرفع الله يرفع مقدار الجميع

[عاشق مكشات]

الله يعطيك العافيه على الموضوع

[امير الرفيعه]

1/لاقالوا طير أفجح((وش معناة أفجح))

ياطويل العمر الطير الافجح يعني اللي تجي رجليه متباعده نسبيا عن بعض .

2/((الكراع)) وشو؟؟

المقصود به ساق الطير والكراع كل ماصار قصير من مميزات زينه الطير وكل ماكانت طويله العكس

3/((كاشف الراس)) وش المقصود بها؟؟

يعني لون الراس يميل الى اللون الفاتح سواء شقار او بياض

4/((قرموشه))وش معناتها؟؟

هذي الكلمه تستخدم عند صقاري الخليج العربي الامارات واتوقع قطر بعد والمعنى مثلوث يعني طير موب وافي .

[جار ابو علي]

السلام عليكم ورحمة الله وبركاته
احب اعلق علي كلام اخوي ابوحافظ بان الطير الافحج ليس المقصود به مقوس الساق بل المقصود به متباعد الساقان والقصيره
وبنسبه لكاشف الراس هوا الذي راسه اكشف من لون بدنه يميل الي البياض ويوجد فرق بين كاشف الراس وعازل الراس وعازل الراس هوا الذي ياتي راسه ابيض كامل يختلف عن لون الطير والقرموشه كما ذكروا الشباب ولاكرع طويل الساق وقريبتان من بعض ولايوجد عليها ريش اي خالي من السراويل
وعذرونا ياربع من القصور وشكرا للجميع
وتقبلو مروري اخوكم جار ابوعلي

[بومعطش]

بيض الله وجيهكم يالربع ماقصرتوا
لكن وين بومعيض وبورداد ولايهنون باقي الربع وماهوب قصور باللي ردوا علي
الله لايهينكم يالربع ماقصرتوا