مشكلة القربة الشراع وتهريب الماء

[ابوعلوش]

دائماً اذا عبيت القربة الشراع سواء المكتوب عليها السنيدي أو الكويت تهرب الماء وخلال نصف ساعة تصبح فارغة بالرغم أن أحد الزملاء قال لي غطها في الماء لمدة اربعة وعشرين ساعة وبعدين ماعاد تهرب مويه .. ولكن المشكلة مازالت .. الرجاء من عنده حل يساعدنا وله جزيل الشكر والدعاء

[جلوبلستار]

عبها ماء مالح وعلقها وبعد ما تفضي عبها مره اخرى ماء مالح .
وبعد ما تفضي اغسلها من الداخل ( يعني عبها بماء عادي الى النصف ورجها وفرغها ) .
ثم عبها ماء عادي وان شاء الله ما عاد تهرب الا اذا عبيتها وهي جافه يابسه بتهرب شوي وتزين .

[شاص]

اللي أعرفه أن القرب ماتستخدم مباشرة أول ماتشترى .. لأنه لابد تربص (تنقع) بالماء والبعض يفضل الماء والملح لمدة معينة 24 ساعة أو أكثر لأنه إذا استخدمت مباشرة يمكن ماعاد تنفع ولو ربصت عقب

[منتعش]

أتوقع الطريقة الصحيحة
هي طريقة أخونا الغالي : جلوبلستار
أذكر كان عندي وحدة وخمرتها لمدة يومين
وبعد ما عبيتها علقتها في السيارة ويوم وصلت ما شفت موية

[هدد688]

السلام عليكم ورحمه الله وبركاته

الطريقة اخوي ابو علوش انك تملى القربة بالماء

العادي وتعلقها لمدة شهر وكلما نقصت تزوده بالماء

الطريقة مجربة ............

[ابوعلوش]

اشكر لكم تواصلكم .. لكن اخوي هدد688 لمدة شهر ؟ اصلاً لو اعلقها في لمدة اسبوع انطلوها الأهل في الشارع وشلون لمدة شهر !!! لكن اشكرك على التواصل .. وراح اجرب الطريقة الأول لأنها اسهل وعساها تجيب نتيجة

[shaheenshah]

انا عانيت من هالشي لين دخت ولقيت لها حل وخذ الطريقه وادعي لي ولوالدي

رح يم العطار وقله عطني دباغ (ايه دباغ حق الصميل) الظاهر الـ 100 جرام بخمسه ريال
المهم حط مقدار بيالة شاهي من الدباغ في المطاره وعبها مويه ورجها اي بمعنى خضها وعلقها لين تشوفها ما عاد تهرب ولونها بيقلب الى اللون الأحمر وكل العمليه ما تاخذ معك وقت طويل يعني ليله وحده بس
ارجع اغسلها وعبها وسم بالله

اخوك شــــــــاهين

[ابوعلوش]

اشكرك أخوي شاهين على المعلومة وراح اجربها .. واعطيكم النتيجة !!!!!

[عشانا]

طيب المادة التي تحط في الاديترات لتسكير التهريبات ماينفع
مجرد راي

[قناص متقاعد]

اسمع ياخوي الراي

حطها على الارض ثم اخلط لك طين وحطه عليها مده يوم او اقل المهم اللين ينشف الطين ثم خذها ونظفها وعبها ماء ان هربت فلك اللي تبي .

مجربه ومضمونه اكيد 100% والطريقه هذي استمديتها من الشيبان ويقولون قديماً كانا نسويبها كذا .

وسويتها انا ولا نقطه تشوفها براء .

جرب وشف .

[asmm]

اخوي عشانا
طريقتك اعتقد فيها خروج نهائي
شكرا لك

[هولوكس2005]

طيب المادة التي تحط في الاديترات لتسكير التهريبات ماينفع
مجرد راي


اخوي عشنا الله يسلمك حنى نتكلم عن فربة الماء المصنوع من الجلد التي يشرب من الإنسان
مو نتكلم عن قربة سياره علشان تحط فيها هال كيماويات