مايبلغ من الصقار في حب طيره

[الفوار2008]

السلام عليكم ورحمة الله وبركاته


كثير ما يبلغ من الصقار انه يحب طيره ويغليه ويكون شغله الشاغل هوالطير
كثيرا ايضا مانسمع عن قصص صقاقير فقدو طيور لهم اما ماتت او انها ضاعت وتحدث منهم ردود فعل مانتصورها من الحزن لين البكاء بل وبعضهم يبطل ينقل الطيور
وبماأنني صقار مبتدئ وتوني على غلا الطيرو حبه الا انني احس انهم معذورين لانك لوتخيلت اللي مات او اللي فقدته خويك ورفيق دربك ماردك بتفقده وحتى لو كان مطلع بك الشيب ومعذبك لكن مع ذلك تحب مجالسته و تدهيله والنظر اليه
وهذا رايي لا اقل ولا اكثر وتلزمني ردودكم

اخووووووووووووووووكم
ابوالعبدي

[قلب ذيب]

الله يحييك ابو االعبدي 0
لاشك ان الموضوع الذي طرحته قد واجهه الكثير من الصقاقير , خاصه الذي فقد طيره الغالي سواء من خلال ضياعه او موته , وهناك كثير من الطيور تصبح ملازمه لراعيها لدرجة انه يصير مثل واحد من عياله او هله و ولزمة الطير الطيب مثل خوة الرجل الطيب تنتفي منه العذاريب ,وتصبح مواقفه يتفاخر بها صاحب الطير 0
والطيور الادره التي يتعلق بها الصقار وبابفعالها كثيره على أمتداد التاريخ , ونجد الكثير من الشعراء يتعون موت الطير او ضياعه , حتى أن بعض الصقاقير يقول قصيده في ضياع طيره علما بأنه لم يقول أي قصيده من قبل وهذا دليل على حب الشديد لطيره وافعاله وخوته

[قلب شاهين]

مشكووور يالغالي ابو عبدالله على الموضوع الرائع جدا ،،

وأنا قد فقدت طيور كثير ومازلت أحزن عليها وكل صقار يحب طيره لازم يعتني فيه جيدا ،،

وفقك الله يالغالي ،،

تحياتي / صقار القصيم ،،

[الفوار2008]

اخوي قلب ذيب
حياك ربي وبياك ومشكور يالغالي على المرور

[الفوار2008]

اخوي الغالي والمثالي
صقار القصيم
مشكور يالغالي ومرورك يسرنا

[الفوار2008]

اخواني اعضاء مكشات يسرني اطلاعكم على الموضوع
ونحتاج لردودكم ومواقفكم وخبراتكم

اخوكم ابو العبدي

[الوافي عزام]

شاكر لك لاختيارك لهذا الموضوع الرائع

اما بالنسبه للطيور وحبها

قد يحزن انسان على ضياع طير او فقدانه اذا كان الطير عند الشخص من سنين وصار اللي بينهم اكثر من صقاره ( صارو اخويا :cool: ) فهنا يصبح الحب الذي لاتسعه الدنيا
وخصوصا اذا صار الطير له ماضي وحاضر مشرف ومواقف جملت راعيه وقت الجماله في المقانييص من لحوق وغيرها
والطير الطيب الهادئ طبعه يفرض حبه عليك واحترامه
والله ان الطير اذا صار عمره فوق خامس وراكد ولايعرف معنى المكافخ وطياره زين وعلومه زينه انك تستحي ولايطاوعك قلبك انك تخليه بدون عشا حتى ولو ماصاد

وانا اذكر واحد من اخوياي يقولي ان ابوه جلس كفيف قبل موته لمدة سنتين والطير اللي عنده مافارق بيتهم لاربطه ولاهدد
بس يعطون ابوهم العلف ويحطه على يده ويدعي الطير وهو بالمجلس ويعلفه ويمسح بوزه بعد الاكل
لين توفى ابوه وقبل لايموت او بالاصح قبل دخوله للمستشفى طلب احد عياله انه يعلفه ويطيره بعيد عن الديره

وبينما لو عندك طير مبهذلك لاهدد زين ولا لحق زين والله ماتعطيه من الحب ولا شعره :no:
صحيح تبي تعلفه وتعالجه وتسوي اللي عليك لاكن الاحترام غير موجود بينكم

وشاكر لك على موضوعك الذي لو نتكلم عنه ما سكتنا لمدة سنه :good:
تحياتي لك

[الفوار2008]

شاكر لك لاختيارك لهذا الموضوع الرائع

اما بالنسبه للطيور وحبها

قد يحزن انسان على ضياع طير او فقدانه اذا كان الطير عند الشخص من سنين وصار اللي بينهم اكثر من صقاره ( صارو اخويا :cool: ) فهنا يصبح الحب الذي لاتسعه الدنيا
وخصوصا اذا صار الطير له ماضي وحاضر مشرف ومواقف جملت راعيه وقت الجماله في المقانييص من لحوق وغيرها
والطير الطيب الهادئ طبعه يفرض حبه عليك واحترامه
والله ان الطير اذا صار عمره فوق خامس وراكد ولايعرف معنى المكافخ وطياره زين وعلومه زينه انك تستحي ولايطاوعك قلبك انك تخليه بدون عشا حتى ولو ماصاد

وانا اذكر واحد من اخوياي يقولي ان ابوه جلس كفيف قبل موته لمدة سنتين والطير اللي عنده مافارق بيتهم لاربطه ولاهدد
بس يعطون ابوهم العلف ويحطه على يده ويدعي الطير وهو بالمجلس ويعلفه ويمسح بوزه بعد الاكل
لين توفى ابوه وقبل لايموت او بالاصح قبل دخوله للمستشفى طلب احد عياله انه يعلفه ويطيره بعيد عن الديره

وبينما لو عندك طير مبهذلك لاهدد زين ولا لحق زين والله ماتعطيه من الحب ولا شعره :no:
صحيح تبي تعلفه وتعالجه وتسوي اللي عليك لاكن الاحترام غير موجود بينكم

وشاكر لك على موضوعك الذي لو نتكلم عنه ما سكتنا لمدة سنه :good:
تحياتي لك


صح لسانك اخوي وبارك الله فيك وما قصرت كفيت ووفيت يالوافي عزام

اخوك ابوالعبدي

[مران]

مشكور اخوي ابو العبدي على هالموضوع وعزا الله انك صادق ان كثير من الصقاقير يوصل به الحزن الى البكاء

وانشاء الله مانسمع هالموسم ضياع طير ولا موت انشاء الله
اخوك wantedبذاخ سابقا

[ابونشوان]

الله يعطيك العافيه اخوي ابو العبدي على الموضوع الجميل
.. والله انك صادق ..
انا مار فيها بس خالها على ربك ..ما بل يد حيله ..


تقبل مروري
اخوك ابو نشوان

[صقر20]

جعلك ماتفقد غالي ياغالي
تحيتي

[قاهر الصحرئ]

السلام عليكم...
كيف حالك يا أخوي (أبو العبدي)
هاذي قصيدة الشاعر مشعل حمود الحبيني
تسرد لك قصته مع طيره الذي ضاع منه وحالته بعد فقدان طيره
واليك القصيده:



البارحه يا حسين مركاي كوعي

من العشا لين أذن الفجر يا حسين

ماغير أسلي خاطري بالدموعي

مثل الذي من يقضي الدين بالدين

كله سبب طيري حسين الطبوعي

النادر الي شوفته تطرب العين

الي ليامني نهمته فزوعي

مثل الشجاع اليا نهموه القريبين

قمت أتذكر تلته للطلوعي

بخد قنصنا فيه حروة أسبوعين

مدري ثمان أيام معهن أسبوعي

لا شك كنهن يبن الأجواد يومين

وفي تالي المقناص يوم الربوعي

أتلاالعهد به راح يلوي الجناحين

أقفا ورى خرب مصقر جزوعي

متذيرن وردفت من عقب طارين

وسقنا معاهن وسط خد منوعي

أقفن شمال ومبعدات عن العين

الخرب صامل والنداوي قطوعي

حال الوعر من دونهن و الشعيبان

وقفت أدربل من رمامن سنوعي

وقالو جهاز الطير ما نسمعه زين

وجهت رجل بكل رجم رفوعي

أرقا ولوح ودبل الصوت صوتين

وماقصرو وقت المنافع أربوعي

وخت في جو القطامي نهارين

لا شك طيري ما نوا للرجوعي

وأنا بعد حدرت لم البلادين

ما كان ودي إن المفارق فجوعي

ليته مودعن سوات المحبين

الله يلوم الطير بعده يلوعي

خلاني أسهر والمخاليق ممسين



عساه يسلم من يدين الطموعي

الي على النشاد يخفا البراهين

ولا الرجال الي تعرف السنوعي

تلقا على حجله مع السبق رقمين

ولا عساه بنازيات التنوعي

ورزقه على الي خالق الناس من طين

ومن ما جرى ياحسين قلبي قنوعي

لو كان عقبه خاطري صاير شين