الطيور الطلع ومشاكلها

[راعي الناوي]

بسم الله والصلاة والسلام عاى اشرف الانبياء سيدنا محمد ، ام بعد اخواني بغيت ادردش معاكم شوي وطبعا يهمني تواصلكم ، الموضوع يختص في الطيور الطلع ويختص باصحابها والقوانين اللي يجب ان يلتزم بها الصقاقير ، اخواني الطير الطلع
لما فيه من اهميه وينومس ويفاجئك بالفال الطيب لكن إذاصرت مع ناس قانص معاهم سواء كنت تعرفهم او المعرفه سطحيه يجب ان تضع خطوط حمراء في الهدد يعني إذا كان واحد من الشباب لقى جرتها تكون اولوية الهدد له
وإذا كان هناك واحد طيره على علومه بعد الهدد له ، من المشاكل اللي تحصل بعض الناس عنده طير طلع بس ماعنده شيمه إذا شاف تجمع سيارات راح وفرع عن طيره ، وإلا تنصت على موجة احد الشباب هادين ويروح على وجهتهم ويفرع عن طيره ويهده ويقول هديت طلع



فهل هذا يجوز ياشبـــــــــــــــــــاب ؟؟؟؟

[مستر 1]

يااخي لكل صقارة قوانين
ولكن الصح ان اذا سمعت على الجهاز ناس لاقين جرة تشوف وين موقعهم وتتجنبه اكثر
ولكن الغلط انك اذاسمعت ناس لاقين جره تتنصت عليهم وتقرب لمهم وتهد طيرك وتقلوا طالع من بعيد وهذا من البجاحة وقله الحيا
قد حصلت مشاكل كثيرة في هذه الضروف
ودمتم 00000000000000

[قرناس حائل]

مساكم الله بالخير يالاخوان

(شر البلية ما يضحك ) صراحة هذي مشكلة كثير ما تقع وقت الهدد

ولا يهد هنا الا شخص لا يفقع في مجال الصقاره شي

لأن الصقاره لها قوانين وسلوم ومع ندرة الصيد الناس تركت السلوم

(فيه اعذار اخرى مثل الطير انطلق من يدي وغيررررررررررها 9

[قلب شاهين]

مشكور على الموضوع الرائع ،،

وفعلا يوجد مشاكل كثيرة من الناحية هذي ولكن يجب أتباع الشروط والقوانين ،،

وبعدين الي لقا جرة وتبعاها ودرجت من قدامه لايسمح لأحد أن يهد الا الي تعب عليها ،،

ومشكور على الموضوع ،،

تحياتي / صقار القصيم ،،

[راعي الناوي]

ف11هد وقرناس حائل وصقار القصيم مشكورين على التواصل الدائم وبيض الله وجيهكم

[الاشعل 316]

ما قصرت ونفس ما قالوا كل صقار وله قوانينه بس اذا

شفتت ناس عندهم الجرة تجنبهم

لان هذي الحباري لهم وحتى لو طيرك طلع لا تفرع للطير

لان هذا ماهو من حقك

وتقبل تحيات

اخوك ابو سطام

[الفوار2008]

مشكور على الموضوع الرائع ،،

وفعلا يوجد مشاكل كثيرة من الناحية هذي ولكن يجب أتباع الشروط والقوانين ،،

وبعدين الي لقا جرة وتبعاها ودرجت من قدامه لايسمح لأحد أن يهد الا الي تعب عليها ،،

ومشكور على الموضوع ،،

تحياتي / صقار القصيم ،،

مثل ماقال اخوي صقار القصيم ولا زود عليه شي

وتقبل مروري اخوي وشكرا على الموضوع الطيب
اخوك ابوالعبدي

[المري]

مرحبا ومسهلا براعي الناوي..


وتسلم على هذه الموضوع الطيب, اللي مفروض على راعي الطلع انه اذا شاف ناس يقصون او شك في وضعهم انه يمسك طيره اذا طلع

ويحاول يبرقعه ويروح يمهم ويخبرهم ان طيره طلع ويسألهم : عندكم شي؟ اذا ماعندهم شي ذيك الساعة لها الف حلال

والواحد منا اذا حصل جرة الحبارى يحاول ينظار اخلافه او امامه يشوف يمكن احد يقصها قبله ؟؟

تسلم اخوي ابو محمد على هذه الموضوع الطيب وجزاك الله عنا كل الخير..

اخوك - المري

[راعي الناوي]

الاشعل ، ابو العبدي ، المري اشكر لكم مروركم نورتو الموضوع

[الوافي عزام]

هلا بك
وموضوع جميل جدا

ومن المعروف ان مشاكل الطيور اللي تطلع كثيره ولاتحصى
ويجب التاكد من طلع الطير قبل تعطيه سبوقه

وهذي سالفه على طاري الطلع

العام اللي راح اخوياي قنصوا يم صلاصل ولاقدرت اخاويهم
المهم معهم طير طلاع والطير طلع وقام يكفخ
طبعا برقعوا الطير عشان يتاكدون ان مافيه احد ودوروا يمين ويسار ولا لقو احد بتاتا
وكانت روحتهم وسط الاسبوع وايام مدارس ولا شافوا احد بالمنطقه من يومين
المهم فرعوا للطير ولاكنهم غيروا وجهة الموتر وقعد الطير يتلفت يمين ويسار لين طلع على طلعه الاول خلاف الموتر
وكفخ الطير مكافخ الطير الصامل
وبالفعل هدوه وراح مسافة كيلوين ونص والا الرجاجيل اثرهم هاديين طيرهم على حبارى
طيرهم ورى الحبارى وطير اخوياي راعي مشابط ويلحق الطير سما وهم ماقصروا بالحمام والشلو لاكن الطير مهوب يمهم صامل وموجه
لين وصل الطير الثاني وخذ من المشابط لين الطيرين كلها نزلت للأرض وفكوها والحبارى روحت علي الرجاجيل اللي هادين قبلهم

وهنا جات المشكله ؟؟؟
ويقولون لهم ليش تهدون على طيرنا
وقال اخوييا والله يالاجودي اننا ماشفناك والطير هادينه طلع من بعيد وقبل نهده جلسنا نتأكد ولا شفنا احد
وشل ابوك حط ابوك لين كل راح لحال سبيله
والمشكله راعيين الهدد اللي هم هادين اول مامعهم طير ثاني يلحقون
واخوياي مستحيل يلحقون لان موقفهم محرج
وصار اللي صار وتصالحوا والرجال صدقهم من كلامهم

وشاكر لك يالغالي

[امير الرفيعه]

بالنسبه لموضوعك اخوي راعي الناوي موضوع جيد واللي لابدج معرفتها عند الصقارين المبتدئين

لكن انا باقولك ليش ؟؟

بالنسبه لمقناصنا هنا في المملكه العربيه السعوديه تعرف قل حبارى وكثره صقاقير

لذلك لابد من كل ربع تخاوو في المقناص يعرفون الهدد منهو له منهم حتى لو لقاها واحد من اخوياه يناديه يقول يافلان

تعال عندي حبارى او احد الرموز عشان مايجونهم العالم ويجتمعون الاخوياء كلهم ويهد راعي الطير اللي عيله الهدد

ويكون هناك طير جاهز للحق لاسمح الله عشان ماتروح الحبارى ومثل ماقلت لك الصيد قليل عندنا

عشان كذا لازم يجتمعون الاخوياء ويهدون سوى عشان يتنومسون

لكن في حاله ان الحبارى فقعت او طارت من قدام واحد منهم وعزمت ناويه السما فانا اشوف انه يهد ويقول لربعه هديت

عشان ماتروح الحبارى واذا طارت وهي مهيب صامله على الطيار يعني بتطب يخليها وينادي اخوياه عليها ويهدون

مع بعض عشان مثل ماقلت يتنومسون . واللي يهد ولا يذبح طيره مثلا راحت حباراه ماعليه ينعاد عليه الدور واهم شي عندنا

الطيور كلها تذبح ولله الحمد كلها تذبح العاده

هذا اللي عندي واللي نتبعه دايم في مقانيصنا .

[راعي الناوي]

الوافي عزام ، امير الرفيعه بيض الله وجيهكم على التوضيح وتفاعلكم الطيب ولكم جزيل الشكر والامتنان

[مبسوط]

تسلم اخوي على هذا الموضوع الحساس وما اقول الا مسكتني مع اليد الي تعورني من كم سنه كانا مجموعه وكان واحد من العيال معه طير يطلع المهم اذا لقينا الاثر قلنا المهد لفلان واذا ما بغاها بعده فلان ثم بعده فلان الى الرابع يعني تنظيم ولا منتخب المملكه واذا جت الجرة مايهد الا راعي الطير الطلاع الين ذبح اربع حباري والعيال ما هدوا واذا سالته قال توقعت انها طيار والا مفاقعيه من بعيد هذا الكلام وحنا ربع وشله وحدة فمن باب اول تجي الخبطة بين العزب المختلفة

والف شكر على الموضوع
اخوك/ مبسوط

[وقاااااد]

مشاكل الطلع ترجع لشيمة الصقار اللي عنده شيمه مارايح يهد واللي ماعنده شيمه يفعل مايشاء ويتحمل اللي يجيه
اما اللي يهد وهو ماحوله احد طلع من بعيد هاذا معذور مثل خوي الوافي عزام مافي وجهه شي لأنه تأكد قبل لايهد ولاشاف احد 0
وسلامتكم

[راعي الناوي]

وقاااد ، مبسوط شرفتونا بالردود الطيبه :good:

[الفارس3]

مشكور يالغالي ياراعي الناوي على الموضوع الطيب ... وانا عن نفسي استفد من الموضوع ... بس في سؤال ..؟ وإذا كان هناك واحد طيره على علومه بعد الهدد له .... على علومه ايش تعني ؟

[راعي الناوي]

اخوي الفارس على علومه يعني معّلم اومدرب على حباره مصيوده من قبل صايدها طير واحد من ربعه ، وينتظر يهد طيره بعد التعلييم ، وصاحب الطير يكون شفقان على الهدد لانها بتكون حباره رقم 1 في بداية مشواره . وتسلم على المرور وشرفتنا

[م-ت-ن-ا-ث-ر]

تسمى عربجيه واللى عنده شيمه ومعروف يقدر الخوه

[راعي الناوي]

تسمى عربجيه واللى عنده شيمه ومعروف يقدر الخوهنشكرلك مرورك الطيب