((خشبة)) البندق إنشعرت ..........وش الحل ؟

[الأشهـــــب]

الأخوة الكرام من أعضاء ومشرفين
الحقيقة أنا عندي بندق أم سبطانتين ( ماصورتين) فوق بعض ، والخشبة الي تحت السبطانه على طول إنشعرت ، والله العالم من كثر الرمي .
والمشكلة أخاف ارمي بها كم مرة وتنكسر .
فبماذا توجهونني أن أقوم به وبماذا تشورون علي يالأجواد لأصلح البندق؟

وتقبلوا اطيب تحياتي ،،،،،،،،،،،،،،،،،،،،،،،،،،،،،

[مفتون صيد]

والله مشكله اخوي لوانها هوائيه قلت رح لم الوكيل وغيرها بس هاذي ناري ........ انا والله ما ادري بالضبط ولكن ابتفلسف عليك:D ......... حط عليها شطرطون علشان يوقف عمليه التشعر .......... انا مثلك عندي بندق تشعرت بس مهيب ناري ........ وحطيت عليها صمغ الصغير الشفاف ولا فاد معها ...

لعلي اسئل عنها واجيب لك العلم ان شاء الله

[دغيم]

أخوي ألاشهب
السلام عليكم
الدعوا سهله عندك محلات السلاح في الرياض
فيه الشايقي وغيره ممكن يسوي لك الخشاب الي
تبي ويكون طبق الاصل.

[الخبير]

السلام عليكم
فيه يا الحبيب عند حقين البناء صمغ خاص للخشب، حطه على الشعر وشده بشطرطون أو حبل لكن أهم شئ إنك تحاول تضم الكسر.

[تالي الاولين*]

.


قبل كان تجبير السلاح بالجلود يلف وهو رطب على الكسر ويترك لين يجف

اما هالحين عندك مثل ماقلوا الاخوان محلات السلاح مثل الشايقي وغيرة


.

[الأشهـــــب]

الأخوة الكرام :

مفتون صيد :heart:

دغيم :heart:

الخبير :heart:

تالي الأولين :heart:

شكر الله لكم ، وجزاكم الله خيراً

[aflaj12]

أنصحك بمحل الشايقي والله يعينك على السعر بس ترجع جديدة

[m-16]

السلام عليكم
هلا اخوي الاشهب
بالنسبة للاخشاب اتوقع انها بتكلفك
بس واحد من الشباب عندة براوننج ونفس الشيء انشعر الخشب حقها
في قطعة بلاستك يسمونها
backing
تجي مثل التيوب
تلبسها في الخشب وتسخنها على النار تاكد ما تقربها من النار مرة يعني سخنها شوي شوي

وتصير كانها قطعة من الخشب
اتوقع تحصلها في المحلات الي في الصناعية
تجي مقاسات
خذ المقاس الي اكبر من خشب البندق بشوي
واتمنى انها تنفعك
لانها مجربة ومضمونة

:good:

[صياد البسيتين]

السلام عليكم ورحمة الله وبركاته
فيه عند السباكين ( تيب ) يلفون فيه المواسير والاشياء القويه لونه ازرق قوي مررره ينفع للاخشاب
وانا بصراحه جربته على شوزني ونفع وسلامتك

[الألماني]

الأخ الأشهب : لاتهتم الأمر في غاية السهولة رح لمحل الهدف في شارع التخصصي بعد الرميح والرماية الفرع الأول وهناك بتحصل غرضك بأذن الله ..................... وشكرا.

[الأشهـــــب]

الأخوة الكرام :
aflaj12:heart:

m-16:heart:

صياد البسيتين:heart:

الألماني :heart:

شكر الله لكم على تواصلكم الطيب ياأحباب ، وبارك الله فيكم .

[الضاري]

هلا بلأشهب
أنا صارت عندي نفس المشكلة ولكن الشعر خفيف ولو زودت الرمي متأكد أنها تبي تصير نصفين على طول حطيت عليها الشمع الأمريكي (( ولو أني أكرههم أبناء القردة والخنازير)) ولكني أضطريت لأنة هو الأصلي ومجرب قبلي والحمد لله أنتهت المشكلة ووقف الشعر.

[الأشهـــــب]

الأخ الغالي : الضاري :heart:
ياليت وأنا أخوك تذكر لي أسم الشمع الذي ذكرته .

وبيّض الله وجهك على تعاونك وإفادتك ياغالي

وتقبل مني أطيب تحية ،،،،،،،،،،،،،،،،،،،

[بن نشار]

اقول فك الخشاب
ووده للشايقي ان كنت في الرياض ويصلح لك مثله

[المغترب]

فيه حلين
الاول سريع وهو انك تستخدم اي نوع من الي قالو عنه الشباب من الغرا بعد ذالك حطعليها قطعت لستك سيكل على طول الخشاب .

الثاني اذا انك خايف على خشابها الاصلي غره و بعدين وده لشايقي خله يسوي واحد ثاني زيه وستعمله
وخل الاصلي عندك .

هذي تجربتي مع الشايقي
كان عندي وحد ستيفنز ام وحده خشابها مكسور وماصورتها مصديه وحالتهاحاله.
وديتها لشايقي وغيرها خشاب وابره وشريط ودهنها ونيشان كل هذا ب(600)ريال .
اشي الوحيد الي ماعجبني بشغل الشايقي لون الخشاب اذاغيرت واحد واحد الا مايطيق نفس الون .
دوارت عن حل لانه ماعجبني شكل الخشاب قمت واضفت له بعض اتعديالات
مثل
نقش معين وهذا يسونه حفارين الخشب بالصناعيه القديمه بالرياض
اما الون الله يعينك تلقالك دهان خشب مضبوط يضبط الون .
انت بتتعب الاكن ان سويتها تراها تبي تطلع شي الايعلا عليه.

الله يعينك ياحبيبي.

الله يوفق الجميع لحبه ورضاه .

[قناص القرائن]

يازين الباتكس او الشطارطون

[الأشهـــــب]

أخوي بن نشار : :heart:
الله يعطيك العافية ياغالي .

أخوي المغترب : :heart:
بيّض الله وجهك ياغالي على إفادتك ، لكن وانا أخوك أشوف أن الطريقة الثانية الي قلت لي..... فيها تعب بالحيل . ومع هذا كله مايطلع 100% هذي والله مشكلة بعد .
الله يعطيك العافية ياغالي وتسلم بارك الله فيك .

أخوي قناص القرائن : :heart:
حياك الله ياولد الديرة . وأنا أخوك ماأعتقد أن الباتكس يبي يفيد معه ، وإذا حطيت عليه شطرطون وش غدينا فيه ؟!
وانا أخوك لو إني أفكر احط شطرطون على كلامك كان حطيته من زمان ولاوضعت لي موضوع أستفسر فيه عن كيفية إصلاحه لأن الشطرطون يبي يشوه شكل البندق بلا شك .
لكن إن وجد حل سريع وفعّال يجعل البندق كما كانت فهذا هو المطلوب .
وعافاك ربي.

[ابو عبدالعزيز]

ترى اسعاره رخيصه

[الأشهـــــب]

الأخ الفاضل : ابو عبد العزيز :heart:
حياك الله ياغالي .
وأنا أخوك أنا من سكان الرياض .
تسلم يابعدي الله لايهينك .

[امير الرفيعه]

اخوي الاشهب ............
السلام عليكم ..........

بالنسبه للحل فالاخوان ماقصروا ودلوك على الشايقي .
بس احب اذكرك بنوع الفشق اللي تستخدمه .
بعض الفشق يجي عليه ضغط عالي .وهذا ماينفعله الا ام خمس .
وهذا الفشق تلقى الخاتم حقه طويل ( يعني ماخذ نص الفشقه ) وتلقا رجفه قوي وهذا مايأثر على الخشب بس يعدم الماصوره عليك................

***********************

وتقبل تحياتي.............

******************

اخوك امير الرفيعه..........

[البارود]

جيبلك خشبه صغيره كبر حجم القلم

وطحن الخشبه لين تصير مثل البودره

جيبلك غيره حق الخشب

ودهن الغره على الفتحه المشقوقه وبعدين جيب الخشب المطحون

وحشره بالفتحه المشقوقه

او اخلط الخشب مع الغره وبعدين حطهم على الفتحه المشقوقه

[نجمة سهيل]

اخوي الاشهب :heart:

اخوي اسمحلي تأخرت بالرد ،،

في الحقيقه رح لمحل الهدف الي بشارع التخصصي ،،

وعنده بتحصل التصليح الزين ، هو صحيح انه سعره غالي شوي ،،

لكن ماعليه اهم شي حبيبة القلب ترجع مثل اول:D

وتفضل رقمهم : 014660202

واذا اتصلت عليهم وقالوا لك لازم تصريح لايهمك هالزول ،،


خذ بندقك وبتحصل مطوع لحيتن غانمه ،،

ماهوب مقصر معك ،

[الأشهـــــب]

الأخوة الأفاضل :

أمير الرفيعةhttp://www.mekshat.com/vb/images/smilies/heart.gif
حياك الله يالغالي ، بالنسبة للفشق الي تقول أنا أعرفه زين لكن ماعمري أستخدمته لأني أعرفه أقشر على البندق ولاهو أي بندق تصلح له .
وأزيدك من الشعر بيت ترى حتى أم خمس يأثر عليها . فلا تتورط بس .
الله لايهينك على تنبيهك ياغالي وماقصرت .

البارود http://www.mekshat.com/vb/images/smilies/heart.gif
الحقيقة الطريقة هذي أول مرة أسمع عنها ، فهل جربيها أنت شخصياً أو تعرف أحد مجربها ؟ ، وهل نجحت الطريقة ، يعني مضمونة 100% بمشيئة الله ؟
وعافاك ربي يابن الأجواد .

نجمة سهيل http://www.mekshat.com/vb/images/smilies/heart.gif
حياك الله يابعدي ، ولاحصل منك تأخير الله يسلمك .
والله وانا أخوك إن كان السعر غالي على ماذكرت بالحيل فأعتقد الحلول الي أتحفونا بها الأخوان الله يجزاهم خير جميعاً تكفي وتوفي بإذن الله تعالى .
وزين الي نبهتني إلى أنهم يمشون الأمور بالنسبة للتصاريح ، لأني أذكر مرة رحت لمهم قال مانصلح أي بندق غير مرخصة .
على العموم أنا بأزرق لمه وشوف وش يقول وبكم يبي يصلحها ؟
الله لايهينك يانجمة سهيل وبارك الله فيك يالغالي .

[البارود]

الاشهب
والله يخوك مجربها مع صمغ خشب شفاف ماخذه من واحد من الربع

ولا اعرف شنو نوع الصمغ او الماركه بس قوى

بس الغره هم جيد يفى بالغرض

اما بخصوص التجربه ناجحه 100%

ملاحظه اخوى الاشهب ان الكسر عندى كان صغير

ولكم الشكر