تفضل طيرك يكون لحاق أو طلاع؟؟؟؟؟؟

[عناز]

أخواني اعضاء منتدانا القيم
اسأل الله العلي القدير بهذه الجمعه المباركه ان يغفر
للذين قاموا على تأسيس ((مكشات)) وجمعوا اصحاب هذه الهوايه
من شتى أقطاب المعموره...
بعد هذه المقدمه المتواضعه هناك موضوع كنت اود به أخذ آرائكم الا وهو:
(اذا خيرت بين طيرين للمقناص هالسنه- انشاء الله -طير طلاع وسبقه عادي او طير يلحق ولا يفرع)
فايهما تختار ولماذا؟

[عناز]

انا افضل ان يكون طيري يلحق لو ما يفرع ...
والسبب ان معظم اراضي المملكه خاصه اللي احب اقنص فيها تشوف الجره بسهوله
واكثر الحباري نشوفها شوف العين قبل الطيور ...
ولو رجعت لاسعار الطيور اللي تلحق لتبين أن اسعارها تفوق الطيور
الطلع بأضعاف مضاعفه... وآخر سبب احب المقناص مع
(رجال يبعدون المراميع شرواكم)ويتعاونون عل جرة الحبارى بشرط الركاده

[حطاااااب]

السلام عليكم ورحمة الله وبركاته
مساك الله بالخير
عناز
مالومك لابد من اللحوق
بس في مواقف لو الله ثم الطلع ماهدينا الشواهين
صار لنا موقفين العام
من غير جره ( اثر )
اطلع الطير وسبحان الله خرب عود ومستذكي يدرج على طوارف الدكاك
والسيارات 4 مااحد منهم جاء على باله ان حولنا خرب وطلب الطير هو اللي فضح الخرب
والثاني خرابي مفاقعي جرته بين بيبات والطلع انهاء المهمه
معك اللحوق لابد منه لاكن الطلع علاج يشوف شي مانشوفه
وتقبل مروري

[خيال الصبحا]

السلام عليكم
الطيرين كلها طيبة
والجواب على حسب
أن كان عندي طير يلحق
أطلب الطير الي يطلع ، وان
كان عندي طير يطلع اطلب الي
يلحق ، وان كان تقولون طير واحد
بس ماعندي غيره أقول الي يلحق ، وش
الفايدة يوم يطلع الطير وتروح عليه الحبارى
ماغير يغثك على الفاضي ، وشكرًا

[طارق الحربي]

افضل اللحوق والطلع :)

والله على حسب فيه بعض المواقف ودك بطير طلع وبعضها ودك بطير لحوق


شكرا لك

[نايف الخالدي]

لا والله الى ابيه لحاق
طلع مابيه طلع
اراضينا اغلبها قصص وماحنا محتاجينه وان اطلعها وراحت هذي الطامه بنقهر اكثر من اني ماعينتها
لابلاه اذا لحق ورده كم مرد وعلق عندي انها احسن
وهذا مجرد راي
ويعطيك العافيه لطرح هذا الموضوع

[مستقنص]

السلام عليكم ورحمة الله وبركاته

افضله لحاق ومثل
ماقالو الربع قصت الحبارى سهله بأراضينا
وصعوبته في لحقته تقبل مروري
وشاكر لك على الموضوع

اخوك
ذرى

[قلب شاهين]

والله أنا أفضل الطير الطلع الراكد والسلام ختام ،،

[hawwamT]

الاخ الفاضل عناز....تحية طيبة لك ولجميع أعضاء مكشات..


العام الماضي طيري الطلاع ..أطلع على الحبارى بدون جرة ...ولكن للأسف مالحقها...مهم الطلع لكن الاهم السبق !

[مستقنص]

السلام عليكم ورحمة الله وبركاته


افضله لحاق ومثل
ماقالو الربع قصت الحبارى سهله بأراضينا
وصعوبته في لحقته تقبل مروري
وشاكر لك على الموضوع


اخوك

ذرى




معليش يالربع في اضافه على موضوع اخوي عناز

لو لا سمح الله صار الجو رياح وهواء اثر الحبارى يختفي

او مكان مقناصك كله جرر

فأفضل الطير يكون طلاع

شاكر لكم

[شهاب بن عساف]

هلا اخوي عناز
وش رايك نقنص سواء السنه هذي ويكون معك طير يطلع وانا معي طير يلحق واذا طلع طيرك على طوال انا بطير الحبارى وارفعها عشان تقولي تكفى هد لاتروح وانا عاد لاتوصي هههههههههههههههههههههه
والله يخوي عناز ان اجتمت بطير واحد يالله لك الحمد وان ما اجتمعت ادورلي طير يطلع كان ماعندي او يلحق كان ماعندي 0

لاكن كان المسئلة اختياريه بختار اللي يلحق لان اذا شافتها عيني ماودي تروح

[الوافي عزام]

انا افضل ان يكون طيري يلحق لو ما يفرع ...



والسبب ان معظم اراضي المملكه خاصه اللي احب اقنص فيها تشوف الجره بسهوله
واكثر الحباري نشوفها شوف العين قبل الطيور ...
ولو رجعت لاسعار الطيور اللي تلحق لتبين أن اسعارها تفوق الطيور
الطلع بأضعاف مضاعفه... وآخر سبب احب المقناص مع


(رجال يبعدون المراميع شرواكم)ويتعاونون عل جرة الحبارى بشرط الركاده

:good: :good: :good: :good: :good: :good: :good: :good: :good: :good:

[راعي الناوي]

الطير اللحاق مايبيله كلام وتقبل مروري

[صارووم]

أرررحب يا عناز
والله ودنا بألاثنين ..ولا يجمعها كلها .. هههه طمعنا
ولكن ان عودت للخيار .. فأختار اللاحاق والله يرزق الجميع
لكن انت وش رايك ؟ وش تختار ؟؟

[الهواوي0]

الطير اللحاق مايبيله

[المنصوووري]

أخوي عناز أنا أختار الطير ألي يلحق شفايده الطلع أذا تكبره ومسحها وخالفته طيارولحقها شوي وطرح

ذيك الساعه ودك تبيعه 1500 وبعدين شفكك من أبو عبدلله

[الووووحيد1990]

السلام عليكم

انا افضل الطير اللحوق وارضينا تشوف الجره واحيانا تشوفها قبل الطيور كلها

تقبلو مروري ودمتم

ويطزل لـــــــــــــــــــي بعمركم على الموضوع لاكثر من راااااااااااائع

[سنجااار]

افضل السبق ولو ان الطلع مهم بس اذا طلع وعقب طق المدرج وش الفايده اصور معها يروح تعبك على الفاضي
تقبل مروري
مشروك

[القصيمي23]

إذا لم تجتمع أُفَضل الطلاع على اللحاق لأسباب منها :

1- الطير الطلاع يجملك مع ربعك ( دائماً تقول ياجماعة طيري طلع أحد يبي يهد اواهد ).
2- الطير الطلاع تضيع عليه حبارى بسبب السبق لكن الذي يضيع على اللحاق أكثر, هذي حبارى خالفت السيارة وطارت وهذي طارت من بعد (مفاقعية) وهذي حبارى في منطقة وعرة ليس لها جره وووو
3- أيام المطر والرياح وكذلك في الأرض الوعرة يقعد فيها راعي الطير اللحاق.
4- الطير الطلاع يريحك في المقناص فتجد راعي اللحاق مايدري يناظر الجرة أو ينظر السماء لاتطير ( مثل راحت السيارة التماتيك عن العادي).
5- الطير الطلاع يوسع صدرك في المقناص كل ما نظرتة تجد أنة يناظر معك( خوي طيب يونسك) .

( الطير اللحاق أغلي سعر من الطلاع بسبب أنه اللحق صفة وراثية لا يمكن أن تكتسب وهي قلية في الطيور بخلاف الطلع فإنها يمكن أن تعلم الطير وهي كثرة في الطيور)

وشكراً

[فيدرعاشق]

ام انا يربع احب طير الحق لانه ينومس ولا الي يفرع طيب وله ناس يحبونه ونااحبه لكن يكون سبوق

[سرهيد1]

السلام عليكم

اللحق لا يمكن يعلم للطير بل يكون نعمه من الله فضل بها بعض خلقه عن بعض

الطلع صفه كامنه في كل طير ولكن تحتاج لصقار ( محنك ) حتى يتمكن من جعل الطير لا يشعر بالخوف من الصقار وبذلك يكون ( راكد ) داخل السيارة , وعلى ضوء ذلك يتفرغ للبحث عن الصيده التي عوده عليها الصقار بدون وجود ( واجس ) مما يحيط به.

والله تعالى أعلم

[عجمي]

أخوي عناز أنا أختار الطير ألي يلحق مثل ماذكروا اغلب الأخوان

والله يكتب الخير للجميع

[خيال الصبحا]

إضافة بسيطة وهي
الطلع ممكن يتعلمه الطير
ولكن لا صار مايلحق وش السواة
يعني اللحاق من دون كلام ، وشكرًا

[القصيمي23]

الكلام ياجماعة على اللحاق الذي لايمكن ان يعلم الطلع او الطلاع الذي لايللحق.

[<عاشق الصمان>]

سلملي على السبوق ..........

إذا أحد صاد حباره قالو الناس طير فلان طرحها ما قالو طير فلان أطلعها .........

[ولهان مكشات]

تحياتي ياعناز-
اللحاق بدون مشاور اذا انا مخير بين اثنين واعلمه على الركاده والطلع وهذا سهل جداً- واللي مثلك مايعوق معه الطبر ويركد أو يجيه جنون البقر على قول المري

[جار ابو علي]

السلام عليكم ورحمه الله وبركاته

اخي عناز مساك الله بالخير قبل عدة سنوات ذهبنا للمقناص في ربوع الشمال وكان معنا طيرين واحد طلاع

والثاني مجهول وطل الطلاع على جامبوووووو خربه هههههههههههه والخرب حط خشمه للهابه الشمالية

واخذ بالارتفاع وارتفع وارتفع وارتفع المهم ماحل الطير الطلاع الا والخرب الجامبووووووووووو اعلن

فك الاحزمة لانه تساوى بالجو وفرعت بالطير المجهول وقلب راسه وشاف الخرب وهز ذنيبه واخذ يتلفت

وطالع بوجهي وكأنه يسألني وش السالفه وصكيت برقعه براسه واذا بحملة قنوص امامنا ونصيتهم وقلت لهم

يربع اذا معكم طير يلحق او فرخ شياهين الخرب فوقكم ؟؟؟؟؟؟؟؟؟؟؟؟؟؟؟

ورجعت من المقناص وانا ابحث عن طير يلحق ولا يهمني الشكل والون والريشه ولو كان كفاخ اهم شي

يلحق وادفع قيمه ( 40000 ) الف شرط اللحوق وفي نهاية الموسم الله وفقني بالطير المطلوب ولله الحمد

وفق الله الجميع لما يحبه ويرضاه.........

[ابو عايد]

السلام عليكم ورحمة الله وبركاته

الحمد الله على السلامه يالغالي

انا افضل ان يكون طيري يلحق لو ما يفرع :good: :good:

[ابو سمحه]

img]http://www.mekshat.com/pix/upload/images44/mk59257_ww.jpg[/img]

[قرناس خلوي]

بالنسبة لي أحب الطير الراكد اللي يطلع ،، لاكن لو خيرت لأخترت الطير اللحوق وتعبت معه لين أركده وأعلمه الطلع ،،، لأن أغلب الطيور تقدر تعلمها على الطلع لاكن السبق هذي صفه في الطير ماتقدر تعلمه عليها أبداً ،،،،

[عناز]

اشكركم اخواني على تفاعلكم على الموضوع.....

ومن ردودكم يتضح لنا ان الطير اللحاق مطلب الصقار في المقام الاول.....

اما الاخوان اللي فضلوا الطلع على اللحق فانا احترم آرائهم.....

واعتقد انه لابد لهم من يوم سوف يراجعون به حساباتهم.....