ليالي الرياض الجميلة وين تقضونها ( لأهل الرياض )

[ابو الشمقمق]

لنفتح هنا في هذا الموضوع نقاش تفاعلي
لأهل الرياض
وفيه نناقـــــــــــــــــــــــــــــــــــش

كيف يقضي اهل الرياض لياليهم خاصة مع ميل الجو للبرودة
وابدا بطرح بعض الاماكن المناسبة للتنزه البري طبعا
لان الاستراحات معروفة والمنتزهات معروفة
وحنا في هذا المنتدى طيور بر نريد البر وهوانا البر


جنوب المهرجان الوطني للتراث والثقافة ( مع اني قد قرصتني عقرب هناك ).

ايضا غرب السكن اللي مقابل المهرجان من جهة الشرق وهي منطقة رملية خفيفة ( وايضا قرصتني عقرب هناك ايضا )

منطقة الثمامة وفيها عدة اماكن : *بعد محطة خزام تلف يسار يصير وجهك غرب يجيك حرف تي تروح يمين تبتل لمين تجيك العاذرية يمين وتجيك لوحة مكتوب عليها مركز طبي ( طبعا هذا اللي تعالجت فيه من قرصات العقربين الماضيتين ههههههههههههههههههههههه ) المهم تبتل مع الردمية المنطقة اللي على اليمين ممتازة وهي طعوس ولكن ميزتها انها صادة عن الناس

منطقة الخفس زينة خاصة للي يبي ينام للفجر ويتقهو ويهج قبل الحرررررررررررررررر

هناك منطقة ممتازة جدا جدا وهي بعد محطة خزام تروح يمين مع طريق الرمحية لمين تطلع الضلع بعد الضلع تبتل لمين تجيك اول عبارة طويلة شوي بعدها يمين منتازة مرررررررررررررررة

المنطقة اللي بين الرمحية والحفنة منتازة بالحيل ( لك الله يامجربع )
نفود الزويليات على طريق الخرج بعد التفتيش يمين


طبعا المناطق الرملية فيها مشكلة الحيات والعقارب
طبعا انا جربت قرصة العقرب القرصة الاولى عام 2005 طبعا هي عبارة عن 3 قرصات ولكن خفيفة وما حسيت بالالم
ولكن القرصة الثانية قبل ثلاث اسابيع عام 2007 بصراحة الم غير طبيعي جداجداجداجداجداجداجدا
طبعا العقرب الاولىسوداء تماما
والعقرب الثانية شعلاء



بانتظار المزيد من المشاركات
من اخواني طيوررررررررررررر البررررررررر

[أبـو فـايـز]

سلامتك اخوي من قرص العقارب وان شاء الله انها تكفير ذنوب

وانت ماشاء الله ماخليت شي :)
فيه بعض المخططات زينة للي يبي يطلع طلعه خفيفة , ميزتها القرب من الرياض وسهولة الوصف واللي يبي يمشي ياخذ له لفة على البلوك
مثل ارض غرب المطار بلنسبة لشمال الرياض
واهل الجنوب والغرب والشرق ادرى بارضهم :)

[ناصح]

ما شاء الله تخصصك قرصات عقارب ..!!

شكلك تنسى دعاء نزول المكان من فرحتك الوصول لمكان زين تريح فيه ..!!

لكن أشكرك على هذا الموضوع المهم

وفيه منطقة شمال جامعة الأمام جيدة للعوائل وقريبة لسكان شمال الرياض وتتميز بمناطق برية مزفلته فهي عبارة عن مخططات لم تستثمر وبقيت صحراء قاحلة وأنسب وقت لها أيام الليالي المقمرة ..

[طير سدير]

[شخصيا استمتع بالبراد العجيب في مخيم لنا في بنبان والله يا اخوك لو الواحد ماعنده التزامات كان يسكن هناك هدؤ وبراد طبعا في الليل تصدقون فرق درجه الحراره حوالي ثمان درجات عن الرياض صيفا وشتاء طبعا تزيد مع الزياده وتنقص مع النقص

[ابو الشمقمق]

اخواني
ابو فايز
ناصح
طير سدير

اشكركم على المرور
والمشاركة معنا

[وسيـع البـنايد]

هناك منطقة ممتازة جدا جدا وهي بعد محطة خزام تروح يمين مع طريق الرمحية لمين تطلع الضلع بعد الضلع تبتل لمين تجيك اول عبارة طويلة شوي بعدها يمين منتازة مرررررررررررررررة


هذي المنطقة ممتازة بالنسبة لي وطبعاً سكروا الارض بشبك على يسارك مدوه يبي لك تستمر شوي
والمنطقة يمين ويسار ماعليها زينة لكن للشباب وماتنفع للعائلة لبعدها

[عاشق السيل]

هواي : منطقة خزاااااام فوق أعلى طعس !!

ولاتنس أخوي الغالي ( والكلام للجميع ) تقرا أدعية النزول وقبلها أدعية المساء وإن شاء الله وبحفظه مايجيك شي ،،

تقبل مروري يالغالي وبيض الله وجهك على طرح الموضوع .....




.

[مرفــأ]

بالنسبة لي في الصيف يا في النادي ولا التعدى المسبح من بعد العشاء الى 12 او في الاستراحة خارج الرياض في منطقة مزارع والحرارة من بعد العشاء دون 25

ونتصبر لين يدخل الوسم ويتغير نظام الصيف كله

[@أبو زيد@]

جزاك الله خيــر يا صاحب الموضوع ... وماتشوف شر


عموما في فترة الصيف نحاول أن نقضي الوقت


في الطلعات الخفيفـــة من بعد العشاء إلى الفجر وحيث أن الجو يصبح معتدل ومنعش أحيانا


أنا من سكان جنوب غرب الريــــاض (حي السويدي الغربي /البديعــة)


نخرج إلى المخططات القريبة من ظهرة نمـــار مرتفعة وهادئـــة


وأحيانا نقضي الوقت في الإستراحات سواليف وسعة صدر

وعسى الله يفرجهـــا بالوسم والشتاء

لأن الصيف عندنــا لايطــاق


وتقبل تحيــــاتي

[ابو الشمقمق]

اخواني الاعزاء
3210
عاشق السيل
مرفأ
السمحان


اشكركم على المرور
ولكم مني جزيل الشكر

[abdulrahmanfd]

بالصيف يا زين النفود وين ما كانت..!@@الثمامة/العاذرية/الطوقي/الرمثيةفيهاالوحدةالهدوءالراحـةالجو المعتدل المائل إلى البرودة في ساعات الصبح الأولىالصحبة الطيبة ((اللي يحبها القلب))كل هذا لقيته هنا بالرياضأمر مستغرب لكن اعتبره نعمة من الله ((عز وجل))

[ابو الشمقمق]

اشكر اخوي عبد الرحمن على المرور
وصحيح ان الصحبة الطيبة لا يغني عنها شيء

وهناك مكان ايضا ممتاز بالحيل وخاصة مع طلعة سهيل عسى الله يجيب السيل
الا وهو مع طريق الشرقية تمشي المين يجيك مفرق رماح تطلع يسار تبتل تجيك محطة على اليمين بعدها يجيك مفرق مخيم الامير الوليد يسار اطلع معه الاماكن على اليسار ممتازة جدا وخاصة للعوائل

[راعي الهـــدد]

والله يالحبيب .... نتصبر طول السبوع ....


حدر مكيف السبلت ... الين الربوع ...


ثم نفز يم أحد الظهار القريبة ونعين منها خير ونعود قبل ماتحتر الشمس ....


او ممكن وسط الأسبوع نروح بعد العشاء انا وسرهيد ومن نعز .... نروح لمخطط غرب عنا ....


فيه هواء وبراد على كيفك ... هواء مشخوووووول هههههه


شاكر لك


بس المنتزهات ... الثمامة .... اكرهها كره ... منكرات ... وقلة حيا ... تشوفها عيني عينك ...


يازين الخلا .... وبس ...


محبك ابو حمد

[ابو الشمقمق]

الله يرعاك يا راعي الهدد
والله المنكرات والاغاني تضيق الصدر
وانا ادعو الشباب ان يراعوا حقوق الناس
ويحترموا مشاعرهم بان لا يضايقوا جيرانهم باصوات الغناء
والله من دخلت الصيفية وحنا شبه ليليا تقريبا طالعين يا للخفس او او قريب من ذلك والاجواء جميلة جدا جدا جدا
ولكن اكثر الناس يعتقد ان الاجواء خارج الرياض مثل الداخل
يا ما حلا ياعبيد في وقت الاسفار جذب الفراش وشب ضو المنارة


متعنا الله واياكم بالصحة والعافية

[ابـ معزي ـو]

الله يعطيك العافيه وحمدلله على السلامه وماتشوف شر
عز الله انك جبت الاماكن اللي تشرح الصدر وانا اخوك ..على اني مالي ومال الرياض لكن اذا جيت الرياض ودي انحاش .. ابي مكان فيه بر وبريره وجلسه مع قروم وطبخ وفله ..(( لكن ماتحصل بالرياض ))
الله يعطيك العافيه .. وياليت الجميع ينتبه من الاماكن الرمليه .. والله من كثر الدواب هناك
واتمنى للجميع الرحلات الموفقه

تقبل مروري

[escape_man]

الحمد لله

انا ياغرب الرياض اخف من بلواكم ياهل الشمال

شبوكنا اقل ولله الحمد .. محد يبي منطقتنا... اما انتم كنكم بلابل بقفص

المهم اتوقع متنفسي الوحيد بما اني راعي نفود هو الخرارة ... المحلية قبل لا تتشبك والحين معاد نبيها

[ابو الشمقمق]

اخوي ابو معزي and اسكابي مان
اشكركم على مروركم اللطيف
الرياض لولا هالكشتات ما تنبغى ابد

[ابو الشمقمق]

بدأت درجات الحرارة في الرياض بالنزول الحرارة خارج الرياض 29

[SIF]

حياك الله أبو الشمقمق (أبو مال.)

مافيه مثل نفود الثمامة في الصيف لاعقارب ولاديبان ولاجن (ابتسامة)

بالتوفيق حبيب الكل

ملاحظة :
وش رايك يابوالشمقمق كل ماتدخل في منتدى تلقاني وراك صمغ باتكس
هههههههههههههههههه


محبك
أبو ....

[ابو الشمقمق]

حياك الله سيف
واشكرك على مرورك الكريم
وش اخبار القهاوي

[مداوي]

مالك الا النفود اذا مافيه هواء علشان السافي
واقرب نفود لنا الثمامه واللي حوله
اشكرك على الموضوع

[الغريري]

...



فيه هواء وبراد على كيفك ... هواء مشخوووووول هههههه


شاكر لك


...
محبك ابو حمد



وش شاخله غير كثرة الشبوك !.

انا لله وانا اليه راجعون.

:D

[ابو الشمقمق]

مداوي
الغريرياشكركم

[ابو الشمقمق]

مداوي
الغريري اشكركم على المرور
وبصراحة جتني خرعة من النفود بسبب القرصات هههههههههههههههههههه

[سندباد الخليج]

حنا نتسدح عند هالمكيفات الى يطلع سهيل

ثم الى طلع سهيل طول الله بعمرك وعمر من يقرا فيه مكان نروح له حلو

طريق القصيم مخرج ملهم يمين هناك رقه يحبها قلبك نطلع ونسوي عشانا

ونسمر واحياناً نرقد واذ اصبحنا توكلنا على الله

[ابو الشمقمق]

هذا مكان شكله كويس
مفرق ملهم والسبت يطلع سهيل يعني الوعد هناك
اشكر لك مرورك الكريم
سندبــــــــــــــــــــــــــــــــاد الخليج

[احمد العوني]

افضل مكان للجلوس في الدرعية تحديدا عند السد منطقة روعة نصيحة لاتفوتكم براد واماكن جلوس نظيفة وشكرا

[كاشخ 24 ساعه]

ما ادري سعالك عن الاماكن قصدك بروجك او مع الاهل

[الدبوس]

(الجسر المعلق) واللي بيتبطح في الرمل لاتنسون المزاحمية تراها 22 كيلو من مخرج العريجاء وأقرب من الثمامه(مخطط نواره) - (مخرج 7 قبل محطة زمزم وانت رايح للرياض) - (قبل وبعد تفتيش القديه) (مخرج 8 يمين) و (مخرج 9 يسار) وانت متجه للغرب ترا بعد ماتنزل مع الجبل (القديه) تنزل درجة الحرارة بفارق عن الرياض (3-4) درجات .

[ابو الشمقمق]

احمد العوني
كاشخ 24 ساعة
الدبوس
اشكركم على مروركم الكريم
والسؤال هنا للافادة والاستفادة
ونريد اماكن عائلية
وان كانت اكثر طلعاتنا شبابية
والعوائل لهم المخططات الا اذا كانوا مجموعة عوائل فممكن يطلعون مكان صاد شوي

[ابو الشمقمق]

وينكم عطونا اماكن مميزة تكفوووووووووووون يالربع

[ابو الشمقمق]

العيد قرررررب عطونا اقتراحات
تكفووووووووووووووون

[دار الهوى]

يقولون عز البرد يبدأ رابع ايام العيد البر بيكون وقتها الجو زبن للي ماهوب طالع برا المملكة !

[ابو الشمقمق]

اللي يبدا رابع ايام العيد الوسم والا عز البرد بعيد الاضحى ان شاء الله

[رحـ R ـال]

والله يا الغالي ..

أيام الأسبوع ما نطلع ولا ودك تطلع لأن وراك دراسة وأما الأربعاء ففي الاستراحة ,,

ويوم الخمبس إما فطور فوق نفود الخرارة أو في الثمامة << قليل

لأن صراحة ما عاد فيها أحد في رمضان .. العالم في الثمامه

وأحيانا عند الجسر المعلق ..

وأحيانا على طريق الدمام .. نفود قبل الوسيع

وشكرا لك ..

[ابو الشمقمق]

على طاري العقارب
ليلة الجمعة 16 رمضان كنا طالعين شمال استاد الملك فهد طبعا عوايل
وهي تجيك ذيك العقرب السوداء اللي ماودك الا آآآآآآآآآآآآآآه بس
وهي تلهب زوجة واحد من الزملاء ولكن الحمد لله القرصة كانت خفيفة
استفدت فايدة من هالقرصة ان ام العيال قالت ماعاد ابي البر خلاص هونا الله يرحم والديك

وبصراحة قبل هالليلة بكم ليلة (قتلت) عقرب وانا متجه لنفس مكاننا شكلها تدورني ولكن سبق السيف العذل
الله يكفينا شر العقارب


وخذوا تجربة مني ترا قرصة العقرب ماهي بالالم اللي متخيلينه اول
اول مرة قرصتني ماشفتها وولعت النور ابشوف وشو اللي قرصني واثرهااااااااااااا عقرب
ومرة واحد من الزملاء قرص ايضا وقال ماتوقعت ان المها كذا توقعته اشد
وشرايكم تجربوووووووووووووووون

هههههههههههههههههههههههههههه
الله يكفينا جميعا شر العقارب والثعابين آآآآآآآآآآآآآآآآآآآآآآمين


ولكن شطبنا على شمال الاستاد بالمرررررررررررررررة

[صدى الحادي]

أبد .. أنا من سكان السويدي الغربي ,,

مالنا إلا الخرارة ,, كل أسبوع ,, ويا زينها لا صارت قمرا ,,

والمحلية ,, بس المحلية أخطر من الخرارة ,, لانتشار الشباب الغير منضبط فيها ,, وأخبر واحد كان راقد في ذاك .. ولا قام إلا على هاللي يطعنه ,, وياخذ جوالاتهم .. وينحاش .. طبعا الظاهر كان سكران ,,

إذا كنت بتروح بعايلة ما أنصحك بها المناطق إلا وقت تجمع الناس ,, كالأربعا والخميس .. وبشرط أن لا تتأخر في الليل هناك ..

والخرارة ممتازة ,, بس يكون فيها ناس سراقة شوي ,, وفيه ناس يخوفون بعد .. ويطردونك ويلاحقونك .. ويتجمعون عليك إذا كنت الحالك أو في وقت في نصف الأسبوع ,, ولو يكون معك سلاح أحسن .. :) <<<<<< عسى ما صرنا في الربع الخالي ,,

في الحقيقة الكلام اللي أقولك .. كلها مشاهدات واقعة من حولي ,, ومنها اللي شفتها بعيني ,, واسألني ,, أنا شبه اسبوعيا أكون هناك ..

..ويا زين البرا في الليل على الرمل ,, والليلة قمرا ..

[.مكشاتي.]

أبد .. أنا من سكان السويدي الغربي ,,

مالنا إلا الخرارة ,, كل أسبوع ,, ويا زينها لا صارت قمرا ,,

والمحلية ,, بس المحلية أخطر من الخرارة ,, لانتشار الشباب الغير منضبط فيها ,, وأخبر واحد كان راقد في ذاك .. ولا قام إلا على هاللي يطعنه ,, وياخذ جوالاتهم .. وينحاش .. طبعا الظاهر كان سكران ,,

إذا كنت بتروح بعايلة ما أنصحك بها المناطق إلا وقت تجمع الناس ,, كالأربعا والخميس .. وبشرط أن لا تتأخر في الليل هناك ..

والخرارة ممتازة ,, بس يكون فيها ناس سراقة شوي ,, وفيه ناس يخوفون بعد .. ويطردونك ويلاحقونك .. ويتجمعون عليك إذا كنت الحالك أو في وقت في نصف الأسبوع ,, ولو يكون معك سلاح أحسن .. :) <<<<<< عسى ما صرنا في الربع الخالي ,,

في الحقيقة الكلام اللي أقولك .. كلها مشاهدات واقعة من حولي ,, ومنها اللي شفتها بعيني ,, واسألني ,, أنا شبه اسبوعيا أكون هناك ..

..ويا زين البرا في الليل على الرمل ,, والليلة قمرا ..


أشكرك على هذه التنبيهات

[ابو الشمقمق]

والله مشكلة ذا الخرارة
ولكن زينة طلعة كم عائلة مجتمعة
ويازين السلاح المصرح بعد

[أبوطلال2007]

يا عزيزي إذا كان المقصد المضايقات من الشباب أو ( الحد / واللز ) عليك وأنت بسيارتك أو جالس فوق طعس فهذه الايام أصبح أمر خطير جداً ... بل اصبح بكثره .. يوم الثلاثاء الماضي كنت معزوم بإستراحة أحد الزملاء(بالثمامه) (شراوكــــــــــــــــــــــم) للسحور .. المهم بعد السحور .. وآذان الفجر حركت بموتري(جيب /تويوتا) عشان برجع للبيت المهم وأنا ماشي رايح لدوار العويضه ( وإذا بذيك الكامري المليانه من (هالوراعين /مراهقين ) داقين اللطم ومتحاشرين بالموتر ..لا ومن قلة الدين ( أغلبهم مولع سيجارة وقت الإمساك) وهم يحاولون يلزوني عن الشارع ويحاولون يضايقوني بشكل يرفع الظغط ( المهم يوم الشفت الدعوة كذا وأنا إلي أشغل اللمبه الداخلية للموتر وأفتح الدرج وهم قريبين يشوفوني وأطلع الفرد) وياروح ما بعدك روح وأشد موتري معهم (يعني يا أنا يا أنتو يالجرذان)(خفافيش الظلام)وهم اللي ينطلون بموترهم على جنب الطريق في أول منفذ وبسرعة ولا عد شفت إلا غبرتهم ( ياروح ما بعدك روح ) .. والحمد لله مرت هالمره على خير ، والفضل بعد الله سبحان لوجود ( السلاح/ المرخص) .. لذا يا أخواني الكرام في مثل هذا الوقت لا بد من الحذر كل الحذر إذا كنت بتطلع خارج المدينة وخاصة أنت والأهل ..وعسى الله لا يريكم مكروه أجمعنين ... رعــــــــــــــــــاكم الله.،،

[خارج الخدمه]

الله يجزاك خير اخوي وماقصرت وما تشوف شهر وان شااللع انه تكفير ذنوب
والله انا الصراحه من محبين البرد واحتريه على خير ان شاالله على احر من الجمر والله يكتب الي به الخير

[ذيب ساقان]

ماتشوف شر ، والله يكفينا الشر وكل مسلم
وبالنسبة لليالي الرياض لازلت أقضيها في زحمات الرياض ، والله يعين عليها بخير
الوعد إنشاء الله بعد العيد في الأجواء الطيبه ..

[ابو الشمقمق]

ياخوان رجعنا لليالي الرياض الجميلة راح الشتاء وجانا القيظ

[ابو الشمقمق]

عطونا اخباركم

[ابووولجين]

بسم الله عليك ما تشوف شر

[لواء الاسلام]

جزاكم الله خيراا
انا بكون بمصر فى الصيف
الله يعطيك العافيه خى ابو الشمقمق

[shadow]

جزاك الله خيــر يا صاحب الموضوع

[هدير الموج]

تقرير وافي

تسلم يدك

دمت بحفظ الرحمن

[ابو الشمقمق]

يرفع لحاجتنا للكشتات الليلية في ذا الصيف
بالتوفيق لكل المشاركين
لم ارفع الموضوع الا رغبة الاستفادة من خبراتكم

[بر الوالدين]

وش شاخله غير كثرة الشبوك !.

انا لله وانا اليه راجعون.

:D




ههههههههههههههههه الله يسعدك

و الشيوخ أبخص