السلام عليكم === عندي باترول 2006 سلق وعزمه بارد بالحيل وش السوات

[aooa]

يا اخوان

يا اهل الخبره ودي اقوي عزم الموتر وانا رجال كبير بالسن ومبحق تزويد وخرابط تخرب السياره

الحقيقه انني سمعت عن بواجي ليزر + فلتر امريكي بس مدري يقوي العزم وهل سلبيات على السياره

يا ليت احد يقدر يفيدني بالموفيد شاكر لكم تجاوبكم معي

[gsb]

وش نوع المكينه الي فيه فيه ناس ركبوا مكاين فتك مكينه قويه وجبارة وتساعد على العزم تعطي عزم في السرعات المنخفضة والعالية Vtcمكينة السفاري والسوبر سفاري من 202 وطالع

انتبه لصحن الكلشت والدزق لايكون حاصلها احتراق

اذا بغيت النفود نقص من هواء الكفرات 20 -15

[هويدي]

البواجي والاسلاك الرياضيه بتزود عزم الموتر شي بسيط وغير ملاحظ

يعني ما تسوى التعب والدراهم

الفلتر الرياضي حليو خاصه بالقومه وهو انواع وماركات وكل نوع له سعره

فيه نوع مجربه ممتاز اسمه K&n سعره تقريباً من 150 الى 300 تزود او تنقص لاني مبطي ما سعرت

والوصله طلع الحين وصلات ربل بحدود الثلاثين ريال

وكانك تبي تجرب الفلترفك فلتر الهوا وغطى القربه وجرب الموتر ان جازلك ركب فلتر رياضي

واي استفسار حاضرين يا جدي

[aooa]

اشكركم على الردود ولو اني ما طلعت بالحل النهائي

المكينه 4500 بخاج وانا قايل من اول 2006 سلق

هويدي/ جدك يبي موتر يبيض الوجه

[النحيف]

فيه بواجي عند الجفالي لها راسين وثلاثة وأربعة روس على

حسب الطلب وعلى حسب نوع سيارتك ركبها ولا تغير أسلاك

البواجي لأن الأسلاك تعيش واللي عندهم بالوكالة ماتعيش مثل

شد البلد أيضا ًالدزق والكلتش لا تغيرهن ...

والموتر على حسب استخدامك .

[جنوبية سدير]

السلام عليكم
هذي طريقه مجربه واعرف واحد مجربها
امسك به خطوط وانشاء الله يقوى عزمه ويكون اقوى من العاديات

[مسايف الطعس]

شف تبي شي مايضر ويفرق معك واجد
1مراوح كهرب
2هدرز ودبة يوكن علشان يطلع بدون صوت
وأكثر كبار السن الي معهم باترولات قديمة يركبونها
فرق شاسع

لافي ديرة ولا في خط ولا في نفود وكلها ماتضر

بس أنتبه من الفلتر يدخل تراب عليك ويجرح السلندر ويخرب وزنية البنزين ويعدم حساس الهواء

والأسلاك لها ضرر مستقبلي أذا رجعت الموتر بالبواجي حقت البلد مايرجع عزمة زي أول

تحياتي

[القبقب]

والله ياجدنا العزيز أنصحك لاتبدل شىء في الموتر خله شد بلد أفضل
ونصيحة أخيرة ود الموتر للوكالة وأفحص المحرك بالكمبيوتر .
والسلام

[aooa]

والله يا ابنائي افضل شيء اني ابيعه والصراحه ما اشتريته الا للبر

لكن وش تنصحون اشتري موتر يكون عملي وقوي غير الاند لاني مجربه والباترول افضل منه

والامريكي ما هوب مزبن واعطاله كثيره والصراحه ما اثق به

يا ليت تقولون لي عن موتر قوي وموثوق .

[راعي البرقا]

يا اخوان

يا اهل الخبره ودي اقوي عزم الموتر وانا رجال كبير بالسن ومبحق تزويد وخرابط تخرب السياره

الحقيقه انني سمعت عن بواجي ليزر + فلتر امريكي بس مدري يقوي العزم وهل سلبيات على السياره

يا ليت احد يقدر يفيدني بالموفيد شاكر لكم تجاوبكم معي

والله ياخوي أو أقول خالي عشان كبر سنك بس المهم أنا أعرف ثلاثه معهم زي موترك ويشكون من نفس الحاله يعني هذا البرود وكاله و نصيحتي لا تغير شي . واللي أنا أعرفه كبار السن مايسرعون

[ابو ربا]

غير طرمبة بنزين .. ولا عليك .. حطلة طرمبة أمريكي . كابرس
ولا تشوف إلا الخف ...

[waleed888]

اخوي اشتر لك مراوح سوباروا وركبه عند الخطيب بحي السلي بالرياض

وتبي تحس ان الموتر يبي يخف معك وتبي تروح الحنه اللي فيه اعرف كم واحد ركبوا والحمدلله الحين مضبووووط... التركيب بـ 350 والمراوح بـ 100

[سطام vip]

السلام عليكم ورحمة الله وبركاته

مسيك بالخير يا جدي


مشكلتك مثل سيارتي بس انا معي باجيرو

ويوم اشتريته كان عزمه تعبااان مره واخر سرعه يوصلها 80 كم

المهم اول شي سويت اني مسكت طريق المزاحميه ودعست له الين طلع الي في شكمانه من كربون وبلاوي

وانا نازل مع الطلعه (طلعة القديه) داعس البنزين كله الين بدى يصفي الموتر وابشرك صار يوصل ل140كم

بعد كذا سويت تنظيف للكربليتر وغيرت اسلاك بواجي وبواجي اصليه ووزنت الديلكو والحمد لله عزمه صار اقوى وانشط بس السرعه هي نفسها بس في الرمل اقوى والسبب ان الكفرات على سيارتي كبيره واهي الي ماكله العزم

(عارف سيارتك بخاخ اوكي غير البواجي والاسلاك)

وترا الكفرات تأثر على عزم السياره واجد يعني تأكد لا تكون الكفرات اكبر بزياده عن مقاس الوكاله

وفي الختام لا اوصيك وانت اهل معرفه ابدا بالخفيف اول بأول

يعني امسك خط بعدين بواجي بعدين اسلاك وشوف الموتر اذا ضبط والا كمل وغير الدزق والكلتش

والله يكون بعونك ويسهل امرك واسف على الاطاله بس حبيت اشرح لك الي صار ويمكن تستفيد من كلامي

ويستفيد الاعضاء
بالتوفيق لك

[aooa]

اشكر كل من رد وعطاء معلومه مفيده

اللي يقول ان الشيبان ما يسرعون ارد عليه ما ارتاح يا عيالي الا لين اصفط الطبلون

بزاريني والله العظيم من يركبون وهم يقولون شوي شوي يا بوي وما ارد عليهم مره .

اما اللي يقول امسك خط الموتر جديد وغير كذا ما عند شايبكم الا خطوط والسرعه اتحدى واحد يركب معي واسلاك البواجي جديده والموتر ما تعدى الخمسين الف ممشى الصراحه بلشت فيه ما احب الا قوة العزم .

لــــــكــــن وش البديل للباترول مع اني اكرة الاند كروزر من واقع تجربه .


تحياتي يا ابنائي الاعزاء

[مخاوي الذيابه]

السلام عليكم ورحمة الله وبركاته

مساك الله بالخير يا جد

أن كنت تبي موتر عزوم ..

فمالك إلا الفتك 4800 ..

يطربك بالبر ..

آمل اني افدتك ..