قالو مالك الا الله ثم مكشات ....

[كيكي]

بسم الله الرحمن الرحيم

ان شاء الله طالع لمصر الصيفيه هذي عن طريق البر بس ودي اعرف الطريق من وين وكيف الطريقه عند البحر

وكم المسافه من الرياض الا الحدود والخط زين ولا لا وهل الجمارك المصريه تاخذ جمرك على السياره ولا لا

واذا ياخذون كم ياخذون على سياره موديل 2006 وهل يلزم اوراق غير الجواز ولا لا .

ادري كثرت اسئلة بس والله اول مره اطلع من الخليج .

وتكفون ابي تفصيل ممل ممل .

والسكن هناك هل هو مكلف وانا طالع انا رفيق لي يعني عزاب .

[مرات عشقي]

اخوي الي اعرفه ان مصر ماتقدر تروح لها عن طريق البر..
مالك الا تشحن سيارتك في العباره او تروح بالطياره..

[دغيم1]

السلام عليكم ورحمة الله وبركاته
حياك الله أخي الكريم
تستطيع أن تذهب إلى مصر بالسيارة
ولكن أسأل مجرب ولاتسأل طبيب
المسافة بعيدة جدا ومرهقة ، وعند وصولك إلى ضباء تقوم بشحن السيارة معك على العبارة ، والتي تاخذ حوالي 8 ساعات في البحر .
وعند الوصول إلى ميناء سفاجة تبدأ رحلة المعاناة .
رسوم على السيارة ، والطفاية ( طفاية الحريق ) والأرضية واللوحات ومحرك السيارة .
غير البخشيش أو الإكرامية .
يعني لوتروح بالطيارة أفضل وارخص
علاوة على ذلك المسافة بين سفاجة والقاهرة تصل إلى 500 كيلو متر .
تمنياتي لك بالتوفيق
تقبل تحياتي

[كيكي]

بسم الله الرحمن الرحيم

حياكم الله اخواني وجزاكم الله خير على الردود .

اخوي دغيم والله الطياره زينه يعني (( خط بط )) ساعتين وانت هناك بس المشكله هناك ودك تصير معك

سيارتك وتاخذ راحتك والسفر عن طريق البر زين تشوف المدن والقرى وتصور وتوثق الرحله .

وبالنسبه للرسوم متغيره ولا ثابته .

والطريق من الرياض الا الميناء من وين بالتفصيل الله لايهينكم .

[كيكي]

بسم الله الرحمن الرحيم

للرفع الله يرفع قدركم .

يا اخوان والله ماكتبت الموضوع الا للضروره .

ااااااااااااااااخ يالحاجه .

[أبومنصور]

هلابك اخوي
مثل ما قالك اخونا دغيم رح بالطياره افضل
يعني داخل السعوديه بتقطع حوالي الف كيلو او اكثر
غير اللي بتمشيه بمصر هذي نقطه
الثانيه انك ما راح تدل هناك يعني بتروح مثلاً لمول او مكان معين
بتاخذ الوصف وبتضيع وانا مجرب وانا اخوك
شفت زحمه الرياض اضربها في سته تطلع لك زحمه مصر
نصيحه رح بالطياره قيمه التذاكر ومصاريف التكسي هناك
اوفر لك من الروحه عن طريق البر

[جول قميري]

هلا بك اخوي كيكي.

بما انك ملزم تروح عن طريق البر.. فخط السير يبي يكون كالتالي اذا كنت من الرياض.. فيه طريقين..

الاول:

من الرياض - القصيم - المدينة - ينبع - ام لج - الوجة - ضبا. .. تقريبا بين 1500 و 1600 كيلوا.

الطريق الثاني:
الرياض- القصيم - حائل - من طريق الشملي - الجهراء- تيماء - تبوك - ضباء. او ما تلف يمين لتيماء تطول للعلا ومن العلاء طريق للوجة ومن الوجه لضباء ..

والله يعينك مقدما على مرمطة الميناء والجمارك سوا هنا بالسعودية والا بمصر ... علما ان المسافة بين ضباء و
والغردقة فقط 185 كيلوا

[كيكي]

بسم الله الرحمن الرحيم

اولا جزى الله خير كل من رد .

لكن والله متوقع ان الردود اكثر وفائدتها اعم لكن ودي اعلم الاخوان لأني اتوقع بعض الاعضاء مهوب راد يحسب

اني بروح اخربها لا والله ان روحتي هناك تمشيه في الارياف واخذ بعض الدورات في مجال تخصصي

الرياضي .

يعني سوو خير وعلموني شي يبرد الكبد ولا ترى اقرب هاكرز واخلي مكشات

[قلب ذيب]

الله يحييك .
اذا كان سفرك الى مصر لمدة اسبوعين فاقل فالافضل ان تسافر بالطياره , اما اذا كان سفرك حوالي الشهر فالسياره افضل بشرط ( انك قد رزت مصر من قبل ) !
محدثك عشت في مصر لمدة 6 سنوات دراسه وسافرت لها بالسياره أكثر من 50 مره مقناص ودورات وعمل .
- - مداخل مصر البريه المواجه للسعوديه توريك الويل خاصه في الصيف حط في ذهنك انك سوف تقعد في الميناء على الاقل 6 ساعات هذا اذا خلصت بسرعه .
عند نزول سيارتك الى ساحة الجمارك سوف تقوم بفتح ملفين للسياره وسوف تمر على .( خذ عندك )
1 - التأمين
2 - ارقام جمرك
3 - استماره
4 - فحص مفرقعات
5 - فحص مرور
6 - فحص مطابقة شاسيه
7 - فحص جمارك
8 - طفاية حريق
9- فحص شنط
10 - امن دوله
11 - جوازات .
الرسوم + بخشيش مايقارب 5000 ريال !!؟
طبعا هذا في ميناء نويبع / سيناء الذي ستصله من العقبه الاردنيه . الطريق من نويبع الى القاهره عن طريق ( نفق احمد حمدي ) في حدود 550 , ---- طبعا الرادار حيكون قدامك على طريق السويس , سوف يسحب الرخصه منك ويقول لك : راجع مرور الدراسه في القاهره ! ولين توصل مرور الدراسه سوف تدفع مئات الجنيهات , طبعا وين ماتحط سيارتك سوف تدفع باركنق , وبعد كم يوم تلقى جنبها مشخوط وصطابها مكسور وبترجعها السعوديه مدقدقه !!؟-------- .
في الصيف في مصر علشان يجيك طلب شاي وسندويشات تبغى لك ساعه ( والخليجي دائما مستقصد في القاهره ( حر وتلوث وغلاء ------- نصيحتي لاتروح مصر ) الااذا عندك صديق ضابط شرطه !!؟؟

[محمد الصرير]

ياهملالي ياكيكي مصر وبالسيارة عزالله انه مدعي عليك ، ياخوي بتصرف مصاريف الهبل ، رح بالطيارة الله يسلمك ونوع في سيارات الأجرة 100 جنيه للسيارة و100جنية للسواق تحكره عندك اليوم كامل ليل ونهار ويوديك المحل اللي تبيه ، لا وكل محل ومكان تدخل فيه أو تزوره هات يابخشيش ، الله يعينك ، المهم ختام الكلام رحت سيارة رحت طيارة عسى الله يسهل أمرك ونولك مرادك من العلم اللي أنت رايحه عشانه ويردك سالم غانم وأوراقك معك والا الفلوس يخلف الله صرفتها كلها . ودمتم سالمين

[كيكي]

بسم الله الرحمن الرحيم

انا عارف ان السياره غثيثه لكن انا هناك بجلس تقريباًً 3 شهور مهيب معقوله بجلسها على تكاسي

[فتى الدهناء]

بسم الله الرحمن الرحيم

انا عارف ان السياره غثيثه لكن انا هناك بجلس تقريباًً 3 شهور مهيب معقوله بجلسها على تكاسي

الاخوان ماقصروا والله ..

طيب مافكرت تشوف ..سيارات ايجار .. لمدة 3 شهور .. اتوقع .. الــ 5000 اللي بتدفعها حق الدخول بالسيارة .. بتاخذ لك بها موتر ايجار زين لمدة 3 شهور ويمكن ازود .. وبيريّحك واجد .. وقبل ماتروح .. خذ رخصة دولية .. حتى مايستقعدون لك .. غير كذا الإيجار شيك عليه من النت قبل ماتروح .. وعليك بالشركات العالمية المعروفة ..

أما التمشيات .. فعليك بالبحث سواء بحث فردي .. من خلال النت ويمكن تحتاج جي بي اس ..
أو من خلال شركات سياحية معروفة .. وخل تعاملك من خلال النت أفضل .. حتى ماتصير مطمع .. كما يقال ..

وفقك الله في حلّلك وترحالك وحفظك ..

[ابو نايف التميمي]

جلست مع ناس سنويا يروحون لمصر... يروحون بالطياره ويشحنون السيارة.. هذي طريقتهم دايما

اما انك تروح بسيارتك..عز الله انك بتشوف الويل..ماجربت لكن اكثر من شخص..شاف الموت في المنفذ

مرمطه وذل..وبخشيش.. الواحد يتمنى انه جالس في بيتهم ابرك

[ابو الهيثم 1]

نصيحه اذا ملزم على السياره اشحنههههههههههههاااااااااااااااااااا ورح بالطياره .والله مرمطه وقلت اد ب في منافذ مصر.

[كيكي]

بسم الله الرحمن الرحيم

والله صدق من قال((( مالك إلا الله ثم مكشات )))

الاخوان الي ردوا كل واحد بأسمه الله يبيض وجيهكم عز الله انكم قدها وقدود لو اكتب إلين بكره ما اوفيكم حقكم .

والي عنده زود ما فيه مشكله .

(((( اكراميه ياسعدة الباشا )))