اللي يعرف بمشاكل الباترول يتفضل

[حلم الحماد]

السلام عليكم

عندي باترول 91 كل شي تمام الا شي واحد عجزني وعجز كل المكانيكيه والكهربائيين

مع اني اعرف انها بسيطه جدا بس تبي واحد يفهم فيها او مرت عليه

الباترول عندي فيه تقطيعه تأتيه فجأه واحيانا يصفي وماعندك احسن منه

ابي اقول لكم وش سويت له واللي عنده غير اللي سويته يقول

قمت بتنظيف الكلبليتر - وزنت البلوف - غيرت الكويل - غيرت البواجي والبلاتين عدة مرات - غيرت البوبينه

اللي تحت الديلكو - غيرت سلك الكويل - وزنت الديلكو - غيرت نوع البنزين من اخضر للأحمر


يعني ماخليت شي


اللي صادفته هذي الحاله وحلها يلحقنا بالحل او اللي عنده خبره ياليت يخدمنا فيها مشكورا


تقبلوا تحياتي

[ابوسعودد]

ممكن يكون من تانكي البنزين يحتاج تنظيف او الليات من التانكي الى الماكينه

[حلم الحماد]

مشكور ابو سعود ابي اجرب

[حر ((قصاص))]

ممكن يكون من تانكي البنزين يحتاج تنظيف او الليات من التانكي الى الماكينه

ماعلالاكلامك متم,,,,,100%واذا مانفع غير طرمبة البنزين,,,100%

[الوفره]

اخوي عندة باترول وعزمه ضعيف جدا طلع المشكله من فلتر الهواء اذاجاء البنشري ينظفه يحاول يلف الغطاء الذي فوق الفلتر حتي يطلع الفلتر مع عدة مرات فيه لي مطاط ينقطع وينسم الهواءوهذة من اكبر مشاكل البترول ............ الوفره

[فاقد الديرة]

شوف يااخوي حلم الحماد
نضف فلتر الهواء واذا ما فاد افحص تربة البنزين وغير صفاية بنزين
ون شاء لله يزين الموتر

[مقلع الرمث]

غير البواجي وغير صفاي البنزيم وغير الاسلاك وفيه اليات اللي عند التانكي تكون رايحه فيها وتدخل هواء لو تغيرهن وبعدين غير طرمبه البنزيم والله يعينك عليه لان الباترول لاقطع هبلبك اهبال وفيه ورشه عوض السوداني بالصناعيه القديمه ممتاز جدا للباترول

[سوبر VTC]

و عليكم السلام و رحمة الله
اخوي شيك على ليات الهوا حقت الكبليتر يحتمل ان بع شق او تنسيم
ايضا انا اخبر احد الربع معه باترول صالون 97
و كان عزمه ضعيف و يقطع مهب صافي و لقى المشكلة من خرطوش القربه اللي راكب على اللهاة منشق و حط عليه شطرطون و ضبط
و على كلام الاخوان
لاتنسى تشوف صفاي البنزين و فلتر الهوا
تحياتي

[حلم الحماد]

الله يجزاكم خير جميعا راح اشيك عليهن كلهن واشوف

[D I K T O O R]

والله انا تسوي معي الحركه هذي تشوفه يقطع بعض الايام بس قليل ومادري من ووين

[المميـز]

شيك على صفاية البنزين

[ابو عسكر2]

شف الله لا يخسر عليك انا عندي نفس السيارة ونفس الموديل ونفس المشكلة ولا خليت شي مثلك وطلعت المشكلة هي اذا فكيت غطاء الديلكو تشوف من الداخل حديده دائرية لومها ذهبي اذا كانت تتحرك فهذي المشكلة تراها اتعبتني وخسرتني وفي الاخير صلحتها وعتق الموتر لا تخليها تكفي قبل ماتتخسير اكثر

[حلم الحماد]

مشكور ابو عسكر

بس تراني اليوم غيرت الطرمبه والصفايه والبواجي ولا تغير شي

ونبي بكره ان شاء الله نشوف اللي قلت ابو عسكر مع اني شاك بالديلكو من زمان

لان ماخليت شي ماغيرته الله لايخسرنا

الف شكر

[kal]

المشكله في الكبريتر ان كان يطلع دخان مع الشكمان أسود ممكن تأكد لأن الدخان يقفل البواجي وتصير ماتحرق و تشم ريحة البانزين 0

[حلم الحماد]

الف شكر لكل من سجل مروره ونصحنا وابشركم انحلت المشكله والظاهر انها من غطا الديلكو نظفته مثل ماقال اخونا ابو عسكر وتراني غيرت البواجي بنفس الوقت نوعيتهن امريكي ينصحون فيهن والحمد لله انطلق عنانه