السلام عليكم ورحمة الله وبركاته
مساء الخير
بسم الله وعلى بركة الله
الكثير منا يشتكي من سيارته بسبب ثقل او حنة او حراره .
وبالنسبة لمروحة المحرك .
الأغلبيه من وجهة نظري يرشحون مراوح الكهرب ..مع العلم انا عندي حساسيه منها ههههه ((إلا في بعض الأحوال))
راح أتطرق في هذا الموضوع للنوعين من المراوح الكهرباء والبلد وبعدها نتطرق للحراره وثقل السياره
اولا ًالكهرب : المراوح الكهربائية ثابتة السرعه . وهذا يضر بسيارتك لأن اثناء حاجة الرديتر لكمية هواء اكبر المراوح الكهربائية لاتفي بالغرض.
لأنك في بعض المرات تدعس للسياره وراح يحتاج الرديتر لكمية هواء اكبر (والمراوح الكهربائيه سرعتها واحده وخفيفه لاتعطي الرديتر الكمية المطلوبة)
اما مروحة الشركة (الأساسية) فــ تتكيف مع حاجة الرديتر للهواء (مثال : اذا احترت السياره شبكت المروحه ويبين لها حنه وبذالك تزيد كمية دفع الهواء للرديتر.. واذا السياره حرارتها طبيعيه ولاهي محتره ماسمعت لها صوت)
المراوح الكهربائيه : ممكن تفصل عليك في مقطعه وبذالك تحط نفسك في ورطه كبيره .
ولكن مروحة الشركة(الأساسيه) ماينخاف منها ابد لعملها مع المحرك.
وعلى فكره ترى مروحة البلد اذا (الكلتش) حقها فيه مشكله ممكن يسبب حراره حتى ولو كان يحن على طول
او بمعنى اصح شابك على طول ممكن يجيب حراره لأنه يكثر استهلاك الدوران وهذا يجعل المحرك في عطاء متواصل للمروحه إلى ان ترتفع الحراره.
والحين نجي للكلام اللي يبونه أكثر الأخوان :
نصائح للأخوة اللي حرارة سياراتهم ترتفع .
من ناحيتي لو تبون نصيحتي في المروحه المناسبه
ارشح وبقوه مروحة البلد(الأصلية) ولكن..اهم شيء ( العازل البلاستيكي حق المروحه مهم جداااااااااااااااااا) لأنه يجمع الهواء وتدفعه المروحه للرديتر وبذالك تكون كمية الهواء المدفوعه مركزه على الرديتر ..بعكس لو ان المروحه بدون عازل .
مثال : بسيط على أهمية العازل .
لو ان سيارتك بدون عازل مروحه ... ودست على البنزين وانت على ارض ترابيه بتشوف التراب(في وجه العدو) بتحرك من تحت السياره . بينما لو انها بعازل ماراح يصير هذا الشيء
و لو ان مروحة سيارتك بدون عازل ...بتلاحظ لو فتحت غطاء المحرك ان كمية الهواء المنبعة من المحرك كبيره .بينما لو ان المروحه بعازل لما احسست بهذا الهواء ((لأنه يذهب في الإتجاه الصحيح))
نجي الآن للحراره في السياره..ليست في كل الأحوال
من المراوح او الرديتر!!كما يعتقد الأغلبية!!
هناك عدة عوامل لإرتفاع حرارة السيارة
منها : الصبابات(البلوف) -الديلكو- الكوع(الترمستات)-طرمة الماء(الوتر بمب)
راس المكينة (الهد)-امور كهربائية مثل التماس
نصحتي لكم مهما كانت سيارتك حرارتها طبيعيه حاول تشيك عليها من فتره لفتره
لأن حرارة مره وحده كفيلة بأنها تخليك تكره السياره ..وذالك بسبب الأعطال اللي راح تجي سيارتك بسبب حرارة مره وحده.
هذي نصائح بسيطه للحراره وناااااااااافعه بإذن الله ...
1- تبديل غطاء الرديتر .
2 - تسييخ الرديتر .
3 - تبديل(كلتش المروحه) تماتيك المروحه +العازل البلاستيكي اللي يركب على الرديتر وتدور المروحه فيه.
4 - وزن الديلكو ...ملاحظه : يتم وزنه بالمسدس وتجربة الوزنية اللتي تلائم سيارتك .
لأن السياره بلد لها وزنه ولكن مع تغير حالة المحرك يحب اختيار وزنية تلائمة
وجرب اكثر من مره إلى ان تجد الوزنية الملائمة لسيارتك(اللي مايكون فيها غره ولاحراره).
5- وزنية البلوف(الصبابت) . مع مراعاة عدم الشد عليها كثيرا ً او ارخائها كثيرا ً
6 - طرمبة الماء .
نصائح جانبية ومهمة في نفس الوقت :
اذا في سيارتك غره(صوت ديلكو) ولا راح مع وزنية الديلكو
قم بفك الديلكو واخراجه بالكامل و يكون فيه ريش زي اللي فالصوره من الأسفل
الريش هي اللي باللون الأسود طبعا ً هذي حقت سباقات وليست بلد
البلد تختلف ريشها تكون اكبر شوي.. الريش اذا فيها كسور
مع الدعس للسيارة ((يطلع صوت غره))غرغره
يكون السبب اما وزنية ديلكو وإذا مانفعت الوزنية تكون الريش مكسره
عليك استبدالها او تغيير ديلكو.
وفي إمكانك تغير الكوع(الترمستات) وتركب كوع محرك ديزل زي محرك سيارتك(للتيوتا+النيسان)
ويفظل أصلي من الوكيل ((وذالك)) مع مراعاة عدم ترك المحرك بدون كوع(ترمستات)
وستجد الفرق وااااااااضح في نزول الحراره .
تحيتي للجميع ولايحرمونا من دعواتهم الطيبة
اخي المسلم الموضوع إجتهاد شخصي ..يرجى ذكر المصدر عند نقلة
وتمنياتي للجميع بدوام الصحة والعافيه