مشكلة حقيرة الله يجيركم منها

[Riyadh City]

السلام عليكم ورحمة الله


قدر الله على أخوي وأشتراله بيت في شرق الرياض ما كان عندهـ مشاكل أول ما سكن لكن الحين بعد

ما شرى ثلاث سيارات لعياله صار يواجه مشكلة حقيرة للغايه .

كل فترة وقزاز حدى السيارات منكسر تخيلوا السيارات كلهن تعرضت درايشهم للكسر ومحاولة سرقة ما خف

وزنه وثقل ثمنه ..

اليوم وخلال اربعة وعشرين ساعه كاسرين قزاز سيارتين شل الله إيديهم والغبنه إن السيارهـ الأخيرهـ وش سارقين منها ؟؟

سارقين شماغ يعني قمة الإستخفاف والحقارهـ والمشكلة إن الشرطة لا حياة لمن تنادي رغم إن الدوريات

تحوم بالشوارع كنها ليموزين لكن حيهم ما قد شفت فيه دورية وإذا رحت تبلغ عن الحادثه يكبون بودرة كيرم على

السيارهـ ويقولون لك توكل ..

سؤالي للي عانوا من هالشيء :

ما هي الحلول الممكنه ؟؟؟

تحياتي

[قناص خلاوي]

وعليكم السلام ورحمة الله وبركاته
الله يكون بعونكم ويعوضكم خير
الشرطة وتوابعها لا ترجي منها خير

مالك الا ثلاث حلول :
اذا تقدر دخل السيارات داخل البيت وريح راسك خصوصا وقت الظهر والليل

أو شف لك افغاني أو باكستاني متعافي وخله يسبر السيارات
واذا جو (هالسلق) الله يكرمكم قله يمسكهم و يمردغهم بالارض وإن حصل معه كريك تراه ماهيب شينة وطمعه بالاكرامية عشان يتوصى بهم .
لا تقوله يمسكهم عشان تسلمهم للشرطة ترى كلها ساعة ساعتين وتعهد ثم يطلعون وكأنك يابو زيد ماغزيت

والحل الاخير وهو الأصعب :
دوروا لكم حي غير هالحي واسكنوا فيه

[Riyadh City]

هلابك يالقناص ونعم الشور يالغالي لكن ..

الكراج ياخذ سيارة وحدهـ بس والبلا في الي برى ..

أما تغيير الحي العود معند ويقول منيب طالع من محلي ..

أعجبتني فكرة الأفغاني وأظن بيوافق منها يغسل السيارات ومنها يحرسهم لكن المشكله وانا أخوك إنهم

يسرقون السيارهـ في لمح البصر يعني تدخل البيت وتنزل بعد خمس دقايق تلقى الدنيا منقلبه ولا لهم أوقات محددهـ

كان ما أهتدوا الله ياخذهم ويفك المسلمين من شرهم

تحياتي

[WAW]

في حالتك اعتقد الكــاميـــرا هي افضل الحلول

ركب كاميرا على سور البيت او من على السطح وركزها على مقدمة المنزل بما فيها مواقف السيارات

وستشاهد الحرامي بالألوان

[Riyadh City]

يعطيك العافيه عزيزي واو

فكرهـ ممتازهـ وعملية وإذا تخبر لي محل كاميرات تنصحني فيه أكون ممنون

تحياتي

[زنكي]

فيه حل طال عمرك بعد ما تركب كميرات وهذي اسمها أسباب
الحل هو انه كل ما ينزل واحد من سيارته يقول " استودعك الله الذي لا تضيع ودائعه " موقناً من قلبه إن الله خير حافظاً وهو أرحم الراحمين .

[Riyadh City]

صدقت اخوي زنكي والله خير الحافظين ...

المشكلة ان العيال مراهقين وتعرف المراهقين ما يتنبهون لمثل هالأمور لكن صدقت من الواجب تنبيههم

مشكور وجزاك الله خير

[زايــ ابومحمد ــد]

اخوي00
حطولكم كمرات مراقبه صغيره ما تنشاف وبنفس الوقت تسجل باشرطه مضغوطه0000
تحيــــــــــــــــاتي000

[عاشق السناف]

أخوي تمركز على سطح البيت وخذ لك خرازة برنو وإذا شفته

أرمه في رجله ولا ساقه ولا من شاف ولا من درى وخل الكلب ينقع في دمه

طريقة مجربة لمثل هولاء الحثالة

ولا عاد يقرب شارعكم نهائي

لااااا عشان يروح يشتكيك وتصير مشكله ثانيه

ماا مثل الافغاني بس

ولا خلهم ثنين مسنترين ودسم شواربهم

لمدة سبوعين بسس جرب

[shaheenshah]

الكل يعاني من هالظاهرة
كنت اعاني من هالشي والحمد لله بعد ما صرت استودعها الله والله ان ما احد جاها

الحل النهائي انك تدخلها في البيت
ولكن تقدر تركب انذار يكون صوته عالى يقلل من عملية السرق وانا متأكد ان الشخص اللي كسر قزاز سياراتكم هو نفس الشخص

[قرقاع]

الله يعينك

تبي حل صح اشتر كلب الله يكمرك ويكرم السامعين واربطه بسلسله طوله على قد موقف السيارات مايتعداها

واذا واحد قرب من السياره يبنح واحد اعرفه مسويها لاكن فالت الكلب مايروح من عند السياره

[الدربشي]

انا اوافق اخوي قناص واخوي waw في فكرة الباكستاني والكاميرا بس لو انا مكانك كان اصيدهم بيدي من كثر القهر يعني تراقبهم من بعيد وتقول لخوك تعال انت وقف سيارتك وادخل البيت وانت وقف سيارتك باخر الشارع او جمب بيت جاركموخلك بالسيارة وراقب وحط عينك على السيارة وشوف مين الي يكسر الزجاج .

[هدد688]

في حالتك اعتقد الكــاميـــرا هي افضل الحلول

ركب كاميرا على سور البيت او من على السطح وركزها على مقدمة المنزل بما فيها مواقف السيارات

وستشاهد الحرامي بالألوان

اتوقع هذا حل ناجح من ضمن الحلول

واقعد راقبه واول مايوقف انطلق عليه وارمغه رمغ

الله يكون بعونك .

[ابو نايف 111]

الله يكون بعونك
الكميرات فيه بل البطحاء صغيره جدا سلكي ولا سلكي
150 ريال اشبك الاسيفر حق الكميره بل الفديو مضغوط
ملاحضه خل الكميره مكان واضح تصور السياره او الاوحه
الحرامي ورح لم الشرطه
على ما فهمت من كلامك ..... ترا الدعوه عنصريه فقط
مثال صرقت الشماغ ... هاذي معناها توصيل رساله فقط

[شاقي القميري]

الله يعيننا وياه