كثرت الاسئله (1) عن الكفرات البالون والكفرات العاديه للجيوب ( من واقع تجربه حياك )

[التعـ King ـديل]

السلام عليكم ورحمه الله وبركاته

اخواني الغالي اعضاء منتدى مكشات كثرت المواضيع اللي تسئل وش احسن كفرات للموتر الفلاني والموتر الفلاني

انا بتكلم عن تجربتي مع الكفرات وابي الكل يشاركني بتجاربه وبنوع الكفرات مع ذكر الموديل ونوع السياره اتفقنا

انا احب شي اسمه باترول ووفقني الله وجربت اغلب موديلاته من 1989 الى 2006 واقولها والله يشهد عمري

ماجربت كفر وطول معي بسفر وبر وداخل الديره مثل الماكسس بالون 900 مريح داخل الديره وبالخطوط وبالبر

وميزته انه ماينصلخ يعني لاقدر الله وصار شي للكفر تلاقيه ينسم على مهله ولا يتقطع مثل بقيه الكفرات ويقلب الموتر

انا جربت الدنلوب 275/70/16 حلو وماعليه كلام بس ماارتحت له مثل الماكسس 900 وجربت الفايرستون نفس المقاس

حلوو مرره ويطول ويتحمل لكن لاجيت تبيعه مستعمل ماعليه طلب لان اغلب الناس ماتعرفه او ماتستخدمه كثير

جربت البرجستون نفس المقاس حلو وصبور لكن قاسي ومطبه قوي وجربت الهانكوك مقاس 245/85/16

على جنوط باجيرو الكفرات ماعليها كلام لكن عيبها قاسيه مو مثل الشاهين وجربت الشاهين نفس المقاس

حلوة لكن عيبها ماتمسك بالارض وتتزحلق وصوتها عالي عند اللفات السريعه

انا تكلمت عن تجاربي وابي مشاركتكم

[المميـز]

من واقع تجربتي

الدانلوب قاسي بالردميات وغيرتها بالفايـروستــون وارررررتحت كثير بالردميات
مع الفايرستون واستمريت على الفايرستون لاني ارتحت له كثير

وماني من ربع البوالين

واحد الزملاء جرب البرجستون ويمدحها كثير

ولكن مهب كل البرجستون ... فيه نوع اسمه على ما اعتقد
برجستون ( بردي ) او ( ردبي )

للاسف اني ناسي الاسم ولكن ان شاء الله اجيبه اليوم واكتبه لكم

[عجمي]

جربت البالون والدنلوب السخيف
بالنسبة للدنلوب قاسي وعيبة ماينفع بالنفود لأنة يتعب الموتر واذا نقصتة ماسلمت من البنشرة كذلك قليل يعيش معك الين يقضي بختصار عيوبة اكثر من مميزاتة
اما البالون كفر لايعلى علية بالبر سواء الرمل او الحجر ومريح مرة لكن فية عيب وهو الرجة وماتجي الا بشكل تدريجي يعني اول طقم تكون خفيفة بعدة تزيد الرجة ويأثر على الاذرعة مستقبلا وهذا عيبة الوحيد

[التعـ King ـديل]

اخوي المميز اشكر لك مداخلتك وباانتظار الاسم

اخوي عجمي انا معك بس البالون يحتاج ترصيص كل 3 اشهر ترصيص ارضي كذلك يحتاج الى تشيك الاذرعه كل فتره

لانها مع استخدام البالون تبدا ترتخي ومع الاهمال تخرب

[آل زايد502]

اخوي خبير نيسان يعطيك العافيه على الموضوع القيم الذي يفيد ويستفاد
بغيت اسألك وش تنصحني على الشنابر الشاهين ولا الماكسس بالون

[التعـ King ـديل]

اخوي ال زايد على الشنابر الشاهين حلوة والبالون حلوة بس تراها لازم لستك ماتجي تيوب لس .. اذا تبي تيوب لس شف لك جنط غير

عندك الباثفيندر سلق حلوة وانصحك فيها اذا تبي كفرات مثل الشاهين والبالون احسن لك من الشنابر لانها متعبه

[آل زايد502]

بس جنوط الباثفندر ماتجي على جمس الحوض

[التعـ King ـديل]

توقعت معك نيسان .. طيب يالغلا فيه جنوط للجمس حلوة حقت الجموس الجديده من 2000 وطالع ست مسامير وفي ثمان مسامير اشوف انها احلا من الشنبر

[MR.SAEED]

..

بارك الله فيكم على ه الموضوع ،،

لكن //

ما اعطيتون رأيكم في كفرات الميشلان ،،

خاصة //على اليوكن مقاس 16
فيه نوع يمدحونه عليه طبعة مكتوب عليها 114H

يقولون تتحمل سرعات عاليه وحرارة // وتصلح لرمل عند ضغط 15

[هويدي]

يعطيك العافيه خبرينا الفذ

تجاربي مع الكفرات التاليه

سومو تومو بالون بايخ لا يقربكم اذا حطيته تيوبلس ينسم من عند الجنط

شاهين الطوال 16 \85 \245 زي ماتفضل خبيرنا ازعاج اصوات وتزحلق بسرعه بمطر او بدون مطر وسريعه التحبيل !!

ماكسس بالون حليو ميزته الخفه مقارنه بالانواع الاخرى ولكن يعيبه عدم الرساوه بالخط مقارنه بالسيام

سيام بالون 6 كاندس او ( غاط ) من اروع ماجربت من البالون راسي بالخط ويصبر كان عندي طقم جلس عندي ثلاث سنوات ماخليتبهن مكان من خطوط واراضي وعره من ضمنها حره الحره بحايل حط الهوا 20 وتندح بالوعر بس يعيبها ثقلها مقارنه بالماكسس

[آل زايد502]

سلمت يالغالي وماقصرت الحين انا مركب جنوط امريكيه الي تشبه الجي تي بس اكبر فتحاتها وودي اغيرها وفكرت فالشنابر

[wafian]

موضوع مهم للغاية شكرا لكم على التفاعل

انا معي نيسان باترول SGL VTC 2004

و جربت كفرات الادفنس 825 ممتازة مرة بالبر و البديرة

راسية ومريحة و راعية مكدة حيل حيل

بس اهم شئ ضغط الهواء 20 بالبر و 30 بالديرة

ويكون ترصيص ممتاز




ابو وافي

[محنك]

السلام عليكم .. شكر خاص لصاحب الموضوع
تشكرات لكل من ساهم بتجربته ..
إليكم تجربتي بإختصار
جربت هانكوك 85 / 16 ثقيل ومليان ربل .
جربت بالون دنلوب مقاس 255 / 90 / 16 نفس إرتفاع ال 85 و 8 غاط والحقيقه أنه مسكت
أطمن من ال 900 وأفضل وأخف من المكسس كثير والقوة يتحمل الحصى بشكل عجيب .
جربت الشواهين بمقاساتها زينه للرمل اللي مافيه عاذر أما الشوك والعاذر والشعبان والحصى ماتصلح ابد جنوبه ضعيفة ....... ونفس الدعسه قاسيه في المطبات .... والردميات
جربت الماكسس الحجري ارتفاع 85 جنط 16 قوي للحصى ومطبه معقول ..
جربت السيام البالون 8 غاط ثقيل جدا جدا جدا جدا يبي له 8 سلندر تشحطه
جربت التويو الحجري مقاس 85 جنط 16 مكتوب على جنبها 8 غاط سيئة وخيبت ظني
جربت الدنلوب حقت الشاص مقاس 225 / 90 / 16 رملي ثقيله ومليانه حديد ومطبها اللهم عافنا وجنبها الشوك يدخل بالراحه . ونحيفه ولاتدور رساوه ابد ابد
جربت برجستون مقاس 85 / 235 / 16 مكتوب على جنبه 8 غاط حق الجموس القديمه ويعتبر هذا الكفر من اقوى الكفرات للبر والحصى والخطووط وراسي ويتحمل بشكل عجيب صحيح مطبه قاسي بس جحط الهواء 30 ووكل الله .... كفر بصراحه للمهمات الصعبة ................ نقشه ناعمه ومافيه صوت وجنبه قووووووووي جدا جدا
لكن بالنسبه للبالون فمثل ماقالو الشباب انه يأثر على السيارة فمثلا صديقي ركبه على جيب جديد وبعد 6 شهور صار الجيب فاجح ؟؟ وصلحه عند ميزان البادية والسبب البالون .
كذلك الثقل الشديد للجيب .. يعني يطيح نصف عزم موترك كله من البالون .. يعني مايمشي الجيب الا بشحط
مع البوالين ....... اخونا ابو وافي اشكرك لكن مشكلة الادفنس لازم لستك لانها تنسم من اول يوووووووم
أخيراً اخي المسافر في هذه الاجازة 2000 ريال ليست غاليه في كفرات جديده فالازفلت حار وكفراتك قديمه وجيبك رفيع عن الارض وحياتك وحياة اهلك وعائلتك ليست رخيصة عليك ...

[خيام الندم]

	السلام عليكم ... تجربتي للمكســـس النايلون مخطـــط بس مهوب بالون ولايصلح للرمل أبـــد .. ممتـــاز للحصى والردميات ومطبه زين بس ثقيل شوي ....... مقاسه 825 _16 ننتظر المشاركات ....

[آل زايد502]

أخيراً اخي المسافر في هذه الاجازة 2000 ريال ليست غاليه في كفرات جديده فالازفلت حار وكفراتك قديمه وجيبك رفيع عن الارض وحياتك وحياة اهلك وعائلتك ليست رخيصة عليك
صدقت يالغالي والله يجزاك الف الف خير على النصيحه القيمه