مافائدة الكعكات .؟ وهل لها تأثيرات يوجد صور

[ريان9]

السلام عليكم


كيف حالكم ان شاء الله بخير



امس نتمشى انا وواحد من الشباب وقال وش رايك نطلع للبر قلت يالله المهم نسمنا لان خويي موتره هايلوكس دفرنس 2008 المهم دخلنا وسالت خويي ياولد وش الصوت هذا قال هذي الصاجه تحك الارض قلت له شف لك حل مايصير كل مابغيت تدخل البر تحك


قال والله اني متعذب بخشته ومتحسف ابيعه

قالي انا افكر بكعكات بس خايف منهن ان فيه ناس يقولون خطيره ومن هالكلام


وفي ناس تقول اذا ركبته مردك تبي تفكه والسبب اذا رحت تفحص السياره لزم تفك كل شي حطيته



لانك غيرت به شي



وقال اني متخوف من هالشي الربط والفك شي يخوف والرجال يخاف على موتره



المهم يو م طلعنا قلت له خلنا نمر محلات قطع الغيار ونسالهم



رحنا وسألناهم قالو فيه


هذي الصور














وسعر الكعكات الالمنيوم الواحده 50 ريال يعني حبتين بـ 100 ريال


والربلات الوحده 15 ريال



والتركيب بـ100 ريال



يعني الشغله بسيطه


ولا تحتاج لوقت كله ساعتين وتخلص السياره

هذا على حسب كلاام راعي الورشه





لكن يااخوان هل تنصحون الرجال انه يركبهن مع انه ماهب راعي مطاعس ولاخرابيط

رجال يالله يالله يمشي وراكد



بس ماوقفته ومضيقه صدره الا هالخشه


ويبي حل


قلت له انا مسجل بمنتدى مكشات


والذيااابه مايقصروون



مع اني مستغرب ان صناعتها سوريه!!!



فا وش رايكم ؟؟

[مرير الشوق]

بصراحه اخوي انا مركبها صار لي اكثر من سنه ونصف
على نيسان باثفندر من الخلف وركبتها بالصناعيه القديمه اذكر خذيتها
الكعكات تقريباً 100 ريال
والتركيب 80 ريال
وبدون ربلات ولا شئ على طول ركبتها من فوق الياي ..

ولله الحمد مابعد شفت شئ منها لا صوت ولا ضرر ..
وانا مركب الكعكات 3 سم

والكعكات يقصها لك راعي المخرطه ..والتركيب يركبها لك راعي الورشه
بس اشرط على اللي يركبها انه اذا جاء يرفع السياره مايضر فيها لان بعضهم
عليميه يرفعون السياره بسلاسل وهذا يضر بالسياره .. يمكن يكسر الصدام او يضر بالشاص

والله يسهل عليك

[محمد بن سعيد]

والله انا مركب على موتري فورتشنر قدام 1سم ومن الخلف 1سم لأني قدام مركب دعامية والخلف عندي تانكي ماء
لكن هي تخلي مطب الموتر قاسي شوي

بس إذا يبي يرفع الوجهيه يروح لم الرماية اللي بمحطة نفط شارع التخصصي عندهم ياي يرفع الوجه بطول 3سم

[عاشق z71]

الكعكات مامنها مضره ابد


بس قل للي يبي يركبها خله يحط فوقها قطعة ربل ولا جلده او اي شي

[هويدي]

بالنسبه للكعكات انا مفصل قبل 3 سنوات المنيوم 2 سم ونص بـ 70 وحالياً بميه ريال
انت وشطارتك بالمكاسر واي مخرطه تضبطها جبله الياي ويسوي على مقاسه

والتركيب راعي الورشه مبالغ بالسعر والوقت حده خمسين ريال

ولا منهن خطر وخوف ويفصل على الارتفاع اللي يبي

وانصحه يركبهن عند فلبيني الرمايه اللي بالتخصصي

واي استفسار حاضرين

[سبع الصحراء]

والله انا مركب على موتري فورتشنر قدام 1سم ومن الخلف 1سم لأني قدام مركب دعامية والخلف عندي تانكي ماء
لكن هي تخلي مطب الموتر قاسي شوي

بس إذا يبي يرفع الوجهيه يروح لم الرماية اللي بمحطة نفط شارع التخصصي عندهم ياي يرفع الوجه بطول 3سم

الكعكات مالها دخل أبدا بقساوة المطب

[ريان9]

جزاكم الله خير

لكن نريد مشاركة بقيت الأعضاء


ونريد ممن جربها

وكم سم يصلح لأرتفاع الهايلكس الجديد

لاني سألت واحد معه هايلكس 2006 يقول وجه السياره بيكون ثابت

وفيه قرقعه(اصوات) فماذا الحل هل اذا ركب الكعكات يحط ربل نفس الصوره التي اضفتها قبل

وسؤال ثاني الله يعافيكم هل اذا بغا يفحص السياره يفك الكعكات


واسف على كثر الأساله
وتحملووونا..




ومشكوورين مرا اخرى

[الشمالي.كوم]

انا مركبها على موتري السابق وصارت عليه اكثر من 6 شهور ولا صار شي

كله اشاعات اللي يقولون تخرب الموتر

اهم شي ركب كعكات مطاط زي اللي بالصورة السودا لا تركب الأمنيوم او الحديد لانك اذا دخلت الطعوس
تلجك صوت طقطقة

والدليل ان المطاط افضل شف الوكاله وش حاطين ! وفيه منه احجام في 2سم 3سم 4سم

تقبل ودي وردي~