شوراكم و هداية الله ...

[راع الطويلات]

ياجماعة انا ناوي اشري باجيرو ربع سلق قلت ابشوف الاخوان اللي جرب الموتر او يعرف احد مجربه وش رايه فيه من ناحية الراحة والصرفية و سعة التانكي و قطع الغيار اسعرها شكرا للجميع وجعلني واياكم من عتقائه من النيران .

[راعي المجهم]

السيارة حليوة بس عيبها قطع الغيار غاااااااااااالية جداً

كان معنا واحد 2005 ربع قير عادي كل 9 شهور وإن طولت سنة

دسك كلتش وصحن فوق 2900 ريال وشغل يد 800 خرب علينا مرتين

خفيف جداً يلعب فيه الهواء على سرعة 140

مطبه ثقيل شوي صرفية للبنزين جيدة جداً

صغير من الداخل مايشيل عفش وركاب

أسعارها نحن بعنا موترنا قبل سنة بــ 40 ألف ريال نظيف شد بلاده

[راع الطويلات]

مشكور اخوي وبيض الله و جهك نتظر راي باقي الاخوان

[راع الطويلات]

للرفــــــــــــــــــع

[NEWASSER]

السلام عليكم
انا عندي راي مخالف موتري 2008 تماتك 3.8
السياره ماشاء الله روعه وراسيه وفي الطعوس تعطيك ما تبي "تقارن مع ربع التويوتا" والدبل قوي جدا
بس المشكله قطع الغيار الاستهلاكيه رخيصه
مثلا الفحمات الفرامل بين250-350
فلتر الزيت30 فلتر البنزين 40 وكذا
بس الديكورات نار مثل لمبه الضباب 1000 الواحده حامل الاسبير 2600 الاسطاب الخلفي 1600
وصرفيه البنزين عاليه قريب من الاند والباترول يعني 15 لترلل100كيلو
وتانكي البنزين صغير 66 لتر
انت استخير واذا الموتر عاجبك توكل على الله
تراه بس تنزل فيه البر بيكبر في عينك

[راع الطويلات]

مشكور اخوي و بيض الله وجيهكم الجميع .

[سوبر VTC]

الموتر طيب بالحيل
اهم شي مكينه 3800

كان مع واحد من بريده ربع يتردد عليه لحفر الباطن حول 400كيلو
يمشي على سرعه 170
يوصل البنزين على النص
راحه و قل صرفيه
عيبه قطع الغيار
لكن يمكن يميزه انه قطع غيار اصلي قليل الخراب

اهم شي الاستخاره بعد الاستشارة

موفق

[راع الطويلات]

مشكور اخوي و بيض الله وجهك

[بن محفوظ]

راع الطويلات : حياك الله اخوي

والعشر مباركه علينا وعليك ... والله يتقبل منا ومنكم ...

بالنسبة للموتر يعيبه قطع الغيار ...


لكن بالنسبة للموضوع (( شورك وهداية الله ))

فلا يصح قولها ... والا فضل

هداية الله ثم شورك


وموفق ان شاء الله

[راع الطويلات]

مشكور اخوي و ماقصرت