استفسار عن كفرات

[ماكسس 900]

مسيكم بالخير
بغيت استفسر عن كفرات دنلوب المسماة (( ابو لبنه))
سعرها..
استخدامها بالنفود كيف وهل زرعها طويل
هل هي صباره
--------
السؤال الثاني
بالنسبه لجنط باترول السلقه شد بلد 16
هي 6 انش هل تركب على كفرات 275؟
وشكراً

[خيام الندم]

اهلاً وسهلا
بالنسبة لكفرات دنلوب أبو لبنه فهي نوعين
النوع الأول يجي شد بلد على الهدد .. مقاسها 235 < 85 < 16 أجمل من الثاني .
والنوع الثاني لبنته مستطيلات مايله هذا يجي عالربع التويوتا سابقاُ وهذا مقاسة 750 على 16 ويجي منه 6 غاط ويجي منه 8 غاط تشوفها بعيونك مكتوبة على الجنب .. 6 أو 8 غاط والفرق بالسعر 20 ريال تقريباً
والنوعين يسمونها أبولبنه ......... والسعر كلهن الكفر ب 450 ريال هالأيام ..
جواب سؤالك بالخط ممتازه وخفيفة وأنواع السرعه وحط رجلك ومالهن صوت بالخط لكن بالنفود جربها 2 من الربع كلهم يشتكون منها كل النوعين جربوها بالنفود وإنفسخ معهم الكفر عن الجنط وحاطين بالكفرات الهواء 15 !!!!!
يقولون ماسايفنا بالطعوس وممشانا راكد ومع ذلك تسفطت الكفرات , وركبو دنلوب رملي
وابو لبنه مخصصة فقط للحجر والحرات ومع الحصـــــى فك وأفك ............ الشي المهم اللي بقولك عليه أن ابولبنه مقاس 750 دنلوب المستطيلات المايله هذا سلمك الله مخصص أنه لستك يجي على جنوط الربع الشنابر عكس ابو لبنه حق الهدد جاي للتيوبلس فلو ركبتاه على الجنوط التيوبلس وليست شنبر أكيد إنه أكثر مشاكل من التيوبلس اللي يجي للهدد !
............ جواب سؤلك الأخير صحيح تركب العريضه على الجنط النحيف وقد ركبتها كثير وزينه وقت الحصى مايجي لها جنوب ... تكون واقفه أكثر من انك تركبها على الجنوط العريضه ......... لكن شكل السيارة بالجنوط النحيفه والكفرات السلق النحيفة أفــضل وأجمــــل .... .. كلمه أخيره ابو لبنه يحفر بالرمل وينفصخ ............ وسمعت الربع يقولون إن الرمل إذا نسمت يدخل بين الجنط وبين الكفر ,,
أرجو إني أفدتك ,,,,,,,,,,,,,,, لكن أنا أبي أسألك بما إن إسم المعرف الخاص بك ماكسس 900 كيف البالون معك الماكسس عسى منت زعلان عليه .. أو خيب ضنك
الثلاثاء 15 ذي القعده 1430 هــــــــ

[ماكسس 900]

حياك أخوي
ومشكور على الرد الأكثر من رائع
لكن غريبه انه يحفر ؟؟
اشوف زرعاتها طوال بالحيل
------------------------
وبالنسبه لأستفسارك
البالون الماكسس ممتازااااات بالحيل وأفضل مافيها انه كنك راكب على هوا الكفرات مريحات بالحيل والمطب
لين وبالبر ماعليه كلام

[ماكسس 900]

معليش أخوي
لكن الي ينفصخ هو حق الهدد او حق الربع او كلهن ؟؟

[ماكسس 900]

للرفع
للرفع
للرفع

[خيام الندم]

أيها الماكسس 900 السلام عليكم .....
الجيب ربع باترول مركب ال 750 وإنفصخ وجنوطه برازيلي .
والشاص مركب ال 235 حقت الهدد وإنفصخ وجنوطه هلل أصليه ..
انا توي مركب ماكسس 8 غاط طبعا 2009 قبل أسبوع ورصصتها للشتويه وإذا خلصت الشتويه كان حنا من الحيين بأركب إن شاء الله كفرات نوع ..... لامانيب معلم هع كل شي بوقته حلو !!!
على فكره ليش ماركبت الرملي الدنلوب او لك ملاحظات عليه مثلاً ... مع إني أشوفه ضعيف جنبه جدا مثل الشاهين للي بيروح شعبان الشوك بيلعب فيه والحصاة ودك تاطاها بس لاتضرب جنبه .. بس للرمل مناسب جدا زي السمكه أو الصقنقور الرملي ,, وماتنفصخ الا في حالات قليله مع المسايف وقل الهواء ..
وحتى جنب الحجريات ترى مهوب قوي زي البالون أو زي البرجستون ال 8 غاط الحجري .. جنوب الحجريه الدنلوب عاديه جدا ... الشوك يدخل والحصى مع الجنب يضره ...........

[ماكسس 900]

أها يعني اشيل ابو لبنه من راسي
--------
أنا داري إني ازعجتك لكن أخر سؤال:d
طيب أنت قلت انه الدنلوب على جنوط 16 الباترول ممتازات بالحصى وإنها مالها جنوب
طيب بالرمل وش رايك فيها تبيض الوجه؟

[خيام الندم]

الســـلام عليكـــم ...
قصدك العريضــــة على جنوط ال 6 ملم ... بالرمل ممــتازة جــداً طبعاً مع التنسيم ومطبها زين .
لكـــن مشكلتها إنها قصـــيرة واطيه ... يعني الجيب بينزل شــوي معـك إذا إنت متعود عالرفع والكفرات الرفيعــه مثل ال 900 وال 85 ... والمكان بيــن الرفــرف والكفــر بيكــبر الفــراغ ... إلا إذا كان الجيب مارفع أساساً بيكون مناسب ..
وراسـية بالخط أكـــثر من النحيفة الشاهـــين او الدنلوب الرملي حـق الـشاص ال 255/95/16 او القصير منه 245/85/16 ..
بـــس بالحصى ترى مثل غيرها بالضعف والعاذر بالرمل .. مامدحــتها بس أنا أقــول إن الجنب يجـي واقــف شــوي .. مو مثل الجنوط العريضة .. يسلم من الحصى أكثر من الجنوط العريضة ....
ماودك نفتح أنا وياك بنشر !

[ماكسس 900]

ههههههههههههههههههههههههه
الله يخزي بليسك
والله ماودك نرفع عريضة تظلم على تجار الكفرات موب ازين

[سلطان الغامدي]

اخوي ادا كانت السيارة ثقيلة او خفيفة خدلك برجستم يعيش معاك5سنوات واكثر ادا انت محافض على الكفر وشكرا

[ماكسس 900]

أخوي سلطان
صح لسانك
وأنا غيرت رأيي
باخذ بريجستون شد بلد 16

[الإستراتيجي]

خذ شيء يتحمل الحصى لأني كلتها كذا مرة في البر بسبب نوع الكفرات .



جرب الكفرات من أي نوع لكن أبتعد عن الرمليه حيث أنها حساسه في الحجر مثل ما قالو أخوانا


وأزيد وأقول أبعد عن هنكوك الرديء ،،، شكله ممتاز لكن لا تطلع من الخط أبد .

لأنه متى ما لامس البر يحبل و يبنشر من عود واطيه 100 موتر قبلك :d .


كنت أتمشى بالنفود ولحسن الحظ أني قريب من الخط ولحقت نفسي في آخر اللحظات ما كان معي عده ...


وكلتها كذا مرة غيرت ماكسس ولله الحمد تمام .

الموتر جمس

[الإستراتيجي]

اخوي ادا كانت السيارة ثقيلة او خفيفة خدلك برجستم يعيش معاك5سنوات واكثر ادا انت محافض على الكفر وشكرا

لا تحسبها كذا أخوي


الأفضل دائما كل 4 سنوات يتم تغيير الكفرات لو ما بها شيء .


وعن تجربه لي شخصيه كل سنتين أغيرها ، لأمور كثيره أهمها سلامتك أنت ومن معك


لأني جربت ثلاث سنوات أجد الكفرات تطلب وكل أربع ينفقع الكفر ويعدم البودي .


لذلك قلت أختصرها كل سنتين الحمد لله يوم أتخذت هذه القاعدة ما عاد أشوف شر الكفرات ولله الحمد .

[طير المحبه]

الماكسس ناس واجد يمدحون ..