السلام عليكم ورحمة الله وبركاته
إخواني الأفاضل أول شي من العايدن الفايزين إنشاء الله وكل عام وأنتم بألف خير كما تعلون أن إستراحة الجمعة مخصصة للشيخ أبو محمد وطلبته انا بالاستراحة الماضية أن يروي لنا موقف صار عليه بالبر خصوصا أن الشيخ له باع طويل بالمقانيص والبر وتفضل مشكورا بفتح المجال الاول لي أشكره جزيل الشكر واليوم يالربع بروي لكم حادثة مرت علي شخصيا برحلة من رحلات القنص ماطول عليكم إليكم الرحلة بحذافيرها بدون تكلف بالعبارات لأني ابي اللي يقرا الموضوع يحس إني أنا جالس واسولف له
الرحلة ؟؟؟؟؟؟
قررنا أنا وأبو فجر وأبو رينال الله يذكرهم بالخير للقنص وكان عام 1426هـ وكانت الاجواء ربيع يالله من فضلك اتفقنا وجهزنا عزبتنا ومعاميلنا وموترنا وتوكلنا على الله ومشينا لين وصلنا أطراف طمية ويوم جينا وليا الربيع والوناسه وإنبسطنا وتعال شف أنواع التعاليق والضحك وأنواع المقالب المهم جينا هاك الوادي المربع بعد العصر ونزلنا المعاميل وولعنا النار وسويت القهوة وأبو رينال يحطب وأبو فجر يفرش الفرش تقهوينا وأمرحنا والصبح افطرنا وعينا من الله خير وجهزنا بواريدنا وتوكلنا
على الله ندور الصيد والحمد لله وفقنا الله ولقينا صيد وفير وتغدينا وتعشينا وجلسنا على هالحال ثلاثة أيام فطور وغداء وعشاء صيد يالله احمدك واشكرك لين غداء الواحد تقول كورة واليوم الرابع كالعادة من الصبح سرحنا ورزقنا الله وصدنا غدانا اللي يكفينا بدون إسراف ابد ولزينا الموتر بهاك الشجرة الدوفاء (الكبيرة) ونزلنا المعاميل نبي الغداء وهبة الريح والعلوم الزينة اللي ماكملت المهم وحنا منهمكين بتضبيط الامور إلا وأبو فجر يقولي يابو مازن شف اللي بقاعة الرمثة هاذيك كنه كروان ناظرت فيه قلت إي بالله كروان قال يا زينه زيناه بروح ارميه قلت يابن الحلال اتركه اللي معنا مكفينا وزود قال راميه راميه خذا الخرازة وراح أنا ناظرت فيه لين علمي به قام يزحف على بطنه سواة الطفل الرضيع إيه كل هذا مايبي الطير يشوفه ويطيرتركته أنا وكملت شغلي ثارت البندق ملقيته بال قلت اكيد قضى عليه ابو فجر ولا دريت إلا وأبو فجر يناديني ويصيح علي يابو مازن يابومازن الحق البندق ثارت علي البندق اكلتني ناظرت فيه ولياه طايح بالارض قمت ادور مكاني ارتبشت والله مدري ويش اسوي وليا ابو رينال فازع جاي يركض حذفت اللي بيدي وركضت وردنا عليه سوى ولياه طايح وثوبه غرقان بالدم وهو يتلوى من الالم انا خفت إنها جت بمكان حساس قلت من وين جاتك قال بفخذي اليسرى ومن العجلة شقينا الثوب ولياها ضاربته بفخذه اليسرى من الداخل وطالعة على طول من الخارج بس لله الحمد ماجت بالعظم بس باللحم والدم يصب صبيب تقل كباس هالحين طارت قلوبنا نبي نوقفه اهم شيء وبلشنا فيه وتدق في بالي مرة قالي شايبي الله يخليه لنا إن جتك صايبة وعيى ياقف الدم حط عليه ملة (الرماد الناعم جدا بغير وجيهكم )وركض يم النار واجيبي لي ملة بصحن ونحط على الصايبة لين وقف الدم سبحان الله بس ينقط بسيط المهم قلنا يالله على المستشفى وهنا جت البلشة عيا ابو فجر قال قسم بالله والله ماروح يابن الحلال أنت صويب وحالك صعبة قال والله ماروح حنا معنا سلاح ولاهو مصرح وسين وجيم هناك ونبلش قلنا يصير اللي يصير المهم سلامتك أصرينا عليه والله يهديه حرق هوعاد طلق من أم عياله قال علي الطلاق من أم فجر ماروح للمستشفى خطوة وحدة ولا للبيت بعد عاد هي صادفت أم عياله عند أهلها بالرياض والبيت خالي ولا يوم بلشنا من جد المهم خابرلي قيف (كهف)ضليل وزين شلنا خوينا وأغراضنا ورحنا يمه المهم أنا وابورينال كلن دق على حريمته وقال بنتأخر كم يوم وتعرفون الحريم عاد مايحتاج أقول هههههه (خواتي اللي يقرن لاتزعلن والله إني أمزح من باب الدعابه فقط وألا أنتن الخير والبركة ) وخليتهم هناك ورحت للبلد وجبت أنواع المطهرات والمنظفات والمسكنات كل شي طرى ببالي ينفع جبته طبعا ماجبت شيء ما أعرفه ورجعت لهم حول المغرب نظفنا جرح خوينا وكان بالفخذ مرتفع شوي للورك وهو ماسببله شوي حرج منا قمناعاد نهيبد عليه ونمزح لين راح الحياء منه نظفنا جرحه زين وصرنا نعتني فيه على طول كل دقيقة ولانخليه يحتاج شي وعاد أنا سويت نفسي تختوووووور وأتطبب فيه ساعه اعطيه مسكن وساعه قرنفل وهو الله يعينه على طبيبه الخاص خريج البران للطب لعب فيه لعب الوكاد تناوبنا عليه واحد بالليل وواحد بالنهار ولانخليه يحتاج شي نساعده بكل شي يخطر على البال واللي مايخطر بعد وجلسنا بهالقيف خمسة أيام لين صار يمشي عليها وييتوكأ على عصى شلنا عفشنا ورجعنا لديرتنا ودقينا على نسيبه وعلمناه السالفة محد درى طبعا ماحنا بسيطين أطباء .
الرجال علم إوخيته وجابها لزوجها وهي ماقصرت كملت الباقي وأبشركم بعدها جاب له بنت وسماها ديمه عاد قلت له أنا لازم تزوجني ديمة وألا تزوجها أبو رينال إن كانه مايخاف من المرة والحين أبشركم أبو فجر بأتم الصحة والعافيه تشافى تماما من غير مستشفى ولاشي ومن بعدها توبة ما أطلع إلا ولوازم السلامة موجودة للضرورة لسمح الله .
وهذي هي الحادثة اللي مرت علينا بالبر وبصراحة أصعب موقف مر علي بالبران طرحتها بين أيديكم لأخذ العضة والعبرة منها وعدم التهاون بالسلاح مهما كان وإذروني على القصور ياجماعة الخير
والسلام عليكم ورحمة الله وبركاته
أخيكم
سطام الحربي
رد مع اقتباس
المشاركة الأصلية كتبت بواسطة وضح النقى
