بسم الله الرحمن الرحيم
السلام عليكم ورحمة الله وبركاته
حيا الله اهل مكشات كل واحد بنفسه 
طالبكم يا جماعة الخير بفزعه 
عند الوالد موتر فورد F 250 - غمارتين - 2006 -
شاريه مستعمل وهو ماشي هالحين ثلاثين الف وحوله , طلع به درزن مشاكل
ودخلناه الوكالة وقالوا يبي يكلف حدود 12 الف 
قال الوالد : معصي
وطلعه اليوم من الوكاله
قلت : أبسأل أهل مكشات وأبشوف , بإذن الله اني أبلقى حل .
والمشاكل هي :
[1] الدبل اذا عشقناه بعض الاحيان ما يفصل , يعني تشبكه وتجي ترجعه مايرجع على ان لمبات الدبل طافية ! , تجي تحطه بــ D أو R يطلع صوت احتكاك , وهو ان الدبل لا هو اللي شبك ولا هو اللي فصل.
فما أدري وش المشكله بالضبط ؟
ياليت اللي يعرف حل المشكله أو يعرف محل متخصص بهالاشياء يقولي لاهنتم .
[2] الشكمان يطلع صوت !!
مهوب تنسيم متأكد , لأن توي مزين سيارتي عليه هدرز وبه تنسيم
أتوقع انه من الدبه الوسطيه يبيله تغيير أو تنظييف أو مدري
صراحة ما أدري وشي المشكلة بالضبط ؟!
بس قلت للوالد يروح لم السيف بالقصيم أو التويجري , ويخلي واحد منهم يفحصه .
والا وش رأيكم ؟
[3] البنزين ! وما أدراك مالبنزين 
ااايه <-- تراه طالعه من قلب
اذا جينا نعبي بنزين يقعد سنة مهوب على طول يعبي ؟
لاتقولون مليان هواء 
اعرف التانكي اذا صار مليان هواء , بس مهوب الى هالحد ؟
ما يعبي الا بصعوبه , ويقعد العامل سنة يعبي !
الوكالة <-- تعرفون ما عندهم تصليح بس , لازم شيل كله , كله خربان
يبي يكلف 4 الاف لحاله
يبي يغيرون كل شيء ؟
أنا قلت أبسأل الشباب بمكشات وخبري بهم اهل فزعه , ومهب مقصرين 
اللي يعرف يقول وله دعوه بظهر الغيب , ولاتنسون قول النبي صلى الله عليه وسلم " مَنْ فَرَّجَ عَنْ أَخِيهِ كُرْبَةً مِنْ كُرَبِ الدُّنْيَا فَرَّجَ اللَّهُ عَنْهُ كُرْبَةً مِنْ كُرَبِ يَوْمِ الْقِيَامَةِ ، وَاللَّهُ فِي عَوْنِ الْعَبْدِ مَا كَانَ الْعَبْدِ فِي عَوْنِ أَخِيهِ ، وَمَنْ سَتَرَ عَلَى أَخِيهِ فِي الدُّنْيَا سَتَرَ اللَّهُ عَلَيْهِ يَوْمَ الْقِيَامَةِ " .
والسلام عليكم ورحمة الله وبركاته
رد مع اقتباس
