التجارب المتعددة والحلول حول تركيب شاشة لـ VX_R من 2003 _ 2005
السلام عليكم ورحمة الله وبركاته ..
لا اطيل عليكم .,, كثر التساؤل وكثرت التجارب حول تركيب شاشة الفي اكس ار مديلات 2003 حتى 2005 واحببت ان ادلي بدلوي المتواضع ..
بداية عندي في اكس ار 2004 فل كامل وطقتني الشافية ابي اركب شاشة مماثلة لمديل 2007 ومن خلال التجارب هذا ما حصل :
التجربة الاولى /
ديكور خاص صيني موزون على الفي اكس ار والجي اكس ار ايضا ويركب عليه شاشة RM لكن فيه مشكلتين ..
انا شريت الديكور هذا والشاشة وركبتها وطلع فيها عيوب والان عارضها من سنة ونص .
العيب الاول / الشكل صاير دمار مع ان الديكور راكب صح لكن واضح انه مهب شد بلد وانا رجال احب الشكل يكون مضبوط .
العيب الثاني / محدودية انواع الشاشات الي تقدر تركبها على الديكور هذا ,, ولو ما كنت عارضه للبيع كان صورته لكم وتشوفونه لكن هو موجود في ( عنيزة ) بمحل الفين للاكتروينات اللي يبي يجربها ابرك ساعة ..
العيب الثالث / يروح عنك الكاسيت لان حتى لو تبي تركب مسجل 2007 ما تقدر تضبط الشاشة انها تتحكم بالتكييف .!
التجربة الثانية /
مثل ما كتبت لكم بأحد الردود بخصوص شاشة الوكالة والسلبيات من حيث صعوبة تجميعها بما يفوق 20 الف ريال وانا صراحة مات حيلي والا كان عالجتها وضبطتها لكن كنت متخيلها بسيطة وتفاجأت بتعقيدها ومن هالبغل حولنا والرد كان هنا :
http://www.mekshat.com/vb/showpost.p...6&postcount=19
وهذا الاقتباس :
الحل الثالث ( انا ما جربته بنفسي ولكن شفته راكب )اييييييييييه يا قصتي قصتة مع هالشاشة وانا اخوك ..
عندي في اكس ار 2004 فل كامل وحبيت اصير شاطر واركب الشاشة هذي وانقز للتشليح واخذ لي شاشة اخت الجديدة من التشليح بـ 1200 ريال لان قيمتها بالوكالة اكثر من 5000 ريال ..
ورحت للوكالة ودفعت عربون قيمة مسجل لان المسجل يختلف وصاير تحت .. وطلبته قال يجي بعد يومين قلت زين .
وانا اجيك واروح للاكترونيات قلت لك ركب الشاشة يا صديق وبسرعة هههههه .
قال وش قالولك شريط كاست هو ..
يحتاج امبي فاير ويحتاج ضفيرة اسلاك مربوطة بالكمبيوتر .. قلت هههه سهلة بكرة عندك ان شاء الله ..
وانا انقز للوكالة واقول للموضف بالله اطلب لي مع الطلبية زيادة ( امبي فير وضفيرة كاملة ( جيب 2007 شاشة ) هههههه والله ويقص لي الفاتورة قال ادفع عربون المبلغ اخذت الفاتورة وانا رايح اسددها .. واقراها إلا مكتوب عشرة آلاف ريال ( عربووووووووووون ) قلت ههههه شكل الرجال كاتب 100 وحط صفرين زيادة وارجع له قال يا حبيبي الجهاز قيمته 14000 ريال والضفاير 6500 ريال والمجموع فوق العشرين يا عسل .. ههه قلت اجل الله لا يهينك كنسل المسجل لابو من شراه منكم ..
وانا اروح للغرابي بالرياض على بالي يضبطون اللي ابغاه ولا حولك احد .. لا الحوشاني ولا احد ولا حصلت من يفيدني ورجعت ركبت المسجل مكانة . والله المستعان وهذي قصتي ..
ملاحظة .. الكهرابائي يقول ان حتى لو جبت الجهاز والضفيرة ممكن كمبوتر السيارة ما يقبل وروح يا عسل غير الكمبيوتر ليكون اضاقة شاشة بما يفوق 50 ألف ريال وشكرا ..
لا تتعب روحك
نصيحة / محل ( أحد ) في الرياض يأخذ ديكور شاشة الوكالة ويركب عليها شاشة كنود رائعة بقيمة 5000 ريال ولكنها غير مربوطة بكمبوتر السيارة وهي شاشة ملاحة عربية وايضا مسجل سيدي وصلى الله وبارك ..
تروح للتشليح وتشتري شاشة مثل حقتي هذي :
وتكون نفس الشاشة متعطلة او مكسورة لان ما تحتاج غير البدي ( الديكور ) وتروح لمحل أحد في الغرابي عنده شاشة ( كينود ) قيمتها تقريبا 5000 ريال هي اروع شاشة حتى انها تفوق شاشة الوكالة من حيث الخدمات والخيارات .. هذي الشاشة تركب على بدي شاشة الوكالة ويصبح المنظر جميل جدا لان المهندس يشغل لك انوار الازرار حقت البدي ..
العيوب :
1 / اللي يدقق راح يقول لك .. ياخي غريبة ازرار الشاشة فيها خيارات التكييف وانت تكييفك تحت وشلون تجي ؟
2/ فقدان شريط الكاست حيث ان الشاشة اخذت مكان الكاست .
3 / الشاشة غير مربوطة في الكمبيوتر يعني ما راح تعرف كم باقي في التناكي الثاني او كم استهلاكك للبنزين كما هو موجود في شاشة المعلومات وشاشة الملاحة في 2007 .
الحل المثالي والأخير /
في الكويت يقومون بتركيب الشاشة كاملة حتى السيدي _ عند الثلاجة _ والكمرة وضفيرة وشغل وكالة صح بقيمة ثمان الاف ريال سعودي .. وهذي الخطة الجاية ان شاء الله بس احتري السفرة تجي
واذا كان هذا الامر مناسب لاحدكم يخبرني اعطيه التفاصيل الكاملة عن هذه الطريقة .
..
بالتوفيق للجميع واللي عنده اضافة افرح واسعد واعتذر ع الاطالة والله يرعاكم ..
15 نوفمبر 2015 - 16:514 نوفمبر 2015 - 21:27
 |
رد مع اقتباس
المشاركة الأصلية كتبت بواسطة V I P
