السلام عليكم ورحمة الله وبركاته
حيا الله الاخوان الطيبين أهل مكشات
بصراحة حصل لي موقف وكان بينضحك علي فيه ولكن بفضل الله ثم بفضل واحد من الشباب ما انلعب علي.. السالفة وما فيها حصلت لي جيب ربع موديل 2005 نظيف وحليل وممشاه بنظري كان معقول واتفقت مع صاحبه على المقسوم وصاحبه يعرفه واحد من اخوياي بالعمل سبحان الله بلساني كلمت خويي بالعمل وقلت له اني بإذن الله اشتريت موتر فلان بالقيمة الفلانية خويي لحظتها سكت وقال تلقى الخير والله يطعمك خيره ويكفيك شره ومضى اليوم بالعمل بسلام ، بنفس اليوم بالمساء إتصل بي خويي وقال لي يا الدحمي انت قلت لي عن موتر فلان وانا والله عندي لك نصيحة خذها او اتركها والعاقل خصيم نفسه قلت له سم وعسى خير قال ترى الموتر ما يصلح لك وبس ، يا فلان هات العلم اللي عندك واحاول معه يمين يسار بالاخير قال لي ترى الرجال كان فاصل عداد الموتر ولمدة طويلة فممشاه غير اللي انت شفته بعيونك.......... وحصل كلام واجد وسالفه طويلة عريضة وبالاخير صاحب الموتر بلسانه بعد لت وعجن قال انه نعم فصل العداد ولا بين لي هالشيء من البداية فمباشرة قلت بين البايع والشاري يفتح الله .
.
.
وحصل لي اني جلست مع واحد بمحل بالرياض مجاله بالسيارات وخرابيط زبرقه وتعديل ومن هالسوالف ، ولما سألته عن فصل العداد قال يا كثرهم وبصراحة ذكر لي على وجه الخصوص فئات معينة ينفصل عدادها زي السلام عليكم .
.
.
أنا بس أبغى أفهم هذا الحين مو احتيال وغش ؟ ويننا عن قوله صلى الله عليه وسلم : (لا يؤمن أحدكم حتى يحب لأخيه ما يحب لنفسه).
غير كذا وش المغزى من فصل العداد يا جماعة ؟ للدرجة هذه وصلنا (طبعا إلا من رحم الله) ؟
.
.
نصيحتي لكم انتبهوا وترى الظاهر ما كل شيء قدامنا الحين على حقيقته والله يصلح الحال مشكلة الشر انه يعم واذا عم افسد والله يصلح الحال.
.
.
محبكم
جيت ابشتري ربع اقرأوا موقفي وقصتي......
رد مع اقتباس
