اولا اقول كل عام وانتم بخير وحبيت اشارك بموضوع ممكن يستفد منة من الاعضاء والزوار لهاذا المنتدى الغالي على قلوبنا وذالك من خلال تجربتي للسيارات والبالغة عدد 15سيارة خلال 23 سنة قيادة ونبداء بسم الله
1_اول سيارة كانت داتسون موديل 84خطوط بدون مكيف ومشتريها ب 10 الاف ريال من الوالد الله يرحمة بتاريخ شهر 11 / 1409 هـ واستعملتها الى تاريخ رمضان 1411هـ خبطت وانا جاي من الرياض كنت ادرس في معهد وسحبتها للمكانيكي وبعد وفاة الوالد الله يرحمة تركا لنا مبلغ وقدرة وبعت الداتسون على المكانيكي ب 6 الف لانها تحتاج مكينة وجلست لين شهر 11 اجمع فلوس منا ومنا والوالدة الله يرحمة فزعت معي واشتريت سيارة رقم 2وهي
2_ السيارة الثانية كانت 240 الـ 6 سرندل ومكيف وفتحة داخل عنابي ونظيفة مرةةةة ماشية 120 الف تقريباً اشتريتها من عنيزة بوسطة احد الاخوان كان ساكن ببريدة وانا ادرس بالرياض وسافرت عليها الى قطر مكة وجدة والدمام وسافر عليها اخوي كم مرة لمكة والسيارة نظيفة وبعد ماتخرجت من المعهد توظف وكان فيها مشكلة وهي لا دست بنزين بداية التقويمة تمتل وتكع بالاصح ودرت الورشات الي معروفة ومشهورة ونفس المشكلة وكنت مشنريها شهر 11/ 1411هـ وبعتها عام 1415 هـ شهر 12 بمبلغ 12500 ريال شرها من شريطي وقلت لة مشكلتها قال ماعليك بعني قلت الله يرزقك وبعدها اشتريت في عام 1415هـ شهر 12 سيارة رقم 3 وهي
3_ هايلوكس موديل 1990 مكيف غمارة واحدة بمبلغ23500 انا مشتريها من معارض بريدة لما جلست معي شهر وناظرت تحت السيارة كرهتا مطعجة والمعارض وخسارة 500 ريال بعتها ب23 وعام 1416 شهر 1 اشتريت السيارة رقم 4 وهي
4_ داتسون موديل 88 غمارتين 4 غيار نظيفة نظيفة ب 24 الف وسافرت عليه لمكة مع الوالدة والحمد لله السيارة ماشاء الله الا ان فيها عيب لا وهو 4 غيار قالولي ركب قير لاتركب قير 5 غيار قالت المعارض ونبيعها ب 25500 بمكسب 1500 ريال خلال 5 شهور والسيارة رقم 5 وهي
5_ هايلكس موديل 1989 غمارتين جي ال فيها رفرف يمين فقط اشتريتها من اخو ي من سكان الرياض ب 29 الف وسافرت على الطائرة وجبتها وبع 4 شهور اشترى نفسة اخوي سيارة هايلوكس 1991 نظيف مرةةةة ماطقة الشاكوش وقالي زدني الفين وخذها واخذتها وبعد ذالك سويت حادث فيها بعد تقريباً 7 شهور من الحادث بعتها للحاجة وكان الصدمة بالوجة وصلحتها تعديل ماهي قوية وبعتها ب 29500 ريال وشريت سيارة السادسة وهي
6_ بعد مابعن الهايلوكس 91 للحاجة محتاج فلوس بعد الزوج كرسيداءموديل 89 لون فضي اول سيارة تكون لونها غير الابيض مشتريها موقفة ب 19 الف وسافرت عليها لمكة وجدة والكويت واستعملتها قربت 8 شهور كان لي زميل بالرياض معة كابرس موديل 87 امريكي نظيف مرةةة قالت لة تبيع قال ابيع بكم نبيع المهم اتفقت انا وياة على 21 الف وانا في يوم خميس لمعارض النسيم وابيع الكرسيدا ب 23500 ريال وشريت السيارة رقم 7 وهي
7 _ بعد مابعت الكرسيدا ب 23500 في معارض النسيم واخذ تاكسي والى زميلي في الشفاء واخذ الكابرس موديل 1987 داخلي عنابي ونظيفة مرة المهم والقصيم على طول وبعد اسبوع قال احد الاخون ابي سيارة رحنا لمعارض بريدة وشرينا داتسون موديل 89 خمس غيار ونظيفة غمارة ب 17 الف وشف شريطي الكابرس وانا وياة وب 26 الف ابيعها ولس مانقلتها باسم الان هي باسم زميلي بالرياض واتصلت علية وبداء يتهرب من يرسلي وكالة عرف اني بعتها بمكسب وياليتي مابعتة كانت شخصية ونظيف ركبت لة وجة كلبليتر فقط وانظبط المهم شريت السيارة رقم 7 وهي
8_ كابرس موديل 88 من زميل يسير علينا بالاستراحة يجي احياناً خميس وجمعة من الرياض دقيت علية وشريت من السيارة ب 20 الف ولكن فيها جنب جية برد المهم سافرت انا واحد الشباب وجبناها وضبطتها وسافرت عليها الكويت انا واحد الزملاء يبي يشتري مثلة ولاشرينا وجلست معي حوالي 5 الى 9 شهور مدري بالضبط وبعد جيتي من الكويت قلنا نبي نشوف معارض حفر الباطن يحبون الكابرس ونبيعة ب 19 ويقولي زميلي وشلون نسافر للقصيم ومعنا العزبة واغراضنا قلت ساعة وباذن الله اشري سيارة وشريت بنفس اليوم السيارة رقم 9 وهي
9 _ال تيما 92 عنابي وسط علشان بس نسافر عليها القصيم وشرطنا على رعيها يكتب لنا وكالة ننقلها في القصيم وكتب لنا وكالة وكنا يوم جمعة بكرة دوام والساعة 10 بالقصيم وننقلها وبعد 6 شهور ماصلحت لي ابي صندوق وابعها بخسارة 17500 ريال ونا شريها ب 19 الف وبعدها شريت السيارة رقم 10
10ـ داتسون 99 خمس غيار شريتها من معارض بريدة ب 17 الف ويوم وصلت البيت عليها ولا مافيها ولا نقطة زيت حاط فيها رعيها ستوب ومكينة ب 2000 ريال وتظبط وخلال سنة اشتري هايلوكس موديل 92 شريتها ب 27 الف جي ال اكس مكيف داخل عنابي ابواب كهرباء وخلاص نركد عليها 3 سنوات وسافرت على الهلي لكل مكان فحمات وزيت وسيفون واخر شي وظبت المكينة ب 1500 ريال وبعتة على زميلي بالعمل يبيها للولد ب 22 الف وشريت السيارة رقم 11وهي
11 _ كامري ابيض مديل 99 جي ال اي ماشي 140 الف بمبلغ وقدرة 37 الف وسافرت عليها للطائف والباحة ومكة وجدة وجلست معي حوالي سنة ونص الى عام 1424 هـ وكنت مشتري ارض وبديت اعمر لي بيت انا وعيالي وبعت الكامري علشان افر شوي فلوس ب 33 الف وبعد ها شريت السيارة رقم 12 وهي
12 _ كرسيدا موديل 91 ب 15 الف وبرضة كانت متوسطة الظافة وبعد سنتين وظبت المكينة وكبت كفرات وسافرت عليها وتطعيس ومشاء الله و4 اسنوات ونبيعها ب 12 ونشتري السيارة رقم 13 وهي
13_ من التايوتا الياباني للامريكي وةةةةةةةةةةةةةةة فورد 96 امريكي ب 23 الف نبي نسافر ونبسط اعيال بعد العمار و3 سنوات عمار والفورد تمام يوم بالدمام ويوم بمكة ويوم بالرياض ويركب معي واحد نبي الرياض نزور مريض المهم مشينا الساعة 3 العصر والساعة 12 بالليل بالبيت وشكلة اول مرة يركب امريكي وبعد اسبوع يخلط الماء مع الزيت وتوظيب وتغيير ثلاجة ب 6 الاف ريال بعد 7 شهور من مشترها وكرهت السيارة وكل يوم بورشة مروحة وحرارة وووو والمعارض النسيم ب 17500 ريال خسارة حوالي 12 الف واشتري السيارة رقم 14
14_واروح للوكالة واشوف متسوبيشي عندهم عرض واخذ ماجنا 2004 اصفار ب 57 الف اقسط ك شهر 1000 ريال دفعت 18 الف دفعة اولى والحمد لله بعد سنة كبرو العيال يبون سيارة عائلية وابيع الماجنا ب 28 الف ما مشت ال 60 الف فقط والسيارة 15 ومازالت معي وهي
15 TOYOTAوبس جي اكس 2006 وتعبت من الكتابة وارجوان يكون الموضوع نال اعجابكم واستحسانكم الافادة وعدم التسرع في البيع والشراء وسيارتك سليمة من عيوب ليش تغيرها
والسلام عليكم ورحمة الله وبركاتة,,,,,,,,,,,,,,
15 نوفمبر 2015 - 16:514 نوفمبر 2015 - 21:27
 |
رد مع اقتباس
المشاركة الأصلية كتبت بواسطة وسيع البنايد
