يا اهل الباترول وش الحل مع القرقعه بالبيبان مدري بالطبلون

[غيرهم]

السلام عليكم ورحمة الله
فزعتكم يالربع
انا توني شاري باترول 92 سوبر سفاري
والله اني ماعرف فيه شي جيت اشغل المكيف الخلفي على الحار ماعرفت الي يعرف يقولي
المهم والزبدة
ان السياره ممتازة لكن اذا مشيت بشارع فيه مطبات تسمع القرقعه ولا تدري من وين
رحت وشلت كل المكاين حقات القزاز مع ديكوراتهم وحطيتهم على جنب
وشلت الغطاء حق الباب وربطت الاسلاك الداخليه بالباب والاسيام حقت يدة الباب حطيت تحتها
اسفنج لانها متحركه المهم ولبست الباب ورق شفاف ولزقته بباتكس علشان مايجيب علي هواء
من الباب وحولت الشبابكين هندل
اهز الباب هز جامد ماتسمع لاقرقعه ولا شي وبعد ذالك المفاجاة
امشي ويوم اوصل مطبات صغيره مره تسمع القرقعه كان الابواب متفككه وهي مافيها شي
ومرات واوسوس واقول القرقعه من الطبلون
ياليت الي عنده خبر عن هالموضوع يفيدني
او اغير له مساعدات ويايات ولا وش اسوى علشان ماياكل مطابات
بعدين الجيب هاجد عند الجيوب الثانيه ماهو مرتفع وشكل مساعداته وياياته رايحه فيها
الزبده ابي مشورتكم بخصوص السياره وش اسوي فيها بأنتظار اي رد منكم
ومتابع بالدقيقه والثانيه لين احصل حل
تصدقون فكرت اني اشيل البيبان وامشي فيه واتسمع فيه قرقعه ولالا هههه

[مكشات 1435]

مبارك لك ما شاريت وجعله مركوب السعادة والسلامة
أخوي
نيسان وجيب وسيارة قديمة شوي لا تستغرب من القرقعة ومعه الوقت تتعاود عليها لأن المرايات والتكايات والسلة والأريل وفي بعض السيارات سلسلة الاستبنة كلها تصدر اصوات ولا عليها خطر

[غيرهم]

تسلم يالغالي
اسعدني مرورك الله يعافيك

[خبايا انسان]

اخوي انا ناس دلوني على محلات تربيط في الصنعيه القديمة .. الموهيم يوم اروح لهم قالوا لي نربط لك الموتر بطنه وديكوراته وتجيب لنا بعض القطع ( كراسي بدي ) ,, الحاصل انهم يقولون اذا سمعت صوت طقطقه لا تدفع شي .. بس اختلفت معهم بالسعر يقولون ب 1200 ريال !! سلامات ؟

[غيرهم]

يابلاش تكفى دلني وينهم بجيهم من عرعر للرياض

[غيرهم]

انا بس دافع اربع ميه وعلى الفاضي
رحت شلت التماتيك حق القزاز وديكوراته افتكرت الازعاج منهم واصلا مايصلح التماتيك تقريبا ب150 او 200
مع تسكير الاماكن والتنجيد
رحت فكيت الابواب وسوو كبس بالمخرطه للفصالات حقات البيبان الي قدام ب200 مع شغل اليد
وخفت القرقعه بس ما راحت

[خبايا انسان]

^
حبه حبه ويتربط الموت ,, المكان الي اقولك اياه في الرياض بالصنعيه القديمه تخلي بنك الراجحي على يمينك وتدخل من بعده يمين على طول وتلقاهم يمينك ويسارك اسال اي ورشه عن ورش التربيط ويدلونك

[فهد 003]

والله يا اخوي فيه حاجه دايم تخرب في الباترول وانت مع المطب راح تكتشفها بعينك
الفصالات حقت الكبوت دايم تتعب في الباترول
وعشان تتأكد اذا ضربت مطب انظر لزاوية الكبوت اللي عند الطبلون هل هي تتحرك او ثابته
وثاني شي بقول لك حاجة انا سويتها واختفت الققعه
افتح الكبوت وجيب لك قطعه فلين او خشبه مربعه وحطها في وسط الكبوت من الخلف بين المساحات عشان تثبت الكبوت
وقبل تسويها تأكد وناظر الكبوت يتحرك مع المطب او لا
او تشوف الكبوت من الخلف بالوسط نازل عن مستوى الصاجه اللي فيها المساحات
وثالث شي فيه صاجات او كراسي داخل الباب دايم تقرقع لازم تثبتها بأسفنج
ورابع شي انظر داخل الرفر الامامي تحصل فيه صاجات طويله دايم تطيح او تكون مرتخيه شيلها خير شر
وبالتوفيق واعذرني على الاطاله ....

[وليد الشلاحي]

اسمع وانا اخوك شوف الميزانيات حقت البيبان ،، المربعه اللي الباب يقفل عليها عليها جلد او لا ؟؟
اذا ماعليها جلد لف عليها بشطرطون وقفل الباب وتاكد من البيبان كلها حتي الخلفي ،،
وتوكل ع الله اذا راح الصوت افضل لك تغيرها بواحد جديد من الوكاله وغير حق البيبان كلها حتي الباب الخلفي يغير له ،، وقيمة الواحد في الوكاله ٥٤ ريال ،، والله اعلم واعذرني ع القصور .

[غرايب الدار]

حبيب قلبي الف مبروك على السياره جعلك تذوق خيرها ولا تذوق شرها

الباترول عامة ابو القربعه ولكن المحافظة على السياره دليل استخدامك

لتسهيل اكثر اذا الصوت يصدر من الطلبون اعرف انه كراسي كبوت

انا كان عندي ساعات اقول البيبان وساعات اقول الباكم يتحرك وانواع السواليف وبالنهاية صارت الكراسي حقت الكبوت والحمد الله مرتاح راه كامله اللهم لك الحمد

[5200]

ياغريب الدار وش سويت بكراسي الكبوت انا الطبلون يرج بقوه

[لاتكب البيالة]

اسمع وانا اخوك شوف الميزانيات حقت البيبان ،، المربعه اللي الباب يقفل عليها عليها جلد او لا ؟؟
اذا ماعليها جلد لف عليها بشطرطون وقفل الباب وتاكد من البيبان كلها حتي الخلفي ،،
وتوكل ع الله اذا راح الصوت افضل لك تغيرها بواحد جديد من الوكاله وغير حق البيبان كلها حتي الباب الخلفي يغير له ،، وقيمة الواحد في الوكاله ٥٤ ريال ،، والله اعلم واعذرني ع القصور .

هذا ما طبقته على موتري واختفة الكثير من الاصوات