تغيير زيت القير

[وااضح]

السلام عليكم
أنا قريت موضوع عن تغير زيت القير وانه مهم قلت ابغيروه
لكن سيارتي ماشية 285 الف زيت الوكالة
اتوكل على الله واغيروه ولا اتركوه
طبعا قير عادي هايلوكس

[You Like Me]

وعليكم السلام ورحمه الله

اخوي مر على هالموضوع إن شاء الله بتستفيد

هل نـُغـيــّر زيت الترس التفآضـُلي {الدفرنش} والقير العآدي أو نـُصدق المتفيهقين ؟؟؟؟؟

[ابو فهد...]

ما يصلح تغيره على طول

[ابو فهد...]

يطق القير اذا غيرته على طول

[يزيد 999]

يا اخوي نصيحه لاتغيره لان القير العادي مايضره لو يمشي مليون القير التماتيك هو اللي يغير
ولو مااقتنعت بكلامي بكيفك لكن ترا تغيير زيت القير بيتعبك صدقني لاني مجرب اني اغير زيت القير بالباترول وكله بسبت اليمني الله لايوفقه ومن بعده صار يطلع صوت ونه بالقير والنحاسات قامت تخرب يعني لازم توظيب!!

[لاتكب البيالة]

القير العادي لا تقربه ونصيحه كل سنه شيك لا ينقص فقط

[وااضح]

الله يعافيكم
أنا رحت لوكالة عنيزة قالو غيروه عادي
لو اغيروه عندهم وصار شي يتحملون خطاهم ؟

[نفداوي]

انا لم اجرب ولاكن قريت في عدت مواضيع
(((تغير الزيت على عدة مراحل يعني تغير لتر بعد اسبوعين تغير لتر بعد اسبوعين تغير لترين لين تغير الزييت كله بعين تغيره كله مره وحده بعد شهر تقريباً )))) طبعاً الوقت تقريبي علشان يختلط الجديد والقديم

[بيق مان]

القير العادي والدفرنس يعاير ويزاد فقط .. لا تدخل نفسك في متاهات

[التعـ King ـديل]

زيت الدفرنس يزود مايغير .. وزيت القير العادي تشيك عليه اذا ناقص تزوده فقط

القير التماتيك كل 60 الف كيلو بالكثير يغير

[.أبوعبدالله.]

انا عندي باحيرو ٢٠٠٩ مكينه ٣٨٠٠

القير تماتيك طبعاً .. غيرت له مره وحده ....

[ زيت المكينه + وزيت الدفرنش الامامي والخلفي + وزيت القير والدبل ]

والحمدلله ما أستنكرت شي في الموتر .. إلى الآن .

لو أني قريت كلامكم من قبل كان ما سويتها

لكن .. الحمدلله ... سهالات ... والأمور طيبه ،،،

[كبسولة2]

القير العادي والدفرنسات لا تغير أبداً

يزاد لها النقص فقط فقط فقط

[ابومناحي]

الله ماشفناه بالعقل عرفناه
من يقول زيوت الدفرنسات والقير ماتغير مخطي
زيوت الدفرنسات تروس ويوجد احتكاك دائم وعلى سرعات عليه وكلها موجوده بكتيب السيارة وتغير كل 100 الف
وللمعلوميه زيت الفرامل يطلب تغييره وحتي زيت الدركسون
وعن نفسي كل 100 الف انفض كل الزيوت بالسيارة واغيرها دفرنسات+قير+فرامل+دركسون وحتي ماء الاديتر اغيره كامل والحمدلله ماشفنا شي غريب وبالعكس عندنا فكسار 98 وماعمره اشتكي من خراب
اخوي معه هايلكس 2010 ماشيه 188 الف مرتين يغير كل السوايل قير ودفرنس وماشيه زي الفل

[رجل المرور]

الي اعرفه ان زيت القير والدفرنس مايغير يزاد عند النقص ... اخوي معه هايلوكس 2011 وغير زيت الدفرنس عند يمني وجاب العيد فيه .. بعد فتره خربت الكرونيا .. وبدل الدفرنس بجديد ونفس المعانه بعد شهرين غير الدفرنس وباااع الموتر .. انصيحه لاتغير زيت القير فقط تعايره بعد ثمان شهور او اكثر ...

[كاشت بالبر]

انت المشكله انك مهمل تغيير زيت القير وماشي كثيييييييييير

والرايش ( برادة الحديد ) بتكون كثيره > بسبب تآكل القير من الداخل > بسبب عدم تغيير الزيت في وقته المناسب ( كل 60 أو 80 ألف كيلومتر)

اذا غيرته جميع يعني مره وحده , اتوقع واحتمال كبير بتواجه مشكله

مشاكل بالقير - حنه - ونه - ممكن يخبط الخ ...

والتآكل الزائد بسبب الاحتكاك الزائد >> يسبب فضاوه ( فراغ ) بين التروس

والاحتكاك الزائد بسبب الزيت السيء ( ماشي عليه كثير ) أو اهمال تغيير زيت القير

اذا بتغير زيت القير >> غيره بالتدريج
يعني تخلي ربع الزيت اللي بالقير يطلع وترجع صرة القير وتزوده زيت جديد

وتمشي عليه مثلا 5 الاف ( وتكرر الخطوه هذي )

الين يكون الزيت نظيف وبحاله ممتازه

لكن انا أبرئ ذمتي ما اضمنها لك ( يمكن يخبط قيرك لا سمح الله ) لأنك ماشي كثييييييييير جدا جدا على الزيت ( والقير اكيد متآكل بسبب الاحتكاك الزائد)

-----------

بالنسبه للأخوه اللي يقولون زيت القير العادي ما يغير ابد ابد

مع احترامي لهم

هذا أكبر خطأ ويقلل عمر القير

واللي ممكن يواجه مشاكل بعد التغيير بسبب :

1) ماشي كثييييير على الزيت . ( ما يغيره كل 60 ألف حسب توصية الشركة الصانعه للسياره بالكتيب المرفق مع السياره )

2) عدم استخدام الزيت المناسب للسياره .

3) يحط شحم مع الزيت أو الخ ...

4) الخ...


انا انصح بتغيير زيت القير العادي و الأوتوماتيكي بالوكاله ( كل 60 ألف )
لأن الوكاله عندها الزيت المناسب لسيارتك

خلال تغيير الزيت ينظفون لك صرة القير ( يكون فيها مغناطيس ) وظيفته سحب برادة الحديد

القير فيه صرتين
وحده لتعبئة الزيت مافيها مغناطيس
وحده لتفريغ الزيت فيها مغناطيس











وكل ما مشيت اكثر على القير بدون تغيير زيت القير >> يزيد التآكل وتزيد برادة الحديد

الزيوت ( زيت قير - زيت دفرنس - زيت دركسون - ماء راديتر ) اللي بالوكاله مناسبه لسيارتك

وأقرأ الكتيب المرفق مع السياره للتأكد