رأيكم في فورتشنز 4 سلندر

[ابو حظين]

السلام عليكم ورحمة الله و بركاته


يا اخوان بغيت استشيركم في فورتشنز 4 سلندر... السياره ماراح استخدمها الا في خطوط مزفلته ما بين الشرقيه ومكه والمدينه ... او في الطرق الجبلية ... يعني ماراح اكده في نفود ولا غيره .. والسرعه مالي فيها ...

بتنفع معي ذا السياره والا تشيرون علي بغيرها .. انا نويت عليها لأن سعرها مناسب للميزانيه و كبيره تشيلك وتشيل ربعك ...

و اسمع منكم الله يجزاكم بالخير

[مركز الثقل]

غالية وكنك راكب حمار وانت بكرامة ومكينتها ضعيفة

[ابو حظين]

غالية وكنك راكب حمار وانت بكرامة ومكينتها ضعيفة

ههههههههههه كرمت و لاهنت

نسمع من باقي الشباب

[برهوش]

لا تقربه من واقع تجربه

[ابو حظين]

لا تقربه من واقع تجربه

الله يجزاك خير


وش عيوبه اللي شفتها دامك مجرب ... قبل لا انتكب فيه

[برهوش]

والله كان معي 2006 اربعة سلندر المكينة ضعيفة وانت في الخط والمكيف شغال وناطحك الهواء مايتعدى 140 لو تموت
صفير هواء من عند البيبان بعد 120
لو تبي تتجاوز تريله في الطرق المزدوجة ما يسحب ما يعطيك عمرة بالعربي ما تضمنه
زد فلوسك وخذ لك 6 سلندر

[عبدالرحمن1411]

قبل اربع سنوات كان عندنا واحد سته سلندر عزم ماشاء الله لكن يعيبة الاصوات في الخط كانك منسم للشبابيك
لكن ما ادري اذا حلو المشكلة الان ام لا
ابحث عن العيوب والمميزات وان شاء الله الشباب يفيدونك

[قناص 28 عفيف]

الله يرزقك بالموتر الي ترتاح له
بس نصيحتي لكل شخص يفكر بجيب ان لايكون الموتر 4 سلندر ثقيل جدا
وعند البيع مايجيب لك قيمه

[eameh]

انا اضيف على مﻻحظات اﻻخوان اني بعد تجربه ثﻻثه كلها اربعه سرندل وكنت ناوي اشتري بس بعد مﻻحظتي على فرامله .... مرره ماتمسك خطيره ويزحف الموتر حتى المطبات الصناعيه بعد الستين ما تقدر توقف عندها فصرفت النظر بعدها عنه.... مع العلم اني اعتقد ان تويوتا انتبهت لموضوع الفرامل وعالجتها بانها نزلت في موديل 2012 بجميع الفئات نظام اي بي اس ﻻكن انا ماجربت اﻻ من 2011 ونازل فاحتياطا جرب الفرامل قبل ﻻ تشتري وﻻ باقي المﻻحظات كنت عارفها وراضي بها

[Salamah.y]

ياخي دام استخدآمك خطوط فقط اشتر رآحتك
خذ لك موتر أمريكي , أنشط و أريح من الفورتشنر

كل التوفيق @~

[صياد الجبل]

سلامات والله بالنسبه لي مايعجبني تحس انك راكب باص

دام استخدمك خطوط شوف لك سياره

سيدان

مثل

كامري

التيما

سوناتا

النترا

سياراة مريحه جدا في السفر ومكيفها ممتاز جدا وبارد

وراسيه بالخطوط وسرعتها ممتازه

وتشيل معك 5 من الشباب

[عـبـود 911]

نصيحة لك أخوي ابعد عنه خصوصا الـ 4 سلندر ..
بقيمته فيه بدائل كثير ..مثلا عندك اكسبلورر عملي وقطع غياره رخيصة ..

وأكيد بتلقى سيارة تناسبك أكثر من الفورتشنر اذا ما اعجبك الااكسبلورر

[خبايا انسان]

اظم صوتي للاخوان انه ماينفع ابدن

[fahad marzouq]

والله مع اخوووي ويصيح منه ... انحش ما هنا عززززززم

[sameer_1798]

بحكم تجربتي لهايلكس دفرنسين اربع سلندر في الضلعان وبالحجاز بصفة عامة ممتاز ولافيه اي عيب بالعكس المكينة هادية وماتصرف بنزين لكن في الرملة ضعيف