تجربة فورد اكسبلور لمدة يومين

[SAS2]

بسم الله الرحمن الرحيم


البدايه اتصل علي اخوي قال الاديتر يهرب موية وترتفع حرارتة قلت بسيطة خلة علي

خذت الموتر واتفقت مع ورشة تفك الاديتر وتركبة ب 100 ريال المهم فك الفلبيني الاديتر

وتفاجأت بكبر الاديتر ماشالله وتبهذل الفلبيني لين فكة شفت اطراف الاديتر والقاها معدومة

من الصداء قال فني الاديترات يمكن نحتاج اديتر جديد لان فية شقوق ما تلحم

قلت بكم قال فوق 2000 ريال الجديد قلت دبرها قال اجل ابسكر ريشتين من كل طرف

وما ياثر بسبب حجم الاديتر قلت طيب صلح الاديتر ب 250 وركبة الفلبيني وعبيناه موية

خضرا موتر كرفت وشغلت الموتر وتمااااام التمام قلت شيك على فلتر الهواء لقاه معدوم

من الغبار غيرتة ب70 ريال وشغلت الموتر ومسكت فية خط 50 كيلو والحرارة ممتااااازة

معلومات السيارة اكسبلور 2007 ماشي 150 الف التهريب بعد حادث

الزبدة من التجربة الموتر اعجبني انه يتحمل الكرف وقلة الصيانة مريح

موتري لاندكروزر 2009 جكسار بس الفورد تفوق بالراحة والسعر والاعتمادية ورخص القطع

مثلا الفورد فلتر القير مع الزيت بحدود 150 ريال

لاندكروزر فلتر القير مع الزيت بحدود 550 ريال

النتيجة الاكسبلور تفوق على الاندكروزر الي معي

ملاحضة (( ادري اكثركم يعرف هالمعلومات لاكن كتبتها للي ناوي يشتري وما عندة خبرة ))

وسلامتكم

[نزف الابداع]

نعم صحيح الفورد أفضل من التويتا
وأشهد ان الإكسبديشن أفضل من التيوتا
واليوكن بالرغم من إن سيارتي يوكن 2009

[مخ سعودي]

الالكسبلور من فئه غير اللاندكرورز ويحسب له خفة وزنه ورحابة مراتب الامريكي ككل
اما بالنسبة للخروج في رحلات للبر والتوغل فيه فما اعتقد انه راح ينفع بسبب الخلوص الارضي واشكرك على عدم حياديتك وتعصبك والله يعطيك خيرهم ويصرف عنك شرهم

[ال عيسى]

لكل شخص وجهة نظر .. لكن أقول يا زين اللاندكروزر سيارة يعتمد عليها بعد الله إن بغيت خدمة وإن بغيت شكل والخرابات قليلة وتقدر تقول نادرة

[SAS2]

الالكسبلور من فئه غير اللاندكرورز ويحسب له خفة وزنه ورحابة مراتب الامريكي ككل
اما بالنسبة للخروج في رحلات للبر والتوغل فيه فما اعتقد انه راح ينفع بسبب الخلوص الارضي واشكرك على عدم حياديتك وتعصبك والله يعطيك خيرهم ويصرف عنك شرهم

صدقت يالغالي هذي فئه وهذي فئه والمقارنة في بعض الاشياء وليست شاملة

والف شكر على مرورك وتعليقك

[SAS2]

نعم صحيح الفورد أفضل من التويتا
وأشهد ان الإكسبديشن أفضل من التيوتا
واليوكن بالرغم من إن سيارتي يوكن ?2009

مشكور يالغالي على تعليقك وشرفني مرورك

[SAS2]

لكل شخص وجهة نظر .. لكن أقول يا زين اللاندكروزر سيارة يعتمد عليها بعد الله إن بغيت خدمة وإن بغيت شكل والخرابات قليلة وتقدر تقول نادرة

كل شي بيدالله والمحافظه لها دور والي شفته ان الاكسبلور ينافس الاند بالاعتمادية

ووجهه نظرك احترمها

[شاووش]

الله يعطيك العافيه ..

[قناص الأشهب]

السيارتين لاتقارن ببعض

[ابوعمر1397]

اتفق معك من ناحية قطع الغيار

لكن تحمل الكرف والراحة فاللاند يفرق كثير

ان معي اكسبلورر 2010 ضيق وغير مريح

[SAS2]

الله يعطيك العافيه ..

الله يعافيك

[SAS2]

اتفق معك من ناحية قطع الغيار

لكن تحمل الكرف والراحة فاللاند يفرق كثير

ان معي اكسبلورر 2010 ضيق وغير مريح

حياك الله ابو عمر واي اللاند تقصد مريح ال جي اكس و ال جي اكس ار (( غير مريحة ))

وعن تجربه مشوار 300 كيلو ال جي اكس ار يكسر الضهر اما الاكسبلور (( مريح ))

والمتعب للسواق في الاكسبلور فقط ديكور الباب (( يضايق الركبة ))

اما انه ما يتحمل كرف فالموتر ماخذينة (( مستعمل )) ويعامل معاملة ددتسن وما خالف مع الي قبلنا ولا معنا

ونورت الموضوع ابو عمر

[أبو إياس]

مشكلته الوحيدة هي في قيره ,,

معي الموتر محافظ عليه ومع ذلك تفاجأت مره وأنا ماشي بدأ يقطع فجأة وما يعشق بسرعة وولعت عندي علامة مفك ولما وديته للفني قال لي حساس القير عندك فيه مشكلة ولا زم يتغير غبرته بحدود 1500 مع التركيب الموتر ضبط معي ومع ذلك أحس أحيانا ترجع فيه النتعة مع التعشيقة الأولى والثانية ,,

ومشكلة القير متفشية جدا بين ملاك السيارة

[مسير عليكم]

شباب بخصو الفورد

ليش الاكسبدشن مو راسي مع الوالد اكسبدشن 2011 استاندر مافي رساوه ابد وبالخط يهزهز مو متماسك ويخوف وطارته ماتحسها ماليه يدك
وما اضلمه الموتر مريح بس مشكلته الثباااات معدوووووم
هذي لها حل

[ابواحمد22]

شباب بخصو الفورد

ليش الاكسبدشن مو راسي مع الوالد اكسبدشن 2011 استاندر مافي رساوه ابد وبالخط يهزهز مو متماسك ويخوف وطارته ماتحسها ماليه يدك
وما اضلمه الموتر مريح بس مشكلته الثباااات معدوووووم
هذي لها حل

غريبة معي اكسبديشن 2003ايدي بور مريح وثابت حتى اول ماشريته كنت اجربة في المناورة ما شاء الله راااااااااائع