الموتر : غرز ، علق ، نشب ، دقر / شلحل - دعوة للنقاش

[مدور طريق]

بالبداية حبيت اعاديكم بمناسبة قرب عيد الاضحى المبارك اعاده الله على الجميع بالخير

بخش بالموضوع دوغري
نبغى حلول لتجنب التغريزه والتعليقات الاخرى ( دعوة للنقاش)

وكذلك طرق السحب الصحيحه لتفادي الاحراج وخاصة اذا الواحد مع اهله




واخطر انواع التعليقات الي بالطين وكيفية الخروج منها بسلام



بعض الشباب يسحب بالريوس وبعضهم لا ... وش الافضل للموتر ؟



اتمنى لكم تطعيس آمن .. مع تحياتي مكشات دوت كوم .

[مدور طريق]

http://www.mekshat.com/vb/showthread.php?t=112063

لقيت مشاركة قديمة بس قيمة لاعضاء منتدى مكشات.. جزاهم الله خير كفوو ووفو

[الشقردي 205]

استفدنا ..


يعطيك العافيه ..

[مدور طريق]

العفوا اخوي مسوينا شي

وبإنتظار باقي المشاركات للنقاش والاضافة على هذا الموضوع المهم.

[SAS2]

والله يابن الحلال دام حولي احد وغرزت بسيطة بلاقي احد يطلعني واذا ما حولي احد احاول اكون حريص شوي

واشد على الموتر يعني ما خلي عزمة يبرد

اما الطين ما معه مزح ابد متى ما طحت فيه فهو الي يوجة الموتر غصبا عنك

والحل تمشي مع طريق عزاز دايسته السيارات لين صار مثل الصبة وغير كذا الله يخلف

المهم الله يرزقنا المطر حتى لو نغرز ههههه

ومشكور على فتح الموضوع

[ابومشعل3]

بعض الناس هداهم اللة يشخص ومعةعيالة تقول عارف وين يمشي معة 00اتبع الطرق السهلة ولاتقول اني سواق 0تحياتي

[الهاجري 4800]

انا صار لي موقف اول مرة يصير لي انا راعي بر كل يومين وانا طالع للبر المهم وانا امشي الموتر انبلع الارض كانها طحين انا استغربت ما تقدر تسميها تعليقه ولا تقدر تقول تغريزة المهم حاولت اطلع الموتر وقال مافي امل واتصل على قهيدان راعي الجمس ولد خالي والله انه عجز يسحبني والمنطقه كلها ((جن)) معروفة تهقون الجن مسك الموتر؟؟


بعد خمس ساعات طلعنا وطلعت ارواحنا من التحفير


انتبهو يا اخوان لحد يسرع في البر ويطيح مثلي انا الحمد لله ما كنت مسرع

[س.س.التميمي]

الله يعطيك العافيه علي هالموضوع اللي بنلقا الفائده من مناقشات الشباب

[deer]

السلام عليكم

زمان من عشرين سنه تقريبا او اكثر طلعنا مع مجموعه من الشباب لشعيب المساجدي وكان ممطور ومليان مطاين ... وطب واحد من الشباب بسيارته بالطين لحد ماتعلقت رغم نصيحتنا له وتحذيرنا ورد علينا انا قلت لواحد فيكم يسحبني بسيارته ولا يساعدني .. المهم بعد ما تعلق رفع المرتبة اللي ورا وطلع وتد او "طنب" طوله يمكن متر وحديده كبير ما ادري كم ملي لكنه ثقيل .. وطلع مطرقه يالله يشيلها من كبرها وراح برا الطين ودق الوتد بالارض .. طبعا الحركه استعراض قدامنا .. وبعدها مد سلك الونش من سيارته وشبكه بالوتد وسحب السياره بكل سهوله علما ان الونش اللي معه كبيييييير .. لكن المضحك بالموضوع انه ما قدر يطلع الوتد من الارض ومشينا ونسي مطرقته بالمكان اللي طب فيه ... لكنها كانت طريقه ممكن تنقذ ناس بسياره وحده لو مكانهم مقطوع

وسلامتكم

[SAS2]

سمعت من الوالد انه ركب مع واحد يوصله وغرزوا على جمس حوض يقول ابوي قعدت اهاوشه قال ولا كلمة

وهو يبدا الموتر يهز لين طلع على وجه الارض وسالت ابوي وش سوى الرجال عشان يطلع الموتر قال والله

مدري هو كان مهرب بس وش الطريقه !!!!!