باترول 97 بخاخ يقطع ويرمي ( يفقع )

[القصير111]

السلام عليكم ورحمة الله وبركاته
ياشباب كما في العنوان بارك الله فيكم

عندي سفاري 97 بخاخ خليجي
يتفتف وإذا دعست عليه يكتم ويفقع داخل القزوز
وأحيان يبطل يفقع لكن السيارة مكتومة وعزمها ضعيف
وأكثر سرعة تمشيها تقريبآ حدود 100 متزيد عنها أبد

تم تغيير بواجي وأسلاك بواجي
حساس الهواء تم اختباره 100%

اللي عنده الحل لايبخل علينا
أنا في تبوك
لو أحد يعرف ورشة هنا

شكرآ للجميع مقدمآ
ﻷني واثق ان مافي أحد راح يقصر

[aso0oL]

اخوي الرمي غالبا يصير م الكهرب

المشكله يمكن م الكهرب عندك تاكد من الكويل يمكن يعطي كهرب متاخر او متقدم

وافحص البخاخات يمكن فيها واحد مسدود او شي

بالتوفيق

[القصير111]

آخر ماتوصلنا إليه يقولون يمكن الكمبيوتر

وأنا اﻵن عند الميكانيكي يوزن البلوف

وأحد الميكانيكيه يقول الحل انك تشيل البخاخ وتجيب كربريتر ونغيره كربريتر أحسن من مشاكل البخاخ

وكل واحد يفتي من جهة

[sgl2002]

المسألة ماهي ان شاء الله بهذا التعقيد اللي يخليك تحول الموتر لكلبريتر


والباترول ال4200 وال 4500 بخاخ ماهو بذاك التعقيد


كلها طمبة بنزين وحساس هواء وكمبيوتر يوزع ع البخاخات


اول شي ابيك تشيك على خرطوش الهواء اللي بين ثلاجة المكينة وحساس الهواء واللي يجي على شكل ربل - لان اذا فيه قطع بسيط يسوي نفس الطريقة

بعدها شغل الموتر وشف اسلاك البواجي واحد واحد هل هي تطلع شرار والا لا وياليت تكون وقت المغرب عشان تشوف يمكن بعض البواجي مايطلع شرار


بعدها افحص طرمبة البنزين هل هي تضخ البنزين صح والا ضعيفه

اخر شي افحص البخاخات كمبيوتر شف وين اللي مايوصل بنزين

وطبعا وزن البلوف له علاقه بعد بالتفتفه

[القصير111]

أبشركم غيرنا طرمبة البنزين وحطينا حقت في إكس آر
والحمد لله بطلت السيارة ترمي وصفيت بمقدار 80% تقريبآ

لكن باقي تفتفة بسيطة جدآ وأكثر ما ألاحظها عند تقويم السيارة

ولكم جزيل الشكر

[روق الرياض]

هلابك اخوي
انا مثلك قبل بس انا مشكلتي هي التفتفه وضعف العزم ماخليت شي الاركبته ولافيه كنبيوتر الافحصت عنده كلهم يقولون مايطلع شي في الفحص وبعدها سويت اختبار للحساس الهواء قالو ١٠٠/ ١٠٠ وش الحل ياولد قلت انا غيرت كل شي مابقي الاحساس الهواء غيره وتكل على الله غيرته بعدها انطلق الموتر وصفاء
بس انت لاتغيره فكه ونضفه ببخاخ حق الاكترونيات لانه خفيف ولايحتوي على زيت خذها النصيحه من اخوك

[صدى الصمان]

تأكد من الدينمو افحصه عند اي ورشة

[القصير111]

الله يجزاكم خير يالربع

أبشركم لقينا فيش واحد من البخاخات مفصول وشبكته والحمدلله اﻷمور تمام

[صقرالحروب]

ياليت توضح لنا كيف ولفت طرمبه الفكس ار على الجيب لانه ماحد راضي يولفها لي

[sgl2002]

نصيحة مجرب لاتفوتكم طرمبة الفتك

لها سنه بموتري من اروع ماتكون

[القصير111]

والله مافيها توليف أبدآ

ﻷنها تركب محل اﻷولى على نفس العوامة
اللهم انه قص السلك ولحمه محل سلك القديمة فقط

لكن انت أذكر موقعك لعل الشباب يفيدونك بكهربائي يكون يسويها

[صقرالحروب]

والله مافيها توليف أبدآ

ﻷنها تركب محل اﻷولى على نفس العوامة
اللهم انه قص السلك ولحمه محل سلك القديمة فقط

لكن انت أذكر موقعك لعل الشباب يفيدونك بكهربائي يكون يسويها

فكس ار موديل كم الله لايهينك
والافياش وين احصلها

[صقرالحروب]

نصيحة مجرب لاتفوتكم طرمبة الفتك

لها سنه بموتري من اروع ماتكون

حاولت اركب قبل كذا طرمبه فتك بس طلعت الافياش تختلف ويبغالها توليف في العوامه
يالليت تذكر موديل الفتك جيب انا باترول بخاخ 96

[sgl2002]

حاولت اركب قبل كذا طرمبه فتك بس طلعت الافياش تختلف ويبغالها توليف في العوامه
يالليت تذكر موديل الفتك جيب انا باترول بخاخ 96

موتري 98


والفيش كان يختلف شريت فيش معه سلك جاهز وشبكناه فيها ولحمناه بالكاويه

شغله بسيطه