كفاءة وخدمة الدبل الكهربائي ( ابو دينمو )

[محمد 2002]

السلام عليكم ورحمة الله وبركاته
استفسار للأخوان ( المجربين ) للدبل النوع القديم ابو عصا ودفرنس أمامي كامل موديلات 97 وتحت
والدبل الجديد ابو زر ودينمو وفليورات للسيارات الحديثة
لأني مجرب السيارات القديمة من نيسان وتويوتا 97 وتحت وهي سيارات جبارة ودبلاتها قوية جدا ولا ارتحت لفكرة ان الدبل يشتغل بكهرب ودينمو لو يفصل سلك والا فيوز قعد بها راعي الموتر
وحبيت أعرف ايش الفرق وما هي آلية عمل الدبل الجديد

[مزدهر]

اللي عندي دبل التويوتا الكهرب فيه مشاكل تدخل موقع تويوتا العربية او تبحث بقوقل
نيسان ما اعرف احد اشتكى منه وقليل خرابه
الباترول لازال يجي عصى للدبل خاصة الفتك

[محمد 2002]

ياخوك بغض النظر عن الشركات
ايش الفرق بين الدبلين

[مزدهر]

ما فيه فرق هذا يدوي وهذا كهربائي
الكهربائي ما يحتاج تلتله

[ابن عكاش]

تبي موتر بر صحيح يصبر اترك الكهرب الا اذا استخدامك خفيف وانت تحافظ على الموتر

[كم كيلو باقي]

كان معي باجيرو دبل على شكل عصا لكنه يشتغل بالكهرب ( يختلف عن العصا العادية )
قوي وزين وماخرب معي الحمدلله مشكلته اذا شبكته ياخذه له شوي لين يشبك حول دقيقتين
واذا بتفصله مثل
لازم تراعيه شوي يعني توقف وقت تشغيله وتكون الكفرات عدال وماتكسر لاخر شي وانت شابكه لانه يخرب الموتر يبي لك تسايسه شوي اذا بتلف
وموتر الوالد لاندكروزر 2009 اشبكه اذا اخذته بين فترة وفترة بحيث مايجيم الدبل وسبق انه علق معي مرتين مايطفي
هذا اللي اعرفه عن الدبل الجديد والقديم اكيد انك ابخص مني فيه ياغالي

[محمد 2002]

وفقكم الله جميعا
ولا زلنا ننتظر المزيد من تجارب الأخوان ومعرفتهم بارك الله في الجميع

[هارون97]

الجديد المفخرة لابد انك تشبك الدبل كل فترة بسيطة عشان مايخرب اقل شي كل 5000كيلو تشبكه معي انا عانيت من خرابة يفضي تعشق في واحد وتحرك مايتحرك كانه فاضي بس تراي جلس زمن ماشفلتة واشوف بعض الشباب الي يشغلونه على طول مايشتكون ابد

[شنطة عده]

الدبل الحديث هو نفس عمل الدبل القديم
الفرق ان الدبل الحديث يتم تحريكه بواسطة محرك كهربائي والقديم بشكل يدوي
في الموديلات الي من 98 الى 2007 يعمل بشكل ممتاز
اما الاخيرات يشتكون منها انها تشبك ولا عاد تفصل او تفصل ويبقى لمبة الدبل شغاله

ومن المهم جدا ان تشبك الدبل الخفيف والثقيل في الجيب كل فتره على الاقل في الشهر مره

وتمشى عليه مسافه
الخفيف اشبكه وامشي عليه من الخمسه كيلو الى العشره حتى لو من الاشاره الى الاشاره الي بعدها وهذي طريقتي الشخصيه
الثقيل وانت تتمشى في البر او مكان فاضي اشبكه وامشي مسافه من الكيلو الى الثلاثه

[بدوي جنوبي]

[GMC79]

يخرب بينه ما اخيسه عمري ما شفته شغال مع احد مضبوط لازم يخنبق

[سقم المعادي 1]

المشكله مهيب في الكهرب لأن اللاند من 98 إلى 2007 اغلبها دبل خفيف كهرب والثقيل عصا بس ماعمري سمعت احد يشتكي منه لكن بالجديد اكثر ماسمعت عنه عطل الدبل يعني في الاول والاخير على حسب جوده الصناعه
عندك مثلاً الشروكي من 97 الى 2001 دبل عصا و اكثر مايخرب الدبل فيه تفرط الشوكه حقت العصا لازم تنزل تحت الموتر تصلحها وتخلي معك جلد احتياط من تجرربه

[أطلال نجد]

( ما ارتحت للدبل الكهرب )

ذكرتني ببعض كبار السن قديماً عندما كانوا يقولونها أول ما نزل الددسن و الهايلكس قزاز كهرب

[محمد 2002]

ههههه
نعم يا أطلال نجد وفقك الله الصراحة ما ارتحت لكون الدبل يشتغل بدينمو وحبيت أعرف آليته وطريقة عمله و تجربة ملاك السيارات الي فيها الدبل كهربائي خصوصا لو كانوا جربوا من قبل الدبل العادي القديم

[بدوي جنوبي]

ابشر بعدين اعطيك مقاطع توضح كيف يعمل .

أرسلت من GT-I9082 بإستخدام تاباتلك