وش ازين ممشى في النفود كفرات البالون او الشاهين؟

[مفضخ الشري]

السلام عليكم




مثل ماهو موضح في العنوان بغير كفرات ابيها للنفود اكثر
و الموتر اللي معي عزمه متواضع gxr تماتيك ابي شيء يساعده في الممشى
كفرات البلد الدنلوب 275 ماجازت لي يالله يمشي الموتر وانا منزل القير لـ 1 و منسم له 15 ادنى مطلاع يبرد العزم

و ابي اغير له و محتار بين البالون او الشاهين

و وش المقاس اللي يصلح سواءاً للبالون او الشاهين

[ابو ساره العنقري]

دام العزم متواضع البالون ثقيل لكنه بالجلد يبرد الخاطر

مركبه على باترول الهوا 20 وامشي خطوط بالنفود بدون دبل

لكن عيفني به الرجه

الشاهين ماجربته لكن يفيدونك الاخوان

[مفضخ الشري]

دام العزم متواضع البالون ثقيل لكنه بالجلد يبرد الخاطر

مركبه على باترول الهوا 20 وامشي خطوط بالنفود بدون دبل

لكن عيفني به الرجه

الشاهين ماجربته لكن يفيدونك الاخوان

الله يعطيك العافيه يابوسارة
من ناحيه الرجه ماعندي مشكله معها لانه بيصير طقم ثانوي مع وجود طقم للديره
من تجربتك له تقول ثقيل اجل .. اتوقع ان الشاهين اجل اخف منه لكن ننتظر رأي مجربين الشاهين في النفود
انا سبق و جربت الشاهين لكن ماجربت البالون هل هي افضل من الشاهين او لا

[الفين6]

مافيه افظل من كفرات البالون للنفود
حط هواهن 20 وادعلي
اذا الجنط16ركب بالون مقاس825 واذا مقاس الجنط17 مافيه الا 900

[ابو ساره العنقري]

حياك يابعدي

ترا اقولك ثقيل لان موتري باترول 4500 ونت خابر هاالمكينه ردي عزمها ماهي زي الفتك

الموتر انا مخليه للبر لان معي موتر ثاني
عن نفسي والله اني اعاف المطاليع البعيده بسبب رجته وعدم اتزانه بالطريق ولا صار عليك هوا لعب بموترك لعب بالخط

لكن لاطبيت الجلد والحجره والله انك تنسى عناه يطربك بقوه وتقوم تدور الوعر ههههههه

عموما النوع الي مركبه اسمه بريسا مادري عن الانواع الثانيه

ومتابع لموضوعك

[ذيب سايه]

عفوا ع المداخله ،،


معقوله البالون ممتاز فالحجار والشعبان ، احسه ينشق بسرعه ولين ولايصلح الا للبر ؟؟

[راعي الرود]

وعليكم السلام
اذا موترك من الشكل القديم انا معي نفسه وتماتيك بعد و مركب طقم دانلوب نقشه شاهين مقاس 245/85/16 على جنط هلل 16
هذي صورة للطقم راكب:


الكفرات فرقت معي بالنفود فرق ملحوظ لكن لاتحسب انه بيطلع ستروكر الموتر ترا الجكسار بشكل عام لا تماتيك ولا عادي عزمه الله بالخير لكنه يوديك وين ماتبي بالنفود اهم شيء المسايس و اختيار الدرب الزين
كفرات الدانلوب ثقيله بالنفود على السته سلندر وفيها عيب اذا مشيت مع جواد السيارات في النفود يبتل يلعب بك الموتر و تسحبك الجاده يمين يسار بينخض مخك منها عكس الشاهين يشق دربه لكنها تعجبك في الشعبان و الحجره مايردها شيء وعمرها طووووووووووويل تجلس 4 سنين زي الحلاوه اعني الدانلوب البلد
الشاهين يبي لك تحاسب من الشوك و القشع حاول ما تاطاهن جنبه ضعيف نوعاً ما مع العلم اني طبيت به اماكن وعره و لا خالف معي لكن معروف ان جنب الشاهين ضعيف لذلك اذا دخلت مكان وعر يفضل تحط به 40 هواء عشان جنبه ينتهض ولا يصير فارش و يلقط الشوك

بالنسبه للبالون ماركبته عشان افيدك هل هو خفيف او ثقيل في النفود , البوالين عيبها المعروف الرجه مافيه احد ما يشتكي من الرجه ترصص ولا ماترصص
ميزه البالون في الحجره و الردميات الطويله اللي تصير مليانه بطانيج نسم له شوي بس و ادعس لو تبي 200 ماتحس بشيء ممكن النقطه هذي تخليك تقبل بسلبيات البالون

و الحذر من الانزلاق ترا الشاهين والبالون وقت المطر خطره لازم تراعي الشيء هذا

[الكدن1]

حياك الله
اقدر افيدك عن البالون
تضعف عزم السيارة وخاصة في طلوع النفود (يعني طلوع طويل) اما الذي يسايس المطالع فلا مشكلة
في الاسفلت يراوغ اذا كان الكفر نصف عمر وتحت ماعدا السيام تاير الذي انقطع من 3 سنوات
عمره قليل 6 شهور لراعي المقانيص
مميزاته:
انس قولت غرزت اوثولث الموتر
يتحمل السرعات العالية لكن لابد يكون الهواء 35 او 40 في الصيف
يخفف المطبات بنسبة عالية
لا يتأثر بالتنسيم في النفود 10 يمشي ولا يفصخ الكفر
حل الرجة تدبيل مساعد الدركسون بالاضافة التشييك على الفلنجات في الدفرنس الامامي واحيانا يكفي تشيل الوردات وفيه موضوع بالمنتدى عن هذه المشكلة وحلها بالصور
فيه نوع خفيف على السيارة ممتاز في الرمل (سموتومو) لكنه لايتحمل الاحجار
ملاحظة/تجربتي على فتك فقط

[مجالس الرجال]

لا تقرب البالون اذا مقصدك نفود البالون للوعر والحجرة والحصيان لأن نقشته ناعمه ماتصلح للنفود وثقيل بالحيل اعطيك تجربة تبين لك ثقله على الموتر كان معي اف جي وعليه بالون 900 واخوي معه اف جي شد بلد تقاومت انا واياه لمعرفة مدى ثقل البالون بدون مبالغة يطوف علي بالقومة بفارق كبير ثم يهدي حتى اصير بجنبه وانا حاط رجلي ثم يدوس مره ثانية ويطوف علي لكن بالسرعات العالية بحكم ان الكفر كبير اتقدم عليه لان دورة الكفر اكبر من كفر شد البلد ولعلم الجميع البالون اعلى سرعة له هي 140 حرف N

[abo naser 1]

من تجربة جميع الانواع من دعسة الشاهين

ما رائيت اجود من الهنكوك في جميع الظروف وخفيف على الموتر وبالنفد يتندح بس احط الهواء 10 مايلحق
الوحيد الي يجي 8 غاط والباقي جميعها 6
المقاس 245/85/16

[abo naser 1]

حياك يابعدي

ترا اقولك ثقيل لان موتري باترول 4500 ونت خابر هاالمكينه ردي عزمها ماهي زي الفتك

غير صحيح عزمها ردي

[ابن عكاش]

البالون في النفود لك عليه ثقيل شوي لازم تنسم لكن في الوعر والبطناج ممتاز وفي الزفلت وسط
الدنلوب نقشة شاهين 245/16/85 ممتازه للنفود وإذا نسمت يفرق معك واجد واحياناً ما تحتاج تنسيم يعني بشكل عام للنفود اشوف انها افضل شي

[((ابوملاك))]

انا مجرب هذا وهذا

على شاص

البالون صراحه غثيت ولا هو هاك الممشى بالنفود الشاهين عمدي وافضل ويفرش على طول

مهو زي البالون تنسم ويبقى واقف

[سقم المعادي 1]

باختصار للنفود غير الشاهين مافيه افضل
البالون ماينفع الا لراعين الحره و المناطق ذيك
و افضل شيء بالشاهين الهانكوك لكن يعيبه صوت الصريخ بالزفلت لازم تحط به 40

[مفضخ الشري]

مافيه افظل من كفرات البالون للنفود
حط هواهن 20 وادعلي
اذا الجنط16ركب بالون مقاس825 واذا مقاس الجنط17 مافيه الا 900

كم غاط يجي مقاس 825 هل يجي 8 ولا فقط 6