###ابمسك خط بوكرة وخايف ###

[قاعس]

باذن الله بوكرة ابمسك خط مكة وخايف على وجهية الموتر تكشر وناس تقول رشه رملي مثل العالم وانا ودي بشي سريع شغله لاني بمشي بوكرة وش رايكم نحط رشة وبس ولافيه شي جديد

[ابوهايلكس]

خذ لك فيري فيري طال عمرك ولمع وجهية السيارة

[اليامي قطر]

الفيري ياكل وجه السياره مع الوقت

حط تغبير الرمل ولو اني اشوف مالها داعي بس جرب

[غار بن شعلان]

السلام عليكم

شف وانا اخوك جربت الرشه الشفافه ماش وجربت التغبيره مايمديك تقطع 100 كيلو الا وهو طاير نصه وبالذات الصدام مايمسك فيه زين وكان فيه عج بيعدم الصدام ولا استفدت شي غير كذا اذا جيت تغسله ماينطف بالزوايا والفتحات يبقى فيه

عليك بالفيري يمسك وسنين طويله نجربه وماشفنا منه خلاف ابد لكن اول ماتاصل غسله ع طول ومايضر البويه ان شاء الله

اما تخليه ع البودي كم يوم والشمس ترنع فيه ايه بيضر البويه وبيشهب فيه لاتبعد عن الفيري هو الي شفته ممتاز مع العج

حطه ع ربع الكبوت والصدام والاركان والمرايات والجنوط لاتنساها ادهنها بفيري ترى العج يلعب بالجنوط ويطير لمعتها وادهن نص الابواب التحتي وجوانب الصدام الخلفي

تاصل بالسلامه

ملاحظه لاتحط الفيري الي بالليمون لانه حار ع البويه شوي

[أبو شيري]

يا رجال توكل على الله وأمش وأترك عنك هالأمور

يطير اللي يطير ويبقى اللي يبقى والعمر فاني


وبعدين اذا صار في الوجهيه ترميل ..... خير يا طير
دام رايح لمكه وبتاخذ لك عمره .... بيرزقك الله وترجع بدل السياره سيارتين أن شاء الله

توكل على الله ... ومقبول السعي مقدماً

[ابوتركي122]

الله يقبل منا ومنك

[التعـ King ـديل]

لا تسرع وامورك سهلات ان شاء الله

لا تحط شي وخلك راكد بسواقتك واذا واجهك عج لا تناحره وامش على هونك 120 زينه منها تحافظ على موترك وتفتك من ساهر

وماقدامك الا كل خير ان شاء الله

[laurel_200L]

ان عندك وقت ركب الحماية 3m على الشمعات والواجهة

وان كان ما عندك وقت روح وارجع السلامة وبعد ما ترجع دخلها تلميع ساطع يشيلون لك كل شيء بالصاروخ (ماكيتا ) والكيماويات اللي عندهم بتوفيق

[ابوراكان تبوك]

الفيري ياكل وجه السياره مع الوقت

حط تغبير الرمل ولو اني اشوف مالها داعي بس جرب

صحيح الفيري اكل وجه موتر كان عندي من اول استخدام

وانت مستعجل رش تغبيره رمليه ع الواجهيه واطراف الرفارف والكتوف والمرايات
الانوار فيه لها بخاخ بـ 20 ريال شفاف يكفيك استخدام 5 مرات

اذا السياره برشه وكالتها صعب تتأثر بسرعه لكن البلا من السيارات المرشوشه يمكن الحشرات الحالها فقط ترمل السياره

ذكرتني بموتر جديد اخذته العام احسب للمشوار الف حساب واللحين مهمل ههههههههه

[فهد33]

باذن الله بوكرة ابمسك خط مكة وخايف على وجهية الموتر تكشر وناس تقول رشه رملي مثل العالم وانا ودي بشي سريع شغله لاني بمشي بوكرة وش رايكم نحط رشة وبس ولافيه شي جديد

هههههههه عاد وراه بوكره من العجله
شف وأنا اخوك والله اذا الموتر يستاهل قيمته قيمت عمارة لا بالله رشه وضبطه قبل ماتروح ولو تأخرت شوي

[طويق222]

لا تعدى ١٠٠ كلم في الساعه في إمكان العج

[abuhatan]

السلام عليكم ورحمة الله وبركاته

ركب من هذا المنتج تحصله عند محلات الزينة
( Armor All Custom Shield)

وهذا موقع الشركة عشان تتعرف على المنتج

http://www.aacustomshield.com/

[.أبوعبدالرحمن]

تروح وترجع بالسلامة .. فيه حماية الآن على الوجهية موجودة بالسوق يركبونها على الوجهية كاملة ( ربع الكبوت + ربع الرفارف + الأركان + المريات الجانبية + الصدام + الشمعات الأمامية ) نوعية ممتازة أمريكية وسعرها معقول تقريبا 150 ريال إلى 200 ريال حسب نوع السيارة ويعطونك ضمان لمدة سنة تقريباً ما يتغير لونها ولا تأثر على البوية وأنا مركبها الآن ولله الحمد ما واجهت منها أي شي

[WAW]

الحل لاتسافر وخلصنا

[سيف الظفير]

بوكرة // بكره ****