كشاتت اهل الرياض يدخلون ويضيفون

[ديرتي بريده]

السلام عليكم ورحمة الله وبركاته:::


ياهل الرياض نبي نسير على مكاشيتكم وادري انكم ماتقصرون باي شي

لذلك مانبي ذبايح ولا عشيات نبي بس فزعتكم

يقولون ان المكاشيت الزينه هالسنه كلها عندكم

ونسمع بروضة خريم والشوكي والخفس وغيرها وجينا للتنهات الجميله

وعازم انشاء الله اني اجي لهالمكاشيت يوم الاربعاء ولا ودي اضيع

وهنا الزبده اني ابيكم توصفون لي كل ذولي وتتكرمون بذكر المكاشيت الزينه من فياض وغيره حولكم

بتوصيف واحداثيات دقيقه خاصة لخريم

بس ياويلكم لو اضيع ==================(مشكلته عصبي)

(طبعا اتمنى ماشوف عدد الزوار مليون والردود صفر)

ولكم كل شكري وامتناني وتقديري

[الفاخر]

ياهلا والله بــ ( ديرتي بريده )
وياهلا والله بالجميع
الحقيقه يا ( ديرتي بريده ) مادري تبي تجي بصاروخ يوم انك تبي كل اللي ذكرت بخميس وجمعه .والا معك بساط الريح وتطير فوق اللي ذكرت .
انا ابااتلقف واقول .. خل كشتك هالمره لم روضة الخفس وخريم ... أو الشوكي .. لأن الخفس وخريم واضحات ومكاشيتهن وألأماكن الزينه حولهن مامن بعد .
والشوكي تخبر كبير ويبيله طلعه خاصه فيه ويلزمك احداثيات وأهل تمير وما جوارها مايقصرون معك ومع غيرك بالوصف الزين والأحداثيات ورايتهم بيضاء ( شهادة حق )

[ابونصور]

ما دمت من اهل بريدة
الافضل ان تبدأ بالبعيد ثم بالاقرب فالاقرب
اولاً روضة خريم .. على طريق الشرقية ثم مفرق رماح ثم تاتيك لوحة تشير إلى روضة خريم .
ثانياً روضة الخفس .. اذا طلعت من روضة خريم باتجاه رماح وبعدها باتجاه الرمحية وقبل الرمحية ياتيك طريق البويب الرياض على اليسار يطلعك على الثمامه (محطة الثمامة) خذ يمين متجه للمجمعة الطريق القديم وبعد مفرق الصمان بعشرة كيلو (10) ادخل مع ردمية على يمين يوصلك لروضة الخفس (الشمالية)وفيه الروضه الثانية (الجنوبية) فرق بينهم (10)كيلو تقريباً .
ثالثاً : تطلع منها إلى طريق الرياض القصيم السريع ومنها لتمير وعلى الشوكي ..
وتمنياتي لك التوفيق والسعادة ،،

[محمد الشاوي]

يارجال مادام ديرتك بريدة وراه ما تخلي كشتك بالطرفية .

أمزح معك ولو تطلع لخريم تطيح من عينك الطرفية . بس الله يعينك على الزحمة .


خذ هالرابط وتفرج
http://mekshat.com/vb/showthread.php?t=74796

وهذي صورة لخريم





تحياتي